ନନ୍ଦପୁର/କୋରାପୁଟ,୧୪ା୯(ଶଙ୍କର ପୂଜାରୀ/ଅମିତାଭ ବେହେରା)କୋରାପୁଟ ଜିଲାରେ ପ୍ରବଳ ବର୍ଷା ଜାରି ରହିଛି। ୨ଦିନ ଧରି ଲଗାଣ ବର୍ଷାରେ କୋରାପୁଟ ଜିଲାର ବିଭିନ୍ନ ବ୍ଲକରେ ୩୦ ଘର ଭାଙ୍ଗିଛି। ସେଥିରୁ କୋରାପୁଟ ବ୍ଲକରେ ୩ଟି, ନନ୍ଦପୁର ବ୍ଲକରେ ୮ଟି, ପଟ୍ଟାଙ୍ଗି ବ୍ଲକରେ ୨ଟି, ସେମିଳିଗୁଡା ବ୍ଲକରେ ୧୩ଟି ଓ ବୈପାରିଗୁଡା ବ୍ଲକରେ ୪ଟି ଘର ଭାଙ୍ଗିଥିବା ଜିଲା ଜରୁରୀକାଳୀନ ବିଭାଗ ପକ୍ଷରୁ ଜଣାପଡିଛି।
ଲଗାଣ ବର୍ଷାରେ ନନ୍ଦପୁର ବ୍ଲକ ଅଞ୍ଚଳରେ ବର୍ଷାଜଳ ରାସ୍ତା ଉପରେ, ଚାଷଜମିରେ, ଗ୍ରାମ ସଦରରେ ପ୍ରବାହିତ ହେଉଥିବାରୁ ଲୋକଙ୍କୁ ଘରୁ ବାହାରିବା କଷ୍ଟକର ହୋଇଛି। କୋରାପୁଟ ଜିଲା ନନ୍ଦପୁର ବ୍ଲକ ଅଞ୍ଚଳରେ ୮ଟି ଘର ଭାଙ୍ଗିଛି। ନନ୍ଦପୁର ତହସିଲର ବାଲଡ଼ା ରାଜସ୍ବ ମଣ୍ଡଳରେ ୪ଟି, ଚାଟୁଆ ରାଜସ୍ବ ମଣ୍ଡଳରେ ୨ଟି ଓ କୁଲାରସିଂ ରାଜସ୍ବ ମଣ୍ଡଳରେ ୨ଟି ଘର ଭାଙ୍ଗିଛି। ବାଲଡା ରାଜସ୍ବ ମଣ୍ଡଳରେ ବାଲଡା ଗ୍ରାମର ପଦ୍ମା ଶିସା ଓ ଦଇତାରି ଖରା, ଲୁଲୁବୁରୁ ଗ୍ରାମର ଗୁରୁ ଆଚିଙ୍ଗ ଓ ଭେଜା ଗ୍ରାମର ଗୌରଚନ୍ଦ୍ର ଖିନବୁଡ଼ିଙ୍କ ଘରକାନ୍ଥ ଭୁଶୁଡ଼ି ପଡ଼ିଛି। ଚାଟୁଆ ରାଜସ୍ବ ମଣ୍ଡଳ ପାଡାଲପୁର ଗ୍ରାମର ନାବ ପାଙ୍ଗୀଙ୍କ ଘର ଭାଙ୍ଗିଥିବା ବେଳେ ଅନ୍ୟ ଜଣକ ନାମ ମିଳିପାରିନାହିଁ। ସେହିପରି କୁଲାରସିଂ ରାଜସ୍ବ ମଣ୍ଡଳର କୁଲାରସିଂ ଗ୍ରାମର ଗଣପତି ତେଲମାଲଙ୍କ ଘର ଭାଙ୍ଗିଛି। ଅନ୍ୟ ଜଣଙ୍କ ନାମ ଜଣାପଡିନାହିଁ। ସମ୍ପୃକ୍ତ ପରିବାରଙ୍କୁ ତ୍ୱରିତ ସହାୟତା ସ୍ବରୂପ ପଲିଥିନ ଯୋଗାଇ ପ୍ରଦାନ କରାଯାଇଥିବା ରାଜସ୍ବ ନିରୀକ୍ଷକ ଅକ୍ଷୟ କ୍ଷତ୍ରି କହିଛନ୍ତି। କ୍ଷୟକ୍ଷତି ଆକଳନ ପରେ ସମସ୍ତଙ୍କୁ ଘରଭଙ୍ଗା ସହାୟତା ପ୍ରଦାନ କରାଯିବ ବୋଲି ତହସିଲଦାର ନରସିଂହ ଗାଦବା ସୂଚନା ଦେଇଛନ୍ତି। କୋରାପୁଟ ଜିଲାରେ ବୁଧବାର ମୋଟ ୬୨୪ ମି.ମି. ବର୍ଷା ହୋଇଛି। ଜିଲାର ଦଶମନ୍ତପୁର ବ୍ଲକରେ ସର୍ବାଧିକ ୯୮ ମି.ମି. ବର୍ଷା ହୋଇଥିବା ବେଳେ ନାରାୟଣପାଟଣା ବ୍ଲକରେ ସର୍ବନିମ୍ନ ୧୫.୬ ମି.ମି. ବର୍ଷା ହୋଇଛି। ଲକ୍ଷ୍ମୀପୁର ବ୍ଲକରେ ୯୪.୨ ମି.ମି., ସେମିଳିଗୁଡା ବ୍ଲକରେ ୮୭ ମି.ମି., ନନ୍ଦପୁର ବ୍ଲକରେ ୭୦ ମି.ମି. , କୋରାପୁଟ ବ୍ଲକରେ ୬୮ ମି.ମି., ଜୟପୁର ବ୍ଲ୍ଳକରେ ୩୯.୪ ମି.ମି. ବୋରିଗୁମ୍ମା ବ୍ଲକରେ ୨୬.୪ ମି.ମି. କୋଟପାଡ ବ୍ଲକରେ ୨୫.୨ ମି.ମି., କୁନ୍ଦୁରା ବ୍ଲକରେ ୨୪ ମି.ମି., ଲମତାପୁଟ ବ୍ଲକରେ ୨୨ ମି.ମି. ବୈପାରିଗୁଡା ବ୍ଳକରେ ୨୦ ମି.ମି., ବନ୍ଧୁଗାଁ ବ୍ଲକରେ ୧୬ ମି.ମି. ବର୍ଷା ହୋଇଛି।