ସୋନପୁର,୨୮।୮(ନି.ପ୍ର.)-ସୁବର୍ଣ୍ଣପୁର ଜିଲାରେ ଲଘୁଚାପ ଜନିତ ଲଗାଣ ବର୍ଷା ଜାରି ରହିଛି । ଜିଲାରେ ପ୍ରବାହିତ ମହାନଦୀ, ତେଲନଦୀ, ଅଙ୍ଗନଦୀ, ସୁକତେଲ, ନିବୃତ୍ତି ଯୋର ଓ ଅନ୍ୟ ଛୋଟ ବଡ ଯୋର ସବୁ ଫୁଲିବାରେ ଲାଗିଛି । ହୀରାକୁଦର ୧୬ଟି ଗେଟ୍ ଖୋଲିବା ଯୋଗୁ ମହାନଦୀର ଜଳସ୍ତର ବୃଦ୍ଧି ପାଇଛି । ଉଲୁଣ୍ଡା ବ୍ଲକର ବିଜେପୁର ଗାଁକୁ ଏବେ ମହାନଦୀର ପାଣି ଛୁଇଁଛି । ନଦୀକୂଳିଆବାସୀ ଏବେ ଆତଙ୍କିତ ଅବସ୍ଥାରେ ଅଛନ୍ତି। ତେବେ ସମସ୍ତ ନଦୀର ଜଳସ୍ତର ବିପଦ ସଙ୍କେତର ବହୁ ତଳେ ପ୍ରବାହିତ ହେଉଛି । ଆତଙ୍କିତ ହେବାର କୌଣସି କାରଣ ନାହିଁ ବୋଲି ଜଳସେଚନ ବିଭାଗ ପକ୍ଷରୁ କୁହାଯାଇଛି । ଅନ୍ୟପକ୍ଷେ ଅତ୍ୟଧିକ ବର୍ଷା ଯୋଗୁ ଜିଲାର ବିଭିନ୍ନ ଅଞ୍ଚଳରେ ଚାଷଜମି ଜଳମଗ୍ନ ହୋଇରହିଛି । କେତେକ ସ୍ଥାନରେ କଚ୍ଚାଘର କ୍ଷତିଗ୍ରସ୍ତ ହୋଇଛି । ବୀରମହାରାଜପୁର ବ୍ଲକ ରଣାପାଲି ମୌଜାର ଅଚ୍ୟୁତ ମହାପାତ୍ରଙ୍କ ଘର ଭାଙ୍ଗିଥିବା ଜଣାପଡିଛି । ସେହିପରି ବିନିକା ବ୍ଲକ ଗୁଲୁଣ୍ଡା ଗ୍ରାମର ହାଡି ମହାକୁରଙ୍କ ଘର କାନ୍ଥ ଭୁଶୁଡି ପଡିବାରୁ ୨ଟି ଗୋରୁଙ୍କ ମୃତ୍ୟୁ ଘଟିଛି । ଡ୍ରେନ୍ ସମସ୍ୟା ଯୋଗୁ ସହର ଓ ଗ୍ରାମାଞ୍ଚଳର ବିଭିନ୍ନ ସ୍ଥାନରେ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଡୁଙ୍ଗୁରିପାଲି ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟରେ ପାଣି ପଶିଛି । ବିନିକା ଡାକ୍ତରଖାନା ଓ ଥାନାରେ ମଧ୍ୟ ପାଣି ପଶିଥିଲା । ବରପାଲି-ରାମପୁର ରାସ୍ତାରେ ଥିବା ବାରଙ୍ଗପାଲି ରଞ୍ଜ ନଦୀ ପୋଲ ଉପରେ ପାଣି ଚାଲିଛି । ଫଳରେ ବରଗଡ ଓ ସୋନପୁର ରାସ୍ତାରେ ଯୋଗାଯୋଗ ବିଛିନ୍ନ ହୋଇଛି । ସେହିପରି ବିନିକା ବ୍ଲକ ଚୌକାମାଳ-ବାବୁପାଲି ରାସ୍ତାର ରପ୍ଟା ପୋଲ ଉପର ଦେଇ ୪ ଫୁଟ ଉଚ୍ଚରେ ଜଳ ପ୍ରବାହିତ ହେଉଛି । ଜିଲା ପ୍ରଶାସନ ପକ୍ଷରୁ ମିଳିଥିବା ସୂଚନା ମୁତାବକ ବୁଧବାର ସୁବର୍ଣ୍ଣପୁର ଜିଲାରେ ହାରାହାରି ୧୬୨.୨୮ମିମି ଓ ଗୁରୁବାର ହାରାହାରି ୬୬.୯୭ମିମି.ବର୍ଷା ହୋଇଥିବା ରେକର୍ଡ କରାଯାଇଛି । ବୁଧବାର ବିନିକାରେ ସର୍ବାଧିକ ୧୯୬.୪୦ମିମି. ଓ ଗୁରୁବାର ବୀରମହାରାଜପୁର ବ୍ଲକରେ ସର୍ବାଧିକ ୧୧୧.୨୦ମିମି ବର୍ଷା ହୋଇଛି । ଚଳିତ ମାସ ଜିଲାରେ ବର୍ତ୍ତମାନ ପର୍ଯ୍ୟନ୍ତ ୧୦୨୨.୬୯ମିମି. ବର୍ଷା ହୋଇଥିବା ରେକର୍ଡ ହୋଇଛି ।