ବମ୍ବେ: ବଲିଉଡ୍ରେ ଆଇଟମ୍ ଗର୍ଲର ପରମ୍ପରା ବେଶ ପୁରୁଣା କହିଲେ ଚଳେ। ଅନେକ ନାୟିକା ଏଥିରେ ନାଚି ଦର୍ଶକଙ୍କୁ ମତୁଆଲା କରନ୍ତି। ହେଲେ ବଲିଉଡ୍ର ପ୍ରଥମ ଆଇଟମ୍ ଗର୍ଲ କିଏ ଜାଣନ୍ତି? ସେ ହେଲେ ହେଲେନ୍। ନିଜ ସମୟରେ ସେ ଏତେ ଚର୍ଚ୍ଚିତ ଥିଲେ ଯେ ତାଙ୍କ ନୃତ୍ୟ ଦେଖିବାକୁ ଦର୍ଶକେ ପାଗଳ ହୋଇଯାଉଥିଲେ। ୫୦ ଏବଂ ୬୦ ଦଶକରେ ସେ ଆଇଟମ୍ ଗୀତରେ ନାଚି ଲୋକପ୍ରିୟତାର ଶୀର୍ଷରେ ପହଞ୍ଚିଥିଲେ।
୧୯୩୮ ଆଜିର ଦିନରେ ମିଆଁମାରରେ ଜନ୍ମ ନେଇଥିଲେ ହେଲେନ। ତାଙ୍କର ଜୀବନ ବେଶ ସଂଘର୍ଷପୂର୍ଣ୍ଣ ଥିଲା। ବାପାଙ୍କୁ ହରାଇବା ପରେ ହେଲେନଙ୍କ ମା’ ଜଣେ ବ୍ରିଟିଶ ସୈନିକଙ୍କୁ ବିବାହ କରିଥିଲେ। ପରେ ତାଙ୍କ ପରିବାର କୋଲକାତା ଚାଲିଆସିଥିଲା। ଘରର ଖର୍ଚ୍ଚ ଉଠାଇବାକୁ ସେ ବ୍ୟାକ୍ଗ୍ରାଉଣ୍ଡ ଡ୍ୟାନ୍ସର ଭାବେ କାମ କରିଥିଲେ। ପରେ ସେ ଆଇଟମ୍ ଗର୍ଲ ଭାବେ ନାଁ କମାଇଥିଲେ। ୧୯୫୭ରେ ସେ ନିଜଠାରୁ ୨୭ ବର୍ଷ ବଡ଼ ନିର୍ଦ୍ଦେଶକ ପିଏନ୍ ଅରୋରାଙ୍କୁ ବିବାହ କରିଥିଲେ। ଏହି ବିବାହ ୧୮ ବର୍ଷ ଯାଏ ଚାଲିଥିଲା। ୧୯୭୪ରେ ସେ ପିଏନ୍ଙ୍କଠାରୁ ଛାଡ଼ପତ୍ର ନେଇଥିଲେ।
ପରେ ହେଲେନଙ୍କ ଜୀବନକୁ ଆସିଥିଲେ ଜଣାଶୁଣା ଲେଖକ ସଲିମ ଖାଁ। ସେ ହେଲେନଙ୍କ ସହାୟତା କରିବା ପରେ ତାଙ୍କୁ ପୁଣି କାମ ମିଳିଥିଲା। ‘ଡନ୍, ଦୋସ୍ତାନା, ଶୋଲେ’ ଭଳି ଚଳଚ୍ଚିତ୍ରରେ ସେ କାମ କରିଥିଲେ। ସେତେବେଳେ ହେଲେନଙ୍କ ସୁନ୍ଦରତା ସମସ୍ତଙ୍କୁ ବିମୋହିତ କରୁଥିଲା। ସଲିମ ମଧ୍ୟ ସେଥିରୁ ବର୍ତ୍ତି ପାରି ନ ଥିଲେ। ପୂର୍ବରୁ ବିବାହିତ ଏବଂ ୪ ସନ୍ତାନର ପିତା ଥିବା ସତ୍ତ୍ୱେ ହେଲେନଙ୍କୁ ସେ ଭଲପାଇ ବସିଥିଲେ। ୧୯୮୧ରେ ସବୁକିଛିକୁ ପଛରେ ପକାଇ ଉଭୟ ବିବାହ କରିଥିଲେ। ତେବେ ଆଜି ତାଙ୍କ ଜନ୍ମଦିନରେ ହେଲେନଙ୍କ ନିକଟକୁ ଶୁଭେଚ୍ଛାର ସୁଅ ଛୁଟୁଛି।
