ଭୋଗରାଇ, ୧୧।୧(ଡି.ଏନ.ଏ.) ତିନି ଓଳି ପେଟପୁରା ଖାଇବାକୁ ଦାନା ନାହିଁ, ଖଣ୍ଡେ ଭଲ ପିନ୍ଧିବା ପାଇଁ ବସ୍ତ୍ର ନାହିଁ କି ମୁଣ୍ଡ ଗୁଞ୍ଜିବା ପାଇଁ ଘରଟିଏ ନାହିଁ। ଏଭଳି ଦୟନୀୟ ଅବସ୍ଥାରେ କାଳାତିପାତ କରୁଛନ୍ତି ଏକ ଅସହାୟ ଦମ୍ପତି। କବାଟ ଝରକା ଲାଗି ନ ଥିବା ଏକ ଅଙ୍ଗନୱାଡ଼ି କେନ୍ଦ୍ର ପିଣ୍ଡାରେ ଶୀତୁଆ ରାତିରେ ସେମାନେ ବଞ୍ଚିବାକୁ ସଂଘର୍ଷ କରୁଛନ୍ତି। ଏଭଳି ଦୁଃଖଦ ଚିତ୍ର ସାମ୍ନାକୁ ଆସିଛି ବାଲେଶ୍ୱର ଜିଲା ଭୋଗରାଇ ବ୍ଲକ ଅଧୀନ ସୁନାଧରବସାଣ ପଞ୍ଚାୟତ ପଳାସିଆ ଗ୍ରାମରେ। ବୃଦ୍ଧ ଦମ୍ପତି ହେଲେ ୭୫ବର୍ଷୀୟା ଅନ୍ଧ ପାର୍ବତୀ ଜେନା ଓ ତାଙ୍କ ସ୍ବାମୀ ୮୦ ବର୍ଷୀୟ ଅକର୍ମଣ୍ୟ ଅମୂଲ୍ୟ ଜେନା ।
ଦମ୍ପତିଙ୍କର ସନ୍ତାନସନ୍ତତି ନ ଥିବାରୁ ବାର୍ଦ୍ଧକ୍ୟ ସେମାନଙ୍କ ସବୁ ସୁଖ ଛଡ଼ାଇ ନେଇଛି। ସେମାନଙ୍କର ସମ୍ପତ୍ତିବାଡ଼ି କିଛି ନ ଥିବା ବେଳେ କେବଳ ୨ ଡିସିମିଲି ଘରଡ଼ିହ ରହିଛି। ଏହି ଦୁଇ ଡିସିମିଲ ଜାଗା ଉପରେ ବହୁ ବର୍ଷ ପୂର୍ବେ ଇନ୍ଦିରା ଆବାସ ଯୋଜନାରେ ୧୪ହଜାର ଟଙ୍କାରେ ଘର ଖଣ୍ଡିଏ ମିଳିଥିଲା। ସେହି ଘର ଏବେ ବର୍ଷା ଓ ବାତ୍ୟାରେ ଭାଙ୍ଗିଯିବାରୁ ବୃଦ୍ଧା ଦମ୍ପତି ଘର ଛାଡ଼ି ଦିନ ବେଳା ରାସ୍ତାକଡରେ ଓ ରାତିରେ ନିର୍ମାଣଧୀନ ଅଙ୍ଗନୱାଡ଼ି କେନ୍ଦ୍ରରେ ଆଶ୍ରୟ ନେଉଛନ୍ତି। ଘର ଖଣ୍ଡିକ ମରାମତି ନିମନ୍ତେ ସେ ସ୍ଥାନୀୟ ସରପଞ୍ଚ ଓ ବ୍ଲକ ପ୍ରଶାସନକୁ ବାରମ୍ବାର ନେହୁରା ହେଉଥିଲେ ମଧ୍ୟ ତାଙ୍କ ଦୁଃଖ କେହି ଶୁଣୁନାହାନ୍ତି ବୋଲି ଦମ୍ପତି କୋହଭରା କଣ୍ଠରେ କହିଛନ୍ତି। ବୃଦ୍ଧା ପାର୍ବତୀଙ୍କ ଆଖିକୁ ଦିଶୁ ନ ଥିବା ବେଳେ ବୃଦ୍ଧ ଅମୂଲ୍ୟ ଅର୍କମଣ୍ୟ ହୋଇ ଚାଲିପାରୁ ନାହାନ୍ତି। ସରକାରଙ୍କ ପକ୍ଷରୁ ୫ କେଜି ଚାଉଳ ଓ ଯେଉଁ ଭତ୍ତା ମିଳୁଛି ତାହା ରୋଗ ପାଇଁ ଔଷଧ କିଣାରେ ଖର୍ଚ୍ଚ ହେଉଥିବାରୁ ସେମାନଙ୍କ ଚଳିବା ନିମନ୍ତେ କଷ୍ଟକର ହେଉଛି। ପରିଣତି ବୟସରେ ଆର୍ଥିକ ସହାୟତା ଯୋଗାଇ ଦେବାକୁ ସେମାନେ ନିବେଦନ କରିଛନ୍ତି।