ଜେନାପୁର,୧୭।୪(ଡି.ଏନ.ଏ.): ଜେନାପୁର ଥାନା ଅଞ୍ଜିରା ପଞ୍ଚାୟତ ଅଧୀନ ମୁରାରିପୁର ଗ୍ରାମ ନିକଟରେ ଥିବା ମହିମା ଆଶ୍ରମ ବାଡ଼ିର ଏକ କେନ୍ଦୁଗଛରୁ ଶନିବାର ଅପରାହ୍ନରେ ମଣିଷର ଖପୁରି, କଙ୍କାଳ, ଚପଲ ଓ ପୋଷାକ ମିଳିଛି। ଏହାକୁ ପୋଲିସ ଜବତ କରି ତଦନ୍ତ ଚଳାଇଛି। ସୂଚନା ମୁତାବକ, ଅପରାହ୍ନରେ ମୁରାରିପୁର ଗ୍ରାମର କିଛି ପିଲା କେନ୍ଦୁ ଖାଇବାକୁ ସେଠାକୁ ଯାଇଥିଲେ। ଗଛରୁ କେନ୍ଦୁ ତୋଳିବା ସମୟରେ ଗଛରେ ଓହଳିଥିବା ରଶିରେ ଏକ ହାଡ଼ ଓ ତଳେ ପଡ଼ିଥିବା ଖପୁରି ସହ ଖଣ୍ଡବିଖଣ୍ଡିତ ହାଡ଼ ଦେଖିବାକୁ ପାଇଥିଲେ। ପିଲାମାନେ ଏସବୁ ଦୃଶ୍ୟ ହଠାତ୍ ଦେଖି ଚକିତ ହୋଇଯାଇଥିଲେ। ପରେ ଏ ସମ୍ପର୍କରେ ଗାଁକୁ ଆସି ପ୍ରକାଶ କରିବାରୁ ଏହା ଦେଖିବା ପାଇଁ ସେଠାରେ ଲୋକଙ୍କ ଭିଡ଼ ଜମିଥିଲା।
ପାଇ ଜେନାପୁର ଥାନାଧିକାରୀ ଉମାକାନ୍ତ ନାୟକଙ୍କ ନିର୍ଦ୍ଦେଶକ୍ରମେ ଏସ୍ଆଇ ବାସୁଦେବ ପରିଡ଼ା, ଏଏସ୍ଆଇ ମନୋରଞ୍ଜନ ସାମଲ ସଦଳବଳ ସେଠାରେ ପହଞ୍ଚତ୍ ସେସବୁକୁ ଜବତ କରିଥିଲେ। ଚପଲ ଓ ଡ୍ରେସ୍ରୁ ଏହା କୌଣସି ପୁରୁଷ କଙ୍କାଳ ବୋଲି ସନ୍ଦେହ କରାଯାଉଛି। ଘଟଣାଟି ଦୀର୍ଘଦିନ ପୂର୍ବରୁ ଘଟିଥିବା ପ୍ରତ୍ୟକ୍ଷଦର୍ଶୀମାନେ ସନ୍ଦେହ ପ୍ରକାଶ କରୁଛନ୍ତି। ତେବେ ଏହି ପୁରୁଷ କିଏ ଓ କାହିଁକି ତାଙ୍କର ମୃତ୍ୟୁ ହେଲା ତାହା ଚର୍ଚ୍ଚାର ବିଷୟ ହୋଇଛି। ଅନ୍ୟପକ୍ଷରେ କିଛି ମାସ ତଳେ ମୁରାରିପୁର ଗ୍ରାମର ଜଣେ ଯୁବକ ନିଖୋଜ ଥିବା ନେଇ ଥାନାରେ ଅଭିଯୋଗ ହୋଇଥିଲା। ଏ ପର୍ଯ୍ୟନ୍ତ ସମ୍ପୃକ୍ତ ଯୁବକଙ୍କ ପରିଚୟ ମିଳିପାରିନାହିଁ। ତେବେ ଜବତ କଙ୍କାଳ ତାଙ୍କର ହୋଇଥାଇ ପାରେ ବୋଲି ଅନୁମାନ କରାଯାଉଛି। ତେଣୁ ଜବତ କଙ୍କାଳ ଓ ଅନ୍ୟ ସାମଗ୍ରୀକୁ ପରୀକ୍ଷା କରି ପୋଲିସ ଏହାର ପର୍ଦ୍ଦାଫାଶ କରିବାକୁ ଅଞ୍ଚଳବାସୀ ଦାବି କରିଛନ୍ତି।
