ବନ୍ଧୁତା ଯେ କେବଳ ମଣିଷମାନଙ୍କ କ୍ଷେତ୍ରରେ ହୋଇଥାଏ ତାହା ନୁହେଁ, ବନ୍ଧୁତା ପଶୁପକ୍ଷୀଙ୍କ ସହ ମଧ୍ୟ ହୋଇଥାଏ। ଆଜିର ଏହି ସ୍ବତନ୍ତ୍ର ଦିବସରେ ସୋସିଆଲ ମିଡିଆରେ ଏକ କୁକୁର ଏବଂ ସି ଲାୟନର ଫଟୋ ଭାଇରାଲ ହେଉଛି। ଯାହାକୁ ଦେଖିଲେ ଶ୍ରେଷ୍ଠ ବନ୍ଧୁତା ବୋଲି କହିବେ।
ଏକ ପୋଷା କୁକୁର(ଲାବ୍ରାଡର) ଏବଂ ସି ଲାୟନ ମଧ୍ୟରେ ବନ୍ଧୁତା ହୋଇଥିଲା। ପ୍ରତିଦିନ ସେମାନେ ସନ୍ଧ୍ୟାରେ ସମୁଦ୍ର କୂଳରେ ସାକ୍ଷାତ କରି ପରସ୍ପର ସହିତ ସମୟ କଟାଉଥିଲେ। ଏହା ତାଙ୍କର ଦୈନନ୍ଦିନ ସାକ୍ଷାତରେ ପରିଣତ ହୋଇଥିଲା। କୁକୁରର ମାଲିକାଣୀ ଲେନନ୍ ଷ୍ଟେଲା ମଧ୍ୟ ଏହା ଜାଣିଥିଲେ। ଏହି ଦୁଇଜଣଙ୍କର ବନ୍ଧୁତାକୁ ପସନ୍ଦ କରିଥିଲେ।
କୁକୁରର ମାଲିକାଣୀ ଲେନନ ଷ୍ଟେଲା ନିଜେ ସୋସିଆଲ ମିଡିଆରେ ଲୋକଙ୍କୁ ଡଗ୍ ସ୍ଲାଇମ୍ ଏବଂ ସି ଲାୟନର ଏହି କାହାଣୀ କହିଥିଲେ। ଦୁହେଁ ଏକାଠି ଖେଳୁଥିଲେ, କିନ୍ତୁ ଦିନେ ସେମାନଙ୍କ ସହ କିଛି ଖରାପ ଘଟଣା ଘଟିଗଲା। କୁକୁର ସ୍ଲାଇମ୍ ବିଚରେ ପହଞ୍ଚିବା ପରେ ସି ଲାୟନ ସେଠାରେ ବାଲି ଉପରେ ପଡ଼ି ରହିଥିଲା। ତା’ର ମୃତ୍ୟୁ ହୋଇସାରିଥିଲା। ଅନ୍ୟ ସାମୁଦ୍ରିକ ଜୀବଙ୍କ ଆକ୍ରମଣରେ ସି ଲାୟନଟି ପ୍ରାଣ ହରାଇଥିଲା। ଏହା ଦେଖି ସ୍ଲାଇମ୍ ସେଠାରେ କାନ୍ଦିବାକୁ ଲାଗିଲା। ସେଠାରୁ ସେ ଜମା ଆସିଲା ନାହିଁ। ଏହା ଦେଖି ମାଲିକାଣୀଙ୍କ ଆଖିରେ ମଧ୍ୟ ଲୁହ ଆସିଯାଇଥିଲା। ସେ ତାଙ୍କ କୁକୁର ଏବଂ ସି ଲାୟନର କାହାଣୀ ଇନ୍ଷ୍ଟାଗ୍ରାମରେ ଶେୟାର କରିଥିଲେ, ଯାହା ସମସ୍ତଙ୍କୁ ଭାବପ୍ରବଣ କରିଦେବ।
ଭିଡିଓରେ ଉଭୟ ସମୁଦ୍ରକୂଳରେ ମଜା କରୁଥିବା ଦେଖିବାକୁ ମିଳିଛି। ସେମାନେ କାଲିଫର୍ନିଆର ମାଲିବୁ ସମୁଦ୍ର କୂଳରେ ମଜା କରୁଥିଲେ। ଏହା ତାଙ୍କର ଦୈନନ୍ଦିନ କାର୍ଯ୍ୟ ଥିଲା। ତାଙ୍କର ବନ୍ଧୁତା ବେଶିଦିନ ରହିନାହିଁ। ଶେଷରେ ସି ଲାୟନର ମୃତ୍ୟୁ ଘଟିଛି। ଯିଏ ଏହି ଭିଡିଓ ଦେଖୁଛି ସେ କେବଳ ସେମାନଙ୍କର ବନ୍ଧୁତା ଏବଂ ସହାନୁଭୂତିକୁ ପ୍ରଶଂସା କରୁଛି।
