ନୂଆଦିଲ୍ଲୀ, ୨୯।୩ : ଏଥର ଭାରତରେ ଗରମ ପାଗର ଉତ୍ତାପ ଗତ କିଛି ବର୍ଷ ଅପେକ୍ଷା ଲୋକଙ୍କୁ ଅଧିକ ଅସୁବିଧାରେ ପକାଉଛି। ମାର୍ଚ୍ଚ ମାସରେ, ବୃଦ୍ଧି ପାଉଥିବା ତାତି ଲୋକମାନଙ୍କ ପାଇଁ ସମସ୍ୟା ସୃଷ୍ଟି କରିଛି। ପ୍ରବଳ ଖରା ଯୋଗୁ ରାସ୍ତାଘାଟ ଶୂନଶାନ ହୋଇଯାଉଛି। ଦ୍ୱିପହର ହେବା ବେଳକୁ ରାସ୍ତାରେ କର୍ଫ୍ୟୁ ଭଳି ପରିସ୍ଥିତି ଦେଖିବାକୁ ମିଳୁଛି। ସତେ ଯେପରି ଲୋକମାନେ ତାତିରୁ ରକ୍ଷା ପାଇବା ପାଇଁ ନିଜ ଘରେ ବନ୍ଦୀ ହୋଇ ରହୁଛନ୍ତି। ଦେଶର ଅଧିକାଂଶ ସ୍ଥାନରେ ଝାଞ୍ଜି ପବନ ପ୍ରବାହିତ ହେଉଛି। ଯେଉଁଥିପାଇଁ ସାଧାରଣ ଜୀବନଯାତ୍ରା ପ୍ରଭାବିତ ହେବାରେ ଲାଗିଛି।
ଭାରତୀୟ ପାଣିପାଗ ବିଭାଗ (ଆଇଏମଡି) କହିଛି ଯେ ଆସନ୍ତା କିଛି ଦିନ ମଧ୍ୟରେ ତାତି ପୁଣି ବଢ଼ିବ। ତାତି ଚଳିତ ବର୍ଷ ରେକର୍ଡ ଭାଙ୍ଗିବ ବୋଲି ପାଣିପାଗ ବିଭାଗ ପକ୍ଷରୁ ସତର୍କ ସୂଚନା ଜାରି କରଯାଇଛି। ଦେଶର ବହୁ ସ୍ଥାନରେ ତାପମାତ୍ରା ୪୨ ଡିଗ୍ରୀ ସେଲସିୟସ୍ ଅତିକ୍ରମ କରିବାର ପୂର୍ବାନୁମାନ କରାଯାଇଛି। ଏଥିସହିତ ଜାତୀୟ ରାଜଧାନୀ ଦିଲ୍ଲୀ, ଉତ୍ତରପ୍ରଦେଶ, ହରିୟାଣା ଏବଂ ରାଜସ୍ଥାନ (ରାଜସ୍ଥାନର ପାଣିପାଗ) ସମେତ ଉତ୍ତର ଭାରତରେ ପ୍ରବଳ ଝାଞ୍ଜି ପବନ ବହିବା ଯୋଗୁ ଅବସ୍ଥା ଗୁରୁତର ରୂପ ନେବାର ସମ୍ଭାବନା ରହିଛି।
ପାଣିପାଗ ବିଭାଗ ସହିତ ଜଡିତ ବିଶେଷଜ୍ଞଙ୍କ ଅନୁଯାୟୀ, ବହୁ ଦୂରରେ ବର୍ଷା ହେବାର ଆଶା ନ ଥିବାରୁ ଉତ୍ତାପରୁ ଆରାମ ମିଳିବ ନାହିଁ। ପାଣିପାଗ ବିଭାଗର ସୂଚନାନୁସାରେ ସମତଳ ଅଞ୍ଚଳରେ ପବନର ବେଗ ମନ୍ଥର ରହିବ ଏବଂ ତାପମାତ୍ରା ବଢ଼ିିବ। ବର୍ତ୍ତମାନ ବର୍ଷା ହେବାର ସମ୍ଭାବନା ନ ଥିବାରୁ ଗରମ ପାଗରୁ ମୁକ୍ତି ପାଇବାର କୌଣସି ଆଶା ନାହିଁ। ଏପରିସ୍ଥଳେ ଦିଲ୍ଲୀ,ହରିୟାଣା ଏବଂ ରାଜସ୍ଥାନ ଲାଗି ପାଣିପାଗ ବିଭାଗ ପକ୍ଷରୁ ଲୁ ପ୍ରବାହ ନେଇ ପୂର୍ବାନୁମାନ କରାଯାଇଛି।
