ଢେଙ୍କାନାଳ ଅଫିସ, ୨୨।୧୨ ମନୋମାଳିନ୍ୟ ଦୂରକରି ଦମ୍ପତିଙ୍କୁ ମିଶାଇବାକୁ ୨ଦିନ ଧରି ଯଥାସାଧ୍ୟ ପ୍ରୟାସ କଲା ପୋଲିସ। ହେଲେ ଦ୍ୱନ୍ଦ୍ୱ ଦୂର ହେଲାନି କି ବାହାରିଲାନି ସମାଧାନର ବାଟ। ଫଳରେ ମାଧବୀ ସୁନା ନିର୍ଯାତନା ମାମଲାରେ ଢେଙ୍କାନାଳ ଟାଉନ ଥାନା ପୋଲିସ ଅଟକ ସ୍ବାମୀ ତଥା ନଗର ଯୁବ ବିଜେଡି ଆଇଟି ସେଲ୍ ସଭାପତି ମହେନ୍ଦ୍ର ସାହୁଙ୍କୁ ଗିରଫ କରିଛି। ଏ ନେଇ ନଂ. ୫୩୪/୨୧, ଦଫା ୪୯୮(ଏ), ୩୨୩, ୨୯୪, ୩୫୪(ବି), ୫୦୬, ୩୪ ଓ ୩ ଏସ୍ସି/ଏସ୍ଟି ଆକ୍ଟରେ ମାମଲା ରୁଜୁ ହୋଇଛି।
ଅଭିଯୋଗ ଅନୁଯାୟୀ, ୧୯୯୫ରେ ମହେନ୍ଦ୍ର ବଲାଙ୍ଗୀରର ମାଧବୀଙ୍କୁ ପ୍ରେମ ବିବାହ କରିଥିଲେ। ତାଙ୍କର ଏକ ପୁତ୍ର ସନ୍ତାନ ରହିଛନ୍ତି। ବିବାହର ୨ବର୍ଷ ପରେ ଶାଶୁଘର ଲୋକେ ମାଧବୀଙ୍କୁ ଘରୁ ତଡ଼ି ଦେଇଥିଲେ। ସ୍ଥାନୀୟ ବାସିନ୍ଦାଙ୍କ ହସ୍ତକ୍ଷେପ ପରେ ସେ କିଛିଦିନ ଶାଶୁଘର ରହିଥିଲେ। ତେବେ ନିର୍ଯାତନା ଅସହ୍ୟ ହେବାରୁ ଶିଶୁପୁତ୍ରକୁ ଧରି ମାଧବୀ ବାପଘରକୁ ଚାଲିଯାଇଥିଲେ। ବଲାଙ୍ଗୀରରେ ଥିବାବେଳେ ମହେନ୍ଦ୍ର ତାଙ୍କ ସହିତ ଫୋନରେ ଯୋଗାଯୋଗ କରିବା ସହିତ ମିଶିବାକୁ ମଧ୍ୟ ଯାଉଥିଲେ। ବାପାଙ୍କ ଦେହାନ୍ତ ପରେ ତାଙ୍କୁ ଘରକୁ ଆଣିବାକୁ ପ୍ରତିଶ୍ରୁତି ଦେଇଥିଲେ। କିନ୍ତୁ ଏଥିରେ ବିଳମ୍ବ ହେବାରୁ ମାଧବୀ ନ୍ୟାୟ ପାଇଁ ନିଜର ୨୫ବର୍ଷର ପୁଅ ପ୍ରଦୀପଙ୍କ ସହିତ ୧୧ନଂ. ୱାର୍ଡ ଲକ୍ଷ୍ମୀବଜାର ମହ୍ଲାରସାହିସ୍ଥିତ ସ୍ବାମୀଙ୍କ ଘର ଆଗରେ ଧାରଣାରେ ବସିଥିଲେ। ଉଭୟଙ୍କୁ ମିଶାଇବାକୁ ଆଲୋଚନା କରାଯାଇଥିଲେ ମଧ୍ୟ ସୁଫଳ ମିଳି ନ ଥିଲା। ତେଣୁ ମହେନ୍ଦ୍ରଙ୍କୁ ଗିରଫ କରାଯାଇଥିବା ଏସ୍ପି ଏଲ୍. ଦିବ୍ୟା ଭି ସୂଚନା ଦେଇଛନ୍ତି।
ଅନ୍ୟପଟେ ସ୍ବେଚ୍ଛାସେବୀ ସଂସ୍ଥା ‘ମାନବିକ ଅଧିକାର ପରିଷଦ’ର ସଭାନେତ୍ରୀ ସସ୍ମିତା ଦାସଙ୍କ ନେତୃତ୍ୱରେ ଅନୁଷ୍ଠାନର ସଦସ୍ୟମାନେ ଅପରାହ୍ନରେ ଟାଉନ ଥାନାରେ ପହଞ୍ଚତ୍ ପୋଲିସ ଏବଂ ପୀଡ଼ିତା ମହିଳାଙ୍କ ସହିତ ଆଲୋଚନା କରିଛନ୍ତି। ମାଧବୀ ଏବଂ ପ୍ରଦୀପ ମହ୍ଲାରସାହିର ଏକ ଭଡ଼ାଘରେ ରହୁଥିବା ଜଣାପଡ଼ିଛି।