ବେଙ୍ଗାଲୁରୁ, ୫।୯: ବେଙ୍ଗାଲୁରୁ ଏବଂ ଉପକୂଳ କର୍ନାଟକର ବିଭିନ୍ନ ଅଞ୍ଚଳରେ ଆସନ୍ତା ୯ ତାରିଖ ଯାଏ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଏନେଇ ଭାରତ ପାଣିପାଗ ବିଭାଗ (ଆଇଏମ୍ଡି) ସୋମବାର ପୂର୍ବାନୁମାନ କରିଛି। ଆଇଏମ୍ଡି ସୂଚନାନୁଯାୟୀ, ସେପ୍ଟେମ୍ବର ୫ ତାରିଖରୁ ୯ ତାରିଖ ଯାଏ ପ୍ରବଳ ବର୍ଷା ଯୋଗୁ କୋଡାଗୁ, ଶିବମୋଗା, ଉତ୍ତର କନ୍ନଡ, ଦକ୍ଷିଣ କନ୍ନଡ, ଉଦୁପି ଏବଂ ଚିକମାଗାଲୁର ଜିଲାକୁ ୟେଲୋ ଓ୍ବାନିର୍ଂ ଜାରି କରାଯାଇଛି। ସେହିପରି ଉପକୂଳବର୍ତ୍ତୀ ଅଞ୍ଚଳରେ ପବନ ହେବାର ସମ୍ଭାବନା ଥିବାରୁ ମତ୍ସ୍ୟଜୀବୀମାନଙ୍କୁ ସମୁଦ୍ରକୁ ନ ଯିବାକୁ ପରାମର୍ଶ ଦିଆଯାଇଛି। ଅନ୍ୟପଟେ, ବେଙ୍ଗାଲୁରୁରେ ରବିବାର ପ୍ରବଳ ବର୍ଷା ଯୋଗୁ ସହରର ଅନେକ ସ୍ଥାନରେ ପାଣି ଜମି ରହିଥିଲା। ମଙ୍ଗଳବାର ମଧ୍ୟ ବେଙ୍ଗାଲୁରୁରେ ବଜ୍ରପାତ ସହିତ ପ୍ରବଳ ବର୍ଷା ହୋଇପାରେ ବୋଲି ଆଇଏମ୍ଡି କହିଛି। ଏଥିସହ କାବେରୀ ନଦୀରୁ ବିଶୋଧନ କରି ଜଳ ଯୋଗାଣ କରୁଥିବା ପାଣି ପ୍ରଳଳ୍ପ ପାଣିରେ ବୁଡି ଯାଇଛି। ଫଳରେ ଅଚଳାବସ୍ଥା ସୃଷ୍ଟି ହୋଇଛି। ତେଣୁ ସହରର କିଛି ଅଞ୍ଚଳରେ ପାନୀୟ ଜଳ ଯୋଗାଣ ମଧ୍ୟ ଦୁଇ ଦିନ ବନ୍ଦ ରହିବ ବୋଲି ଜଣାପଡିଛି।