ଛେଣ୍ଡିପଦା,୧୬ା୭(ସ୍ବ.ପ୍ର.) ଅନୁଗୋଳ ଜିଲା ଛେଣ୍ଡିପଦା ଥାନା ସପୋଇନାଳି ଗ୍ରାମର ଅଚ୍ୟୁତାନନ୍ଦ ବାଘ ଗତ ଗୁରୁବାର ବେକରେ ରଶି ଲାଗାଇ ଆତ୍ମହତ୍ୟା କରିବା ପରେ ତାଙ୍କ ପରିବାର ଅତ୍ୟନ୍ତ ଅସହାୟ ହୋଇପଡ଼ିଛନ୍ତି। ଦୁଇ ନାବାଳକ ପୁଅଙ୍କୁ କିପରି ପାଠ ପଢ଼ାଇ ମଣିଷ କରିବେ ଓ ଘରୋଇ ଅର୍ଥ ଲଗାଣକାରୀ ସଂସ୍ଥାର ଋଣ ପରିଶୋଧ କରିବେ, ସେ ନେଇ ପଦ୍ମିନୀ ଚିନ୍ତାଗ୍ରସ୍ତ ହୋଇପଡ଼ିଛନ୍ତି। ସ୍ଥିତି ଏତେ ଦୟନୀୟ ଯେ ପ୍ରଶାସନ କି ସରକାର ତାଙ୍କୁ ସହାୟତାର ହାତ ନ ବଢ଼ାଇଲେ ସ୍ବାମୀଙ୍କ ଶୁଦ୍ଧିକ୍ରିୟା କରିପାରିବେ ନାହିଁ ବୋଲି ପଦ୍ମିନୀ କୋହଭରା କଣ୍ଠରେ ପ୍ରକାଶ କରିଛନ୍ତି।
ପ୍ରକାଶ ଯେ, ୬ ମାସ ପୂର୍ବେ ଅଚ୍ୟୁତାନନ୍ଦ ଓ ତାଙ୍କ ସ୍ତ୍ରୀ ପଦ୍ମିନୀ ୨ଟି ଘରୋଇ ଅର୍ଥ ଲଗାଣକାରୀ ସଂସ୍ଥାରୁ ୪୦ ହଜାର ଟଙ୍କା ଲେଖାଏ ଋଣ ଆଣିଥିଲେ। ଉକ୍ତ ଅର୍ଥରେ ସେମାନେ ଚାଷ କାର୍ଯ୍ୟ କରିବା ସହିତ ବାପାଙ୍କ ଶୁଦ୍ଧିକ୍ରିୟା କରିଥିଲେ। ତେବେ ଋଣ ପରିଶୋଧ ବାବଦକୁ ତାଙ୍କୁ ମାସକୁ କିସ୍ତି ଆକାରରେ ୪୨୫୦ ଓ ୩୨୦୦ ଟଙ୍କା ଦେବାର ଥିଲା। ଗୋଟିଏ ସଂସ୍ଥାକୁ ସେ ୩ଟି କିସ୍ତିରେ ୧୨ ହଜାର ୭୫୦ ଟଙ୍କା ଶୁଝିଥିବା ବେଳେ ଅନ୍ୟ ଏକ ସଂସ୍ଥାର କିସ୍ତି ଆଦୌ ଦେଇପାରି ନ ଥିଲେ। ଫଳରେ ଋଣ ଟଙ୍କା ଶୁଝିବା ପାଇଁ ଅର୍ଥ ଲଗାଣକାରୀ ସଂସ୍ଥା ପକ୍ଷରୁ ଚାପ ବଢ଼ିଚାଲିଥିଲା। ଏହାକୁ ନେଇ ପରିବାର ମଧ୍ୟରେ ଅଶାନ୍ତି ଦେଖାଦେଇଥିଲା। ଗୁରୁବାର ସକାଳୁ ଋଣ ଟଙ୍କା ଶୁଝିବାକୁ ପଦ୍ମିନୀ କହିବାରୁ ସ୍ବାମୀ ଅଚ୍ୟୁତାନନ୍ଦଙ୍କୁ ଟଙ୍କା ଆଣିବାକୁ ଯାଉଛି କହି ଘରୁ ବାହାରି ଯାଇଥିଲେ ହେଁ ଫେରି ନ ଥିଲେ। କାଠପାଳ ଗ୍ରାମ ଉପର କୋଡାସାହି ନିକଟ କାଜୁ ଗଛରେ ତାଙ୍କ ମୃତଦେହ ଝୁଲୁଥିବା ଦେଖି ଗ୍ରାମବାସୀ ପଦ୍ମିନୀଙ୍କୁ ଖବର ଦେଇଥିଲେ। ଅଚ୍ୟୁତାନନ୍ଦଙ୍କ ମୃତ୍ୟୁ ପରେ ତାଙ୍କ ପରିବାର ସମ୍ପୂର୍ଣ୍ଣ ବେସାହାରା ହୋଇପଡ଼ିଥିବା ପଦ୍ମିନୀ ପ୍ରକାଶ କରିଛନ୍ତି। ଏ ସମ୍ପର୍କରେ ଛେଣ୍ଡିପଦା ବିଡିଓ ସଞ୍ଜୟ କୁମାର ଆଚାର୍ଯ୍ୟ କହିଛନ୍ତି, ସରକାରଙ୍କ ହରିଶ୍ଚନ୍ଦ୍ର ଯୋଜନାରେ ସହାୟତା ତାଙ୍କୁ ପ୍ରଦାନ କରାଯିବ। ତଦନ୍ତ କରାଯିବା ପରେ ଅଧିକ ସହାୟତା କରାଯାଇପାରିବ।