ଅମରପାଲି,୧୦।୪(ଡି.ଏନ.ଏ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ଉଫୁଲା ଗ୍ରାମରେ ସରକାରୀ ଯୋଜନାରୁ ବାଦ ପଡି ଦୁର୍ବିସହ ଜୀବନ ଜିଉଁଥିବା ଭିନ୍ନକ୍ଷମ ଭଉଣୀ ଭାଇଙ୍କୁ ସହାୟତାର ହାତ ବଢାଇଛନ୍ତି ସ୍ଥାନୀୟ ସରପଞ୍ଚ। ଗତ ମାର୍ଚ୍ଚ ୧୯ତାରିଖରେ ଧରିତ୍ରୀରେ ’ଯୋଜନାରୁ ବଞ୍ଚିତ ଭିନ୍ନକ୍ଷମ ଭଉଣୀ ଭାଇ’ ଶୀର୍ଷକ ଏକ ଖବର ପ୍ରକାଶ ପାଇଥିଲା। ଉକ୍ତ ଖବର ପ୍ରକାଶ ପରେ ରବିବାର ସରପଞ୍ଚ ଶ୍ରୀୟା କର୍ମୀ ୱାର୍ଡସଭ୍ୟ ଅକ୍ଷୟ କୁରକୁରିଆ, ଶିବାନୀ ସାହୁ, ଗୌରହରୀ ସାହୁ ପ୍ରମୁଖଙ୍କ ସହ ଉକ୍ତ ଭିନ୍ନକ୍ଷମ ଭଉଣୀଭାଇଙ୍କ ଘରେ ପହଞ୍ଚିଲେ। ସମସ୍ୟା ବୁଝିବା ସହ ତାଙ୍କୁ ରାଶନ ସାମଗ୍ରୀ ଏବଂ କିଛଇ ଆର୍ଥିକ ସହାୟତା ପ୍ରଦାନ କରିଛନ୍ତି।
ବୀରମହାରାଜପୁର ଉପଖଣ୍ଡ ଉଫୁଲା ପଞ୍ଚାୟତର ସଦର ଗ୍ରାମର ଭିନ୍ନକ୍ଷମ ବିଦେଶି ସାହୁ(୪୦) ଓ ତାଙ୍କ ଭିନ୍ନକ୍ଷମ ଭଉଣୀ ପ୍ରମୋଦିନୀ ସାହୁ(୩୫) ଦୀର୍ଘଦିନ ହେଲା ଦୟନିୟ ଜୀବନ ଜିଉଁଛନ୍ତି। ବିଦେଶୀ ଶାରିରୀକ ଭାବେ ଦୁର୍ବଳ ଥିବା ବେଳେ ପ୍ରମୋଦିନୀ ମାନସିକ ଅନଗ୍ରସର। ପିଲାଦିନୁ ଉଭୟେ ବାପାଙ୍କୁ ହରାଇଥିବା ବେଳେ ବିଧବା ମା, ଭତ୍ତା, ରାଶନ ସହିତ ପର ଘରେ କାମ କରି ଉଭୟଙ୍କୁ ପାଳୁଥିଲେ। ମାତ୍ର କରୋନାରେ ଆକ୍ରାନ୍ତ ହୋଇ ତାଙ୍କର ମୃତ୍ୟୁ ଘଟିଥିଲା। ଫଳରେ ସେମାନେ ପାଉଥିବା ସମସ୍ତ ସରକାରୀ ଯୋଜନା ବନ୍ଦ ହୋଇଗଲା। ସରକାର କରୋନାରେ ମୃତକଙ୍କ ପରିବାରଙ୍କୁ ଆର୍ଥିକ ସହାୟତା ପ୍ରଦାନ କରୁଥିଲେ ମଧ୍ୟ ତାଙ୍କ ପରିବରକୁ କୌଣସି ସହୟତା ମିଳିନାହିଁ। ଉଭୟ ଭଉଣୀଭାଇଙ୍କ ଆଧାର କାର୍ଡ କି ଭିନ୍ନକ୍ଷମ କାର୍ଡ ନାହିଁ। ଫଳରେ ସେମାନେ କୌଣସି ସରକାରୀ ସହାୟତା ପାଇ ପାରୁ ନାହାନ୍ତି। ଉଭୟେ ଏକ ଭଙ୍ଗାଘରେ ରହୁଛନ୍ତି। ବିଦେଶୀ ଏକ ହୋଟେଲରେ ବାସନ ଧୋଇ ଯାହା ପାଆନ୍ତି ସେଥିରେ ଉଭୟେ ଚଳୁଛନ୍ତି। ସ୍ଥାନୀୟ ସରପଞ୍ଚ ପରବର୍ତ୍ତୀ ସମୟରେ ଅନ୍ୟନ୍ୟ ସହାୟତା ପ୍ରଦାନ କରିବାକୁ ପ୍ରତିଶ୍ରୁତି ଦେଇଛନ୍ତି।