କୋରାପୁଟ,୨୧ା୫(ସ୍ବ.ପ୍ର.): କୋରାପୁଟ ସହର ସମେତ ଆଖପାଖ ଅଞ୍ଚଳରେ ଶୁକ୍ରବାର ସଂନ୍ଧ୍ୟାରେ ହୋଇଥିବା କାଳ ବୈଶାଖ ଝଡପବନ ଓ ବର୍ଷାରେ ବ୍ୟାପକ କ୍ଷୟକ୍ଷତି ଘଟିଛି। କୋରାପୁଟ ସହର ସମେତ ଲକ୍ଷ୍ମୀପୁର, ସେମିଳିଗୁଡା ବ୍ଲକରେ ୨୨୫ ମିମି ବର୍ଷା ହୋଇଥିଲା। ଏହିସବୁ ଅଞ୍ଚଳରେ ୧୦୦ରୁ ଊର୍ଦ୍ଧ୍ୱ ଘର ଆଂଶିକ ରୂପେ ଭାଙ୍ଗିଥିବା ଜିଲା ଜରୁରୀ ଅଧିକାରୀ ଜ୍ଞାନଜିତ ତ୍ରିପାଠୀ କହିଛନ୍ତି। ଏହି ଝଡ ଓ ବର୍ଷାରେ କୋରାପୁଟ ଡିଆରଡିଏ ଗେଷ୍ଟ ହାଉସ୍ର ଟିଣ ଛାତ ଉଡିଯାଇ ୫୦ ମିଟର ଦୂରରେ ପଡିଥିବା ଦେଖିବାକୁ ମିଳିଥିଲା। ଏଥିଯୋଗୁ ୨ଟି ବିଦ୍ୟୁତ୍ ଖୁଣ୍ଟ ଭାଙ୍ଗି ବିଦ୍ୟୁତ୍ ତାର ଛିଣ୍ଡିଯାଇଛି ା ସେହିପରି ସହରର ଆରିଓ କୋଲନୀ, ଶାନ୍ତି ନଗର, ଟେଲିକମ କଲୋନୀ ଅଞ୍ଚଳରେ ୮ଟି ବିଦ୍ୟୁତ ଖୁଣ୍ଟ ଭାଙ୍ଗିଛି। ବିଦ୍ୟୁତ୍ ତାର ଛିଣ୍ଡି ୨୪ ଘଣ୍ଟା ପରେ ମଧ୍ୟ ଏସବୁ ଅଞ୍ଚଳରେ ବିଦ୍ୟୁତ ସେବା ସ୍ବାଭାବିକ ହୋଇ ନ ଥିବା ଜଣାପଡିଛି। ସେହିପରି କୋରାପୁଟ ମହିଳା ମହାବିଦ୍ୟାଳୟ ପରିସର, ଲାଣ୍ଡିଗୁଡା, ଫରେଷ୍ଟ କୋଲନୀ ଅଞ୍ଚଳରେ ବ୍ୟାପକ କ୍ଷତି ହୋଇଛି। ବିଦ୍ୟୁତ୍ ସ୍ବାଭାବିକ ହୋଇ ନ ଥିବାରୁ ବିଭାଗର କାର୍ଯ୍ୟ ନେଇ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ା ସୂଚନାଯୋଗ୍ୟ, ଏବେ ଟାଟା ପକ୍ଷରୁ କୋରାପୁଟ ଜିଲାରେ ବିଦ୍ୟୁତ୍ ବିତରଣ କରାଯାଉଛି। ବିଦ୍ୟୁତ୍ ବିଭ୍ରାଟ ହେଲେ ତୁରନ୍ତ ମରାମତି ପାଇଁ ବୁଦ୍ଧମ ବିଲଡର ସଂସ୍ଥାକୁ ଟାଟା ବର୍ଷିକିଆ ଲିଜ ଦେଇଛି। ଅଥଚ ଏହି ସଂସ୍ଥା ଠିକ ଭାବେ ଲୋକଙ୍କୁ ସେବା ଯୋଗାଇ ପାରୁନଥିବା ଦେଖିବାକୁ ମିଳୁଛି। ବିଦ୍ୟୁତ୍ ବ୍ୟବସ୍ଥା ସମ୍ପର୍କରେ ବିଭାଗୀୟ ଯନ୍ତ୍ରୀ ମନରଞ୍ଜନ ମାର୍ଥାଙ୍କୁ ପଚାରିବାରୁ ସେ କହିଲେ, ବର୍ତ୍ତମାନ ସହରର ଅଧିକାଂଶ ସ୍ଥାନରେ ବିଦ୍ୟୁତ୍ ସ୍ବାଭାବିକ ହୋଇଛି। କିଛି ଅଞ୍ଚଳରେ ବିଦ୍ୟୁତ୍ ମରାମତି କାର୍ଯ୍ୟ ଚୂଡାନ୍ତ ପର୍ଯ୍ୟାୟରେ ପହଞ୍ଚତ୍ଛି। ଖୁବ୍ ଶୀଘ୍ର ସମସ୍ୟା ଦୂର ହେବ ବୋଲି ସେ କହିଥିଲେ।