ରାଞ୍ଚି,୭।୨: ମନି ଲଣ୍ଡରିଂ ମାମଲାରେ ଜେଲରେ ଥିବା ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଆଜି ୧୮ ତମ ବିବାହ ବାର୍ଷିକୀ। ଏହି ଅବସରରେ ତାଙ୍କ ପତ୍ନୀ କଳ୍ପନା ସୋରେନ ଏକ ଭାବପ୍ରବଣ ପୋଷ୍ଟ କରି ବିଶ୍ୱାସ ରଖିଛନ୍ତି ଯେ, ସେ ଶୀଘ୍ର ଘରକୁ ଫେରିବେ। କଳ୍ପନା ଏକ୍ସରେ ଲେଖିଛନ୍ତି ଯେ, ହେମନ୍ତ ସୋରେନ ଏହି ବିଶେଷ ଦିନରେ ତାଙ୍କ ପରିବାର ସହିତ ନାହାଁନ୍ତି। ସେ ନିଶ୍ଚିତ ଯେ ସେ ଶୀଘ୍ର ଏହି ଷଡଯନ୍ତ୍ରକୁ ପରାସ୍ତ କରି ଘରକୁ ଫେରିବେ। ସୂଚନାଯୋଗ୍ୟ, ଅର୍ଥ ହେରଫେର ମାମଲାରେ ହେମନ୍ତ ସୋରେନଙ୍କୁ ଇଡି ଗିରଫ କରିଛି। ସେ ଗତ ଏକ ସପ୍ତାହ ହେଲା ଜେଲରେ ଅଛନ୍ତି।
କଳ୍ପନା ଲେଖିଛନ୍ତି, ଆଜି ଆମର ୧୮ ତମ ବିବାହ ବାର୍ଷିକୀ, କିନ୍ତୁ ହେମନ୍ତ ଜୀ ତାଙ୍କ ପରିବାର ମଧ୍ୟରେ ନାହାଁନ୍ତି ଏବଂ ତାଙ୍କ ପିଲାମାନଙ୍କ ସହ ନାହାଁନ୍ତି। ମୁଁ ନିଶ୍ଚିତ ଯେ ସେ ଏହି ଷଡଯନ୍ତ୍ରକୁ ପରାସ୍ତ କରି ବିଜେତା ହେବେ ଏବଂ ଶୀଘ୍ର ଆମ ସମସ୍ତଙ୍କ ସହ ରହିବେ। ମୁଁ ଜଣେ ଝାଡଖଣ୍ଡ ଯୋଦ୍ଧାଙ୍କର ଜୀବନ ସାଥୀ ଅଟେ। ମୁଁ ଆଜି ଭାବପ୍ରବଣ ହେବି ନାହିଁ। ହେମନ୍ତ ଜୀଙ୍କ ପରି ମୁଁ ମଧ୍ୟ କଠିନ ପରିସ୍ଥିତିରେ ହସିବି ଏବଂ ତାଙ୍କ ସାହସ ଏବଂ ସଂଗ୍ରାମର ଶକ୍ତି ହେବି।
