ମୁମ୍ବାଇ, ୨୮।୬ : ମୁମ୍ବାଇ ନିକଟ ଆରବ ସାଗରର ବମ୍ବେ ହାଇ ନିକଟରେ ମଙ୍ଗଳବାର ଏକ ହେଲିକପ୍ଟରର ଜରୁରୀକାଳୀନ ଅବତରଣ କରାଯାଇଛି। ଏଥିରେ ୭ ଜଣ ଯାତ୍ରୀ ଏବଂ ଦୁଇଜଣ ପାଇଲଟ ଥିଲେ। କୋଷ୍ଟଗାର୍ଡ ଏବଂ କମ୍ପାନୀ ଦ୍ୱାରା ନଅ ଜଣଙ୍କୁ ଉଦ୍ଧାର କରାଯାଇଥିଲା॥
ସେମାନଙ୍କୁ ଚିକିତ୍ସାଲାଗି ନାନାବତୀ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେମାନଙ୍କ ମଧ୍ୟରୁ ୪ ଜଣଙ୍କ ମୃତ୍ୟୁ ହସ୍ପିଟାଲରେ ଘଟିଥିବାବେଳେ ଅନ୍ୟ ୫ ଜଣଙ୍କ ଚିକିତ୍ସା ଜାରି ରହିଛି। ମୃତକଙ୍କୁ ମୁକେଶ ପଟେଲ, ବିଜୟ ମଣ୍ଡଳୋଇ, ସତ୍ୟବନ୍ଦ ପାତ୍ର ଏବଂ ସଞ୍ଜୁ ଫ୍ରାନ୍ସସିସ୍ ଭାବେ ଚିହ୍ନଟ କରାଯାଇଛି।
ଏହି ଜରୁରୀକାଳୀନ ଅବତରଣ ଓଏନଜିସିର ରିଗ ସାଗର କିରଣ ନିକଟରେ କରାଯାଇଥିଲା। ହେଲିକପ୍ଟରଟି ମଧ୍ୟ ଓଏନଜିସିର ବୋଲି କୁହାଯାଉଛି। ତୈଳ ଏବଂ ପ୍ରାକୃତିକ ଗ୍ୟାସ ନିଗମ ଲିମିଟେଡ (ଓଏନଜିସି) ଟୁଇଟ କରି କହିଛି ଯେ ହେଲିକପ୍ଟରଟି ବମ୍ବେ ହାଇ ଠାରେ ଥିବା ତୈଳ ଖଣି ଅଞ୍ଚଳ ନିକଟରେ ଜରୁରୀକାଳୀନ ପରିସ୍ଥିତିରେ ଅବତରଣ କରିଛି।
ଇଣ୍ଡିଆନ କୋଷ୍ଟଗାର୍ଡଙ୍କ ଅନୁଯାୟୀ ଏହି ହେଲିକପ୍ଟରଟି ଓଏନଜିସିର। ଏହା ସାଗର କିରଣ ନିକଟ ଏକ ଖାଇରେ ଅବତରଣ କରିଥିଲା। ଉଦ୍ଧାର କାର୍ଯ୍ୟ ପାଇଁ ମୁମ୍ବାଇ ଉପକୂଳରୁ ଏକ ଜାହାଜ ଦୁର୍ଘଟଣାସ୍ଥଳକୁ ପଠାଯାଇଥିଲା । ହେଲିକପ୍ଟର ଚାଳକମାନଙ୍କୁ ଉଦ୍ଧାର କରିବା ପାଇଁ କୋଷ୍ଟଗାର୍ଡ ବିମାନ ଲାଇଫ ରାଫ୍ଟ ପକାଇଥିଲା। କୋଷ୍ଟଗାର୍ଡ ଉଦ୍ଧାର କାର୍ଯ୍ୟରେ ନୌସେନା ଏବଂ ଓଏନଜିସି ମଧ୍ୟରେ ସମନ୍ବୟ ରକ୍ଷା କରିଥିଲେ। କୋଷ୍ଟଗାର୍ଡର ଓଏସଭି ମାଲବ୍ୟ- ୧୬ କୁ ମଧ୍ୟ ଘଟଣାସ୍ଥଳକୁ ପଠାଯାଇଥିଲା ।
