ଦାରିଙ୍ଗବାଡି,୧୯।୭ (ଅରୁଣ ସାହୁ)- ଗତ କିଛିଦିନ ହେଲା ଦାରିଙ୍ଗବାଡି ବ୍ଲକ ଅଞ୍ଚଳରେ ଲଘୁଚାପ ଜନିତ ବର୍ଷା ଜାରି ରହିଛି। ଦୁର୍ଗମ: ଅଞ୍ଚଳଗୁଡିକରେ ରହିଥିବା ରାସ୍ତା ଅବସ୍ଥା ଶୋଚନୀୟ ହୋଇପଡ଼ିଥିବା ବେଳେ ଏକାଧିକ ରାସ୍ତା ଦୀର୍ଘଦିନ ଧରି ସମ୍ପ୍ରସାରଣରେ ବିଳମ୍ବ ଯୋଗୁଁ ରାସ୍ତାର ଅବସ୍ଥା ଶୋଚନୀୟ ହୋଇପଡିଛି। ଦାରିଙ୍ଗବାଡିଠାରୁ କୋଟଗଡ଼ ବ୍ଲକକୁ ସଂଯୋଗ କରୁଥିବା ସିର୍କାବର୍ଗଠାରୁ ପିଟକମେରା ପର୍ଯ୍ୟନ୍ତ ରାସ୍ତାର ଅବସ୍ଥା ଅତି ଶୋଚନୀୟ ହୋଇପଡିଛି।
ପ୍ରକାଶ ଯେ, ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ସିର୍କାବର୍ଗ ଠାରୁ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ରାସ୍ତା ସମ୍ପ୍ରସାରଣ କାର୍ଯ୍ୟ କରାଯାଉଥିବା ବେଳେ ରାସ୍ତାରେ କିଛି ସ୍ଥାନରେ ମେଟାଲ ଓ ଆଉ କିଛି ସ୍ଥାନରେ କେବଳ ମାଟି ପକାଇ ଛାଡିଦିଆଯାଇଛି। ଆଉ କିଛି ସ୍ଥାନରେ ପୋଲ ନିର୍ମାଣ କରାଯାଇଥିଲେ ସୁଦ୍ଧା ସଂଯୋଗୀକରଣ ରାସ୍ତା ନିର୍ମାଣ କରାଯାଇନାହିଁ। ଫଳରେ ଏବେ ଲଗାଣ ବର୍ଷାରେ ବାଇପାସ ରାସ୍ତାରେ ଯାତାୟତ ସଂପୂର୍ଣ୍ଣ ବାଧାପ୍ରାପ୍ତ ହୋଇଥିବା ସିର୍କାବର୍ଗ ଅଞ୍ଚଳର ହେମନ୍ତ ଉଠାଣ ସିଂ, କୈଳାଶ ବଳିୟାର ସିଂ, କାଳୀ ବଳିୟାର ସିଂ, ସୁଶିଲ ବଳିୟାର ସିଂ ପ୍ରମୁଖ କହିଛନ୍ତି। ଉକ୍ତ ରାସ୍ତାରେ ସିର୍କାବର୍ଗ ଗ୍ରାମ ସମେତ ଉଗଡିଙ୍ଗ, ମାଣିକଯୋଡି, ବାନ୍ଦାମେରା, ଗୁଡ୍ରିମାହା ଗ୍ରାମର ପ୍ରାୟ ୧୦ ହଜାର ଲୋକ ପ୍ରଭାବିତ ହେଉଛନ୍ତି। ଶୀଘ୍ର ରାସ୍ତା ସମ୍ପ୍ରସାରଣ କାର୍ଯ୍ୟ ଶେଷ କରିବାକୁ ଅଞ୍ଚଳବାସୀ ଦାବି କରିଛନ୍ତି। ବର୍ଷା ଦିନ ପୂର୍ବରୁ କାର୍ଯ୍ୟ ଶେଷ କରାଯିବା ଆବଶ୍ୟକ ସ୍ଥଳେ ଲୋକଙ୍କ ସମସ୍ୟାକୁ ଅଣଦେଖା କରାଯାଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ଏନେଇ ବିଭାଗୀୟ ସହକାରୀ ନିର୍ବାହୀ ଯନ୍ତ୍ରୀ ରମାକାନ୍ତ ପଟ୍ଟନାୟକ କହିଛନ୍ତି, ପୋଲ ଉପରେ ଛାତ କାମଗୁଡିକ ହୋଇପାରିନି। ଏବେ ବର୍ଷା ପାଇଁ କାମ ହୋଇପାରୁନି ତଥାପି ଲୋକଙ୍କ ଯାତାୟତରେ ସୁବିଧା କରାଯିବ। ସେ ନିଜେ ଯାଇ ପଦକ୍ଷେପ ନେବେ ବୋଲି କହିଛନ୍ତି।