ରାଞ୍ଚି,୩।୫: ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଝାଡ଼ଖଣ୍ଡ ହାଇକୋର୍ଟରୁ ଏକ ବଡ଼ ଝଟ୍କା ଲାଗିଛି। ହେମନ୍ତ ସୋରେନଙ୍କ ଗିରଫଦାରୀକୁ ଚ୍ୟାଲେଞ୍ଜ କରି ଏହି ଆବେଦନକୁ କୋର୍ଟ ପ୍ରତ୍ୟାଖ୍ୟାନ କରିଛନ୍ତି। ମଧ୍ୟବର୍ତ୍ତୀକାଳୀନ ଜାମିନ ଆବେଦନକୁ ମଧ୍ୟ ପ୍ରତ୍ୟାଖ୍ୟାନ କରାଯାଇଛି। ହାଇକୋର୍ଟର କାର୍ଯ୍ୟକାରୀ ବିଚାରପତି ତଥା ଜଷ୍ଟିସ ନବନୀତ କୁମାରଙ୍କ ଡିଭିଜନ ବେଞ୍ଚ ଶୁଣାଣି ଶେଷ ହେବା ପରେ ଫେବୃଆରୀ ୨୮ରେ ଏହି ରାୟ ସଂରକ୍ଷିତ ରଖିଥିଲେ।
ହେମନ୍ତ ସୋରେନଙ୍କୁ ମଧ୍ୟ କୋର୍ଟରୁ କିଛି ଆଶ୍ୱସ୍ତି ମିଳିଛି। ତାଙ୍କୁ ମେ’ ୬ରେ ମାମୁଁଙ୍କ ଶ୍ରାଦ୍ଧ କାର୍ଯ୍ୟକ୍ରମରେ ଭାଗ ନେବାକୁ ଅନୁମତି ଦିଆଯାଇଛି। ତେବେ ଗଣମାଧ୍ୟମଠାରୁ ଦୂରରେ ରହିବାକୁ ସୋରେନଙ୍କୁ ନିର୍ଦ୍ଦେଶ ଦିଆଯାଇଥିଲା।
ହେମନ୍ତ ସୋରେନଙ୍କ ତରଫରୁ ଦାଖଲ ହୋଇଥିବା ଆବେଦନରେ କୁହାଯାଇଛି ଯେ ଯେଉଁ ଜମି ବିଷୟରେ ଇଡି କହୁଛନ୍ତି ତାହା ତାଙ୍କ ନାମରେ ନାହିଁ। ଏହି ରାୟ ଦେବାରେ ବିଳମ୍ବ ହେତୁ ହେମନ୍ତ ସୋରେନଙ୍କ ନାମରେ ସୁପ୍ରିମକୋର୍ଟରେ ଏକ ପିଟିସନ ମଧ୍ୟ ଦାଖଲ କରାଯାଇଥିଲା ଯାହା ଆସନ୍ତା ୬ରେ ଶୁଣାଣି ହେବ।
ଏହାପୂର୍ବରୁ, ସୋରେନ ୨୭ ଏପ୍ରିଲରେ ଏକ ଶକ୍ତ ଧକ୍କା ପାଇଥିଲେ। ରାଞ୍ଚିର ସ୍ବତନ୍ତ୍ର ପିଏମଏଲଏ କୋର୍ଟ ତାଙ୍କୁ ଜମି ସ୍କାମ ମାମଲାରେ ମଧ୍ୟବର୍ତ୍ତୀକାଳୀନ ଜାମିନ ଦେବାକୁ ମନା କରିଦେଇଥିଲେ। ସୂଚନାଯୋଗ୍ୟ, ହେମନ୍ତ ସୋରେନଙ୍କ ପିତା ତଥା ଜେଏମଏମ ସୁପ୍ରିମୋ ଶିବୁ ସୋରେନଙ୍କ ଭାଇ ରାମ ସୋରେନଙ୍କର ଶନିବାର ସକାଳେ ଦେହାନ୍ତ ହୋଇଛି। ସେ ଦୀର୍ଘ ସମୟ ଧରି ଅସୁସ୍ଥ ଥିଲେ। ତାଙ୍କ ମାମୁଁଙ୍କ ଅନ୍ତିମ ସଂସ୍କାରରେ ଯୋଗଦେବା ପାଇଁ ସୋରେନ ୧୩ ଦିନ କୋର୍ଟରୁ ମଧ୍ୟବର୍ତ୍ତୀକାଳୀନ ଜାମିନ ମାଗିଥିଲେ। ତେବେ ଶୁଣାଣି ସମୟରେ କୋର୍ଟ ତାଙ୍କୁ ଜାମିନ ଦେବାକୁ ମନା କରିଦେଇଥିଲେ।