କୋରାପୁଟ,୪ା୪(ସ୍ବ.ପ୍ର.): କୋରାପୁଟ ସଦର ଥାନା ଅନ୍ତର୍ଗତ ଏକଟାଗୁଡା ଗ୍ରାମ ନିକଟସ୍ଥ କାଜୁ ଜଙ୍ଗଲରୁ ରବିବାର ଏକ ନରକଙ୍କାଳ ମିଳିଛି। ଖବରପାଇ ଏସଡିପିଓ ମନୋଜ କୁମାର ପୂଜାରୀଙ୍କ ନେତୃତ୍ୱରେ ଏକ ଟିମ୍ ଘଟଣାସ୍ଥଳରେ ପହଞ୍ଚତ୍ ସେଠାରେ ପଡିଥିବା ନରକଙ୍କାଳକୁ ଜବତ କରି ଛାନଭିନ ଚଳାଇଛନ୍ତି। କଙ୍କାଳଟିରୁ ମୁଣ୍ଡ ଓ ହାତ ଛିଡିଯାଇ ଭିନ୍ନଭିନ୍ନ ସ୍ଥାନରେ ପଡିଥିବା ଦେଖିବାକୁ ମିଳିଛି। କାଜୁ ଜଙ୍ଗଲର ବିଭିନ୍ନ ସ୍ଥାନରେ ପୋଡାଜଳା ଚିହ୍ନ ମଧ୍ୟ ରହିଛି। ଘଟଣାସ୍ଥଳରେ ଏକ ଲାଲ ଗାମୁଛା ପଡିଥିବା ଜଣାପଡିଛି। ତେବେ ଉକ୍ତ କଙ୍କାଳ ମହିଳା ନା ପୁରୁଷର କିଛି ସ୍ପଷ୍ଟ ହୋଇନାହିଁ। ପ୍ରମାଣ ନଷ୍ଟ ପାଇଁ ହତ୍ୟା କରି ମୃତଦେହ ପୋଡ଼ି ଦେଇଥିବା ପୋଲିସ ସନ୍ଦେହ କରୁଛି। ତେବେ ତଦନ୍ତ ପରେ ପ୍ରକୃତ ଘଟଣା ସାମ୍ନାକୁ ଆସିବ ବୋଲି ଏସଡିପିଓ ପୂଜାରୀ କହିଛନ୍ତି।
