ସୋନପୁର,୩।୮(ମୃତ୍ୟୁଞ୍ଜୟ ଶତପଥୀ): ଲଘୁଚାପଜନିତ ଲଗାଣ ବର୍ଷା ଯୋଗୁ ସୁବର୍ଣ୍ଣପୁର ସହର ସମେତ ସମଗ୍ର ଜିଲାରେ ପରିସ୍ଥିତି ବେହାଲ୍ ହୋଇପଡିଛି। ଲୋକେ ଘରୁ ବାହାରକୁ ଯାଇ ପାରୁନାହାନ୍ତି। ତଳିଆ ଅଞ୍ଚଳରେ ପାଣି ଜମି ରହିଛି। ସହରର ବିଭିନ୍ନ ଓ୍ବାର୍ଡରେ ଲୋକଙ୍କ ଘରେ ପାଣି ପଶିଛି। ପ୍ରାକୃତିକ ନାଳଗୁଡିକ ଜବରଦଖଲ କାରଣରୁ ବର୍ଷା ଜଳ ନିଷ୍କାସନ ଠିକ୍ ଭାବରେ ହୋଇପାରୁନି। ମ୍ୟୁନିସିପାଲିଟି ପକ୍ଷରୁ ଡ୍ରେନ୍ଗୁଡିକ ଠିକ୍ ଭାବେ ସଫେଇ ହୋଇ ନ ଥିବା କାରଣରୁ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଜିଲାରେ ଗତ ଶୁକ୍ରବାର, ଶନିବାର, ରବିବାର, ମଙ୍ଗଳବାର ଓ ବୁଧବାର ରେକର୍ଡ ପରିମାଣର ବର୍ଷା ହୋଇଥିବା ଜଣାପଡିଛି। ଗତ ୨୪ ଘଣ୍ଟା ମଧ୍ୟରେ ତମାମ ଜିଲାରେ ହାରାହାରି ୨୨୦.୧ ମିଲିମିଟର ବର୍ଷା ହୋଇଛି। ଖବର ଲେଖା ହେବା ବେଳକୁ ବୀରମହାରାଜପୁର ବ୍ଲକ ଅଞ୍ଚଳରେ ସର୍ବାଧିକ ୨୭୨.୪ ମିଲିମିଟର ବର୍ଷା ହୋଇଥିବା ରେକର୍ଡ ହୋଇଛି । ଲଗାଣ ବର୍ଷା ପାଇଁ ସୁବର୍ଣ୍ଣପୁର ଜିଲାପାଳ ବିମଳେନ୍ଦୁ ରାୟ ବୁଧବାର ଜିଲାର ସମସ୍ତ ସରକାରୀ ଓ ବେସରକାରୀ ସ୍କୁଲ ଛୁଟି ଘୋଷଣା କରିଥିଲେ। ତେବେ ସ୍କୁଲଗୁଡିକୁ ଏ ସମ୍ପର୍କିତ ନିର୍ଦ୍ଦେଶ ବିଳମ୍ବରେ ମିଳିଥିଲା। ସକାଳେ ଖୋଲା ଯାଉଥିବା କେତେକ ସ୍କୁଲର ଛାତ୍ରୀଛାତ୍ର ସ୍କୁଲକୁ ଯାଇ ପୁଣି ପୂର୍ବାହ୍ନରେ ଫେରିଥିଲେ। ବୀରମହାରାଜପୁର ବ୍ଲକର ବିଭିନ୍ନ ଗୁରୁତ୍ୱପୂର୍ଣ୍ଣ ରାସ୍ତା ଉପରେ ବନ୍ୟାଜଳ ପ୍ରଭାବିତ ହେଉଛି। ମହାନଦୀ, ତେଲନଦୀ ସମେତ ଜିଲାର ପ୍ରମୁଖ ନଦୀ ଓ ନାଳଗୁଡିକର ଜଳସ୍ତର ବୃଦ୍ଧି ପାଇବାରେ ଲାଗିଛି। ହୀରାକୁଦ୍ ଡ୍ୟାମ୍ର ଅଧିକ ସଂଖ୍ୟକ ଫାଟକରୁ ବନ୍ୟା ଜଳ ଛଡା ହେଲେ ନଦୀକୂଳିଆ ଲୋକଙ୍କ ପାଇଁ ବିପଦ ସୃଷ୍ଟି କରିବ। ବୁଧବାର ବିନିକା ସହର ୧୦ ନମ୍ବର ଓ୍ବାର୍ଡରେ ବନ୍ୟା ପାଣି ପ୍ରବେଶ କରିଛି। ସେହିପରି ସୁବର୍ଣ୍ଣପୁର ସହର ଆମ୍ବେଡକର ଛକରେ କଲଭର୍ଟ ଓ ଡ୍ରେନ୍ ଜବରଦଖଲ କାରଣ ରୁ ମୁଖ୍ୟରାସ୍ତା ଉପରେ ବର୍ଷା ଜଳ ପ୍ରବାହିତ ହେଉଛି।
୧ ନମ୍ବର ଓ୍ବାର୍ଡର ପ୍ରେସ କଲୋନି, ୨ ନମ୍ବର ଓ୍ବାର୍ଡର ଗୋକର୍ଣ୍ଣେଶ୍ୱର ପଡା, ମହାବୀର କଲେନୀ , ରାମଜୀ ନଗର, ମାଣିକେଶ୍ୱରୀ ମନ୍ଦିର ସମ୍ମୁଖ ଓ ଗ୍ରୀଡକୋ ଅଫିସ ସମ୍ମୁଖରେ ବର୍ଷା ଜଳ ରାସ୍ତାରେ ଜମି ରହିଛି। ବ୍ଲକ ଅଫିସ ଫାଟକ ସମ୍ମୁଖରେ ପାଣି ଜମି ରହିଛି। ଜିଲା ମୁଖ୍ୟ ଚିକିତ୍ସାଳୟ ପରିସରରେ ଥିବା ସରକାରୀ କ୍ୱାଟର୍ସରେ ଡ୍ରେନ୍ ପାଣି ପ୍ରବେଶ କରିଛି । ଡ୍ରେନେଜ୍ ସିଷ୍ଟମ ଠିକ୍ ନ ଥିବାରୁ ଏଭଳି ସମସ୍ୟା ସୃଷ୍ଟି ହୋଇଛି । ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
