କ୍ୱିଭ୍/ମସ୍କୋ, ୨୫।୪ : ରୁଷିଆ ୟୁକ୍ରେନ୍ ଯୁଦ୍ଧ ଶେଷ ହେବାର ନା ଧରୁନି। ଯୁଦ୍ଧ ଯୋଗୁ ୟୁକ୍ରେନ୍ର ଲକ୍ଷ ଲକ୍ଷ ଲୋକ ଭିଟାମାଟି ଛାଡ଼ି ପଡୋଶୀ ଦେଶରେ ଶରଣାର୍ଥୀ ପାଲଟିଛନ୍ତି। ସେହିପରି ଉଭୟ ପକ୍ଷର ବହୁ କ୍ଷୟକ୍ଷତି ହୋଇଛି। ଉଭୟପକ୍ଷ ସୈନ୍ୟ ଏବଂ ସାଧାରଣ ଲୋକଙ୍କ ରକ୍ତରେ ମାଟି ଭିଜିଛି। ଇନଷ୍ଟିଚ୍ୟୁଟ ଫର୍ ଷ୍ଟଡି ଅଫ ୱାର୍ ଅନୁଯାୟୀ, ଏପ୍ରିଲ ୧୮ ସୁଦ୍ଧା ଭିତ୍ତିଭୂମି ଦୃଷ୍ଟିରୁ ୟୁକ୍ରେନ ପ୍ରାୟ ୮ ହଜାର ୪୮୦ କୋଟି ଡଲାର ହରାଇଛି।
ଅର୍ଥନୀତି ମନ୍ତ୍ରଣାଳୟ ଏବଂ କ୍ୱିଭ୍ ସ୍କୁଲ ଅଫ ଇକୋନୋମିକ୍ସ ଆକଳନ କରିଛି ଯେ ଯଦି ପ୍ରତ୍ୟକ୍ଷ ଏବଂ ପରୋକ୍ଷ କ୍ଷତିକୁ ମିଶାଯାଏ ତେବେ କ୍ଷତିର ପରିମାଣ ୫୬ ହଜାର ୪୦୦ କୋଟି ରୁ ୬୦ ହଜାର କୋଟି ଡଲାର ପର୍ଯ୍ୟନ୍ତ ହୋଇପାରେ।
ଏପ୍ରିଲ ୧୮ କେଏସ୍ଇ ରିପୋର୍ଟ ଅନୁଯାୟୀ, ୟୁକ୍ରେନର ୫୪ ହଜାର ୨୩ କିଲୋମିଟର ସଡ଼କ, ୩୭ ହଜାର ବର୍ଗ ମିଟର ରିଅଲ ଇଷ୍ଟେଟ ନଷ୍ଟ ହୋଇଛି। ଯୁଦ୍ଧରେ ୬୮ ପ୍ରଶାସନିକ କୋଠା, ୨୭୭ ବ୍ରିଜ ଏବଂ ବ୍ରିଜ କ୍ରସିଂ, ୧୧ ଟି ସାମରିକ ଏୟାରଫିଲ୍ଡ, ୧୭ ଟି ବିମାନବନ୍ଦର ଏବଂ ୨ ଟି ବନ୍ଦର ନଷ୍ଟ ହୋଇଯାଇଛି।
ମିଳିତ ଜାତିସଂଘର ଆକଳନରୁ ଜଣାପଡିଛି ଯେ ଫେବୃଆରୀ ୨୪ ରୁ ଏପ୍ରିଲ ୨୩ ମଧ୍ୟରେ ୫୧ ଲକ୍ଷ ୮୬ ହଜାର ୭୪୪ ଲୋକ ୟୁକ୍ରେନ ଛାଡି ଅନ୍ୟ ଦେଶରେ ଆଶ୍ରୟ ନେଇଛନ୍ତି। ଏହି ଲୋକମାନଙ୍କ ମଧ୍ୟରୁ ଅଧିକାଂଶ ପୋଲାଣ୍ଡକୁ ଯାଇଛନ୍ତି। ଏହା ବ୍ୟତୀତ ୭୭୪,୦୯୪ ଶରଣାର୍ଥୀ ରୋମାନିଆ, ୫୭୮,୨୫୫ ରୁଷିଆ, ୪୮୯,୭୫୪ ହଙ୍ଗେରୀ, ୪୩୩,୨୧୪ ମୋଲଡୋଭା, ୩୫୪,୩୨୯ ସ୍ଲୋଭାକିଆ, ୨୪,୦୮୪ ବେଲାରୁଷରେ ଆଶ୍ରୟ ପାଇଁ ପହଞ୍ଚିଛନ୍ତି।
ଆକଳନରୁ ଜଣାପଡିଛି ଯେ ୨୪ ଫେବୃଆରୀ ୨୦୨୨ ଭୋର୍ ୪ ଟାରୁ ୨୧ ଏପ୍ରିଲ ୨୦୨୨ ର ମଧ୍ୟରାତ୍ରି ପର୍ଯ୍ୟନ୍ତ ୟୁକ୍ରେନ୍ରେ ୫ ହଜାର ୩୮୧ ଜଣ ଆହତ ହୋଇଛନ୍ତି। ୨ ହଜାର ୪୩୫ ଜଣଙ୍କର ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ୭୪୬ ପୁରୁଷ, ୪୬୯ ମହିଳା, ୪୮ବାଳିକା, ୬୬ ବାଳକ ଏବଂ ୭୦ ଛୋଟ ପିଲା ଅଛନ୍ତି। ମୃତକଙ୍କ ମଧ୍ୟରେ ୧୦୩୬ ଜଣ ବୟସ୍କ ଅଛନ୍ତି।