କେନ୍ଦୁଝର, ୬।୬(ସ୍ବ.ପ୍ର.): କେନ୍ଦୁଝର ଜିଲାରେ ଏବେ ଚାଲିଛି ଅଘୋଷିତ ବିଦ୍ୟୁତ୍ କାଟ୍ ଚାଲିଛି॥ ଦିନ ରାତି ଯେତେବେଳେ ଇଚ୍ଛା ବିଜୁଳି ଚାଲି ଯାଉଛି। ବର୍ଷା ଆସିବା ପୂର୍ବରୁ ଓ ପରେ ଘଣ୍ଟା ଘଣ୍ଟା ବିଜୁଳି ଯୋଗାଣ ବିଚ୍ଛିନ୍ନ ହେଉଛି। ଟାଟା ପାୱାର ବିଦ୍ୟୁତ୍ ବିତରଣ ଦାୟିତ୍ୱ ଗ୍ରହଣ କରିବା ପରେ ଏପରି ଅବ୍ୟବସ୍ଥା ସବୁବେଳେ ଘଟୁଛି। ବିଜୁଳି ରହୁ ନ ଥିବାରୁ ଡାକ୍ତରଖାନାରେ ମଧ୍ୟ ରୋଗୀ ସେବା ବ୍ୟାହତ ହେଉଛି। ଜେନେରେଟର ଓ ଇନଭର୍ଟର ବିଦ୍ୟୁତ ବିକଳ୍ପ ଭାବେ କାମ କରି ପାରୁନି। ସାଧାରଣ ଲୋକେ ହନ୍ତସନ୍ତ ହେଉଛନ୍ତି। ଛାତ୍ରୀଛାତ୍ରମାନେ ଏପରି ବାରମ୍ବାର ବିଦ୍ୟୁତ ଚାଲି ଯାଉ ଥିବାରୁ ପାଠ ପଢ଼ି ପାରୁ ନାହାନ୍ତି। କେନ୍ଦୁଝର ସହର ଛଡା ଗାଁ ଗଣ୍ଡା କଥା ନ କହିବା ଭଲ। ସେଠାରେ ଶୁଣିବାକୁ କେହି ନାହିଁ । ଏହି ଅବ୍ୟବସ୍ଥା ବିରୁଦ୍ଧରେ କେନ୍ଦୁଝର ଲୋକେ ତାତି ସାରିଲେଣି। ତେଣୁ ପିସିସି ସାଧାରଣ ସମ୍ପାଦକ ଆଲୋକ ମିଶ୍ରଙ୍କ ନେତୃତ୍ୱରେ ଯୁବକମାନେ ଏକଜୁଟ ହୋଇ ଟାଟା ପାୱାର ଉତ୍ତର ଓଡ଼ିଶା ବିଦ୍ୟୁତ ବିତରଣ ସଂସ୍ଥାର କେନ୍ଦୁଝର ଅଫିସକୁ ଯାଇ ଏନେଇ ବିରୋଧ ପ୍ରଦର୍ଶନ କରିଥିଲେ। ନିର୍ବାହୀ ଯନ୍ତ୍ରୀଙ୍କ ସହ ସମସ୍ତଙ୍କ ସାମ୍ନାରେ ଆଲୋଚନା କରାଯାଇଥିଲା। ସମସ୍ତେ ଟାଟା ପାୱାରର ଏପରି ମନମାନି ଓ ପ୍ରଜା ଶୋଷଣ ନୀତିକୁ ତୀବ୍ର ନିନ୍ଦା କରିଥିଲେ। ଆଗାମୀ ଦିନରେ ଆନ୍ଦୋଳନ ତୀବ୍ର କରାଯିବ ବୋଲି ଚେତାବନୀ ଦିଆଯାଇଥିଲା। ବ୍ୟବସ୍ଥା ପରିବର୍ତ୍ତନ ନ ହେଲେ ଟାଟା ପାୱାର ବିରୋଧରେ ସାଧାରଣ ଲୋକଙ୍କ ସହଯୋଗରେ ଅସହଯୋଗ ଆନ୍ଦୋଳନ କରାଯିବ ପୋଲି କୁହାଯାଇଛି।