ଡୁଙ୍ଗୁରିପାଲି ୧୭ା୭(ଦୀନବନ୍ଧୁ ସୁନା): ସୁବର୍ଣ୍ଣପୁର ଜିଲା ଡୁଙ୍ଗୁରିପାଲିରେ ରବିବାରଠାରୁ ବର୍ଷା ଲାଗି ରହିବାରୁ ଧନଜୀବନ ପ୍ରଦ୍ଭାବିତ ହୋଇଛି। ଡୁଙ୍ଗୁରିପାଲି, ରାମପୁର ପୂର୍ତ୍ତ ବିଭାଗ ରାସ୍ତାରେ ଥିବା ବିଭିନ୍ନ ପୋଲ, ନାଳ ଦେଇ ବର୍ଷାଜଳ ଆସିବାରୁ ସୋମବାର ଡୁଙ୍ଗୁରିପାଲି-ରାମପୁର ମଧ୍ୟରେ ଯୋଗାଯୋଗ ବିଛିନ୍ନ ହୋଇଛି। ରାମପୁର-ଡୁଙ୍ଗୁରିପାଲି ରାସ୍ତାର ବିଭିନ୍ନ ସ୍ଥାନରେ ପୂର୍ତ୍ତ ବିଭାଗ ପକ୍ଷରୁ ରାସ୍ତା ଓ ପୋଲ ନିର୍ମାଣ କାମ ଚାଲିଛି। ଏଥିପାଇଁ ବିଭିନ୍ନ ସ୍ଥାନରେ ଯାତାୟତ ପାଇଁ ବାଇପାସ ରାସ୍ତା କରାଯାଇଛି । ଡୁଙ୍ଗୁରିପାଲି ଶ୍ମଶାନ ଘାଟ ନିକଟରେ ଥିବା ପୋଲର ବାଇପାସ ରାସ୍ତା ଉପରେ ସୋମବାର ପୂର୍ବାହ୍ନ ୧୦ଟାରେ ୫ ଫୁଟର ବର୍ଷାପାଣି ପ୍ରଭାବିତ ହୋଇଥିଲା। ଏଥିଯୋଗୁ ବାଇପାସ୍ ରାସ୍ତା ଧୋଇ ହୋଇଯାଇଥିଲା । ସୋମବାର ଯାତ୍ରୀ ବାହୀ ବସ, ମାଲବାହୀ ଟ୍ରକ ଯିବା ଆସିବା ବନ୍ଦ ରହିଥିଲା। ଶ୍ରୀରାମ ମହାବିଦ୍ୟାଳୟକୁ ଛାତ୍ରୀଛାତ୍ର ପଢ଼ିବାକୁ ଯାଇ ପାରି ନ ଥିଲେ । ଏପରିକି ରାମପୁର ତହସିଲ କାର୍ଯ୍ୟାଳୟ ଓ କୋର୍ଟକୁ ଡୁଙ୍ଗୁରିପାଲି ଅଞ୍ଚଳର ଲୋକେ ଯାଇପାରି ନ ଥିବା ଦେଖିବାକୁ ମିଳିଥିଲା। ଅପରାହ୍ନ ୪ ଟାରେ ବାଇପାସ ରାସ୍ତାରୁ ଜଳସ୍ତର ସାମାନ୍ୟ କମିବାରୁ ଲୋକେ ପାଣିରେ ପଶି ରାସ୍ତା ପାର ହେଉଥିବା ଦେଖିବାକୁ ମିଳିଥିଲା ।