![](https://www.dharitri.com/wp-content/uploads/2022/11/3-25.jpg)
ଆନନ୍ଦପୁର,୧୯।୧୧(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ବୈତରଣୀ ସେତୁ ଉପରେ ଭାରିଯାନ ଚଳାଚଳ ଉପରେ ରୋକ୍ ଲାଗିଛି। ଘଟଗାଁସ୍ଥିତ ରାସ୍ତା ଓ ଗୃହ ନିର୍ମାଣ ବିଭାଗ ସୁପରିଣ୍ଟେଣ୍ଡେଣ୍ଡ ଅଫ ଇଞ୍ଜିନିୟର୍ଙ୍କ ଚିଠି ନଂ. ୬୭୮୦/୧୪ ନଭେମ୍ବର ୨୦୨୨ରେ ଏ ଦିଗରେ ପଦକ୍ଷେପ ଗ୍ରହଣ କରିବାକୁ ଆନନ୍ଦପୁର ଉପଜିଲାପାଳଙ୍କୁ ଅବଗତ କରାଯାଇଛି। ଏହା ସହିତ କେନ୍ଦୁଝର ଜିଲାପାଳ, ଜିଲା ଆରକ୍ଷୀ ଅଧୀକ୍ଷକ, ଘସିପୁରା ଓ ଆନନ୍ଦପୁର ଥାନା ଅଧିକାରୀ, ଆନନ୍ଦପୁର ରାସ୍ତା ଓ ଗୃହ ନିର୍ମାଣ ବିଭାଗ ସହକାରୀ ନିର୍ବାହୀ ଯନ୍ତ୍ରୀ, ମୁଖ୍ୟ ନିର୍ମାଣ ଯନ୍ତ୍ରୀ ଏବଂ ମୁଖ୍ୟ ଯନ୍ତ୍ରୀ (ଡିପିଆଇ ଏଣ୍ଡ ରୋଡସ୍) ଓଡ଼ିଶାଙ୍କ ଅବଗତି ନିମନ୍ତେ ଜଣାଯାଇଛି।
ଆନନ୍ଦପୁର ବୈତରଣୀ ସେତୁର ୬ ନଂ. ପିଲାର ବ୍ୟାରିଂରେ ତ୍ରୁଟି ପରିଲକ୍ଷିତ ହେବାରୁ ସ୍ପାନ ଦବି ଦୁର୍ବଳ ଅବସ୍ଥାରେ ରହିଛି। ଏଥିରେ ଓଭର ଲୋଡ୍ ବାଲି ବୋଝେଇ ହାଇଓ୍ବା ସହିତ ଅନ୍ୟ ଭାରିଯାନ ଚଳାଚଳ ବୃଦ୍ଧି ପାଉଥିବାରୁ ଆଗକୁ ବିପଦ ଆଶଙ୍କା ରହିଥିବା ଚିଠିରେ ଦର୍ଶାଯାଇଛି। ଏହି କ୍ରମରେ ସେତୁର ମରାମତି କାର୍ଯ୍ୟ ଶେଷ ହେବା ପର୍ଯ୍ୟନ୍ତ ଉଭୟ ପାର୍ଶ୍ୱରେ ପ୍ରତିକାରମୂଳକ ପଦକ୍ଷେପ ଗ୍ରହଣ କରିବାକୁ ଆନନ୍ଦପୁର ଉପଜିଲାପାଳଙ୍କୁ କୁହାଯାଇଛି। ସୂଚନାଯୋଗ୍ୟ, ସେତୁର ସ୍ପାନ ଦବିବା ନେଇ ଅକ୍ଟୋବର ୨୨ ‘ଧରିତ୍ରୀ’ରେ ଖବର ପ୍ରକାଶ ପାଇଥିଲା। ପଦକ୍ଷେପ ଗ୍ରହଣ ପାଇଁ ଆନନ୍ଦପୁର ରାସ୍ତା ଓ ଗୃହ ନିର୍ମାଣ ବିଭାଗ ସହକାରୀ ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟ ଚିଠି ନଂ. ୮୦୮/୪ ନଭେମ୍ବର ୨୦୨୨ରେ ବିଭାଗୀୟ ଉପରିସ୍ଥ ଅଧିକାରୀଙ୍କୁ ଅବଗତ କରାଯାଇଥିଲା।