ମହାକାଳପଡା,୨୧ା୧୦(ଡି.ଏନ.ଏ.):ବଙ୍ଗୋପସାଗରରେ ଲଘୁଚାପଜନିତ ପ୍ରଭାବ ଓ ବାତ୍ୟାକୁ ମୁକାବିଲା ପାଇଁ ସରକାର ପଦକ୍ଷେପ ଗ୍ରହଣ କରିଛନ୍ତି। କେନ୍ଦ୍ରାପଡ଼ା ଜିଲା ବାତ୍ୟାପ୍ରବଣ ଅଞ୍ଚଳ ହୋଇଥିବାରୁ ଜିଲା ପ୍ରଶାସନ ଉପକୂଳ ତଳିଆ ଅଞ୍ଚଳର ବାସିନ୍ଦାମାନଙ୍କ ପାଇଁ ସତର୍କତାମୂଳକ ପଦକ୍ଷେପ ଗ୍ରହଣ କରିଛନ୍ତି। ସେହିପରି ମହାକାଳପଡ଼ା ବ୍ଲକ ଉପକୂଳ ଅଞ୍ଚଳ ବାତ୍ୟାକୁ ନେଇ ଅଞ୍ଚଳବାସୀଙ୍କ ଭୟ ଥିଲେ ମଧ୍ୟ ସମୁଦ୍ର ପାର୍ଶ୍ୱରେ ବିସ୍ତୀର୍ଣ୍ଣ ହେନ୍ତାଳ ବଣ ଓ ଲୁଣା ଜଙ୍ଗଲ ଯୋଗୁ ବାତ୍ୟାର ପ୍ରଭାବ କମ୍ ରହିବ ବୋଲି ସ୍ଥାନୀୟ ଲୋକେ କହିଛନ୍ତି। ବିଶେଷକରି ୧୯୯୯ ମହାବାତ୍ୟାକୁ ଏହି ଅଞ୍ଚଳବାସୀ ସାମ୍ନା କରିଥିଲା। ବ୍ଲକର ଜମ୍ବୁ ପଞ୍ଚାୟତ ବଙ୍ଗୋପସାଗର ତଟରେ ଅବସ୍ଥିତ ଲୁଣା ଓ ହେନ୍ତାଳ ଜଙ୍ଗଲଘେରା ଗ୍ରାମ କଣ୍ଡରା ପାଟିଆ। ଏହି ଗ୍ରାମରେ ୧୦୦ ପରିବାରର ୫୦୦ରୁ ଊର୍ଦ୍ଧ୍ୱ ଜନସଂଖ୍ୟା। ଏହି ଗ୍ରାମର ଅନେକ ବୟସ୍କମାନଙ୍କୁ ପଚାରିବାରୁ କୁହନ୍ତି, ୧୯୯୯ ମହାବାତ୍ୟା ସମୟରେ ଆମକୁ ସମୁଦ୍ରର କରାଳ ଦୃଶ୍ୟକୁ ଏହି ବିଶାଳ ଜଙ୍ଗଲ ରକ୍ଷା କରିଥିଲା। ଜୀବନରେ ଅନେକ ସାମୁଦ୍ରିକ ଝଡ ତୋଫାନକୁ ସାମ୍ନା କରିଥିଲେ ମଧ୍ୟ ଏହି ଦୀପାବଳିରେ ଯେଉଁ ବାତ୍ୟା ହେବ ବୋଲି ପ୍ରଶାସନ ପକ୍ଷରୁ ଘୋଷଣା କରାଯାଇଛି ଆମେ ନିଶ୍ଚିତ ସଚେତନ ହେବୁ। ହେଲେ ଆମ ଗଁା ଜଙ୍ଗଲ ଅଛି, ସେ ହଁି ଆମର ବଡ଼ ବଳ ବୋଲି କହିଛନ୍ତି ସୁବିମଲ ଦଣ୍ଡପାଟ, ମନ୍ତୁ ମଣ୍ଡଳ, ଶ୍ରୀପତି ମଜୁମଦାର, ବାସୁ ମଜୁମଦାର, ହୃଷୀକେଶ ଗିରି, ମହାଦେବ ମଣ୍ଡଳ, ଅମଲ ସରକାର। ବାତ୍ୟା ହେଲେ ସାମୁଦ୍ରିକ ଲୁଣା ପାଣି ଆମ ଜମିରେ ପ୍ରବେଶ କରି ଫସଲ ନଷ୍ଟ ହୋଇଯିବା ଆଶଙ୍କା ରହିଛି ବୋଲି ଗ୍ରାମବାସୀ କହିଛନ୍ତି। ପୂର୍ବାପେକ୍ଷା ପ୍ରଶାସନ ପକ୍ଷରୁ ସହାୟତା ଯୋଗାଇ ଦିଆଯାଉଛି। ସେହିପରି ବ୍ଲକର ବହୁ ମତ୍ସ୍ୟଜୀବୀ ସମୁଦ୍ରକୁ ମାଛ ମାରିବାକୁ ଯାଆନ୍ତି। ପ୍ରଶାସନ ପକ୍ଷରୁ ସମୁଦ୍ରକୁ ଯିବାକୁ ବାରଣ କରାଯାଇଛି। ଫଳରେ କେତେଜଣ ମତ୍ସ୍ୟଜୀବୀ ଜାଲ ଡଙ୍ଗା ଧରି ସମୁଦ୍ରରୁ କୂଳକୁ ଫେରୁଥିବା ଦେଖିବାକୁ ମିଳିଛି। ଅପରପକ୍ଷରେ ବ୍ଲକ ପ୍ରଶାସନ ପକ୍ଷରୁ ସମୁଦ୍ରକୂଳବର୍ତ୍ତୀ ବାସିନ୍ଦାମାନଙ୍କୁ ନୀଚା ସ୍ଥାନ ଛାଡି ଉଚ୍ଚ ଜାଗାକୁ ଆସି ସୁରକ୍ଷିତ ଭାବେ ରହିବାକୁ କୁହାଯାଇଛି। ସମ୍ଭାବ୍ୟ ବାତ୍ୟା ଆଶଙ୍କା କରି ସ୍ଥାନୀୟ ବାତ୍ୟା ଆଶ୍ରୟସ୍ଥଳଗୁଡ଼ିକୁ ଖାଲି କରିବା ସହ ଆବଶ୍ୟକ ଅନୁସାରେ ପାନୀୟ ଜଳ ଯୋଗାଣକୁ ଗୁରୁତ୍ୱ ଦିଆଯାଇଛି। ସମସ୍ତ ଜନପ୍ରତିନିଧି, ମହିଳା ସଙ୍ଗଠନ, ସ୍ବାସ୍ଥ୍ୟ କର୍ମଚାରୀ, ଆଶା, ଅଙ୍ଗନୱାଡି କର୍ମୀମାନେ ସହଯୋଗ କରିବାକୁ ପ୍ରଶାସନ ପକ୍ଷରୁ କୁହାଯାଇଛି। ବ୍ଲକର ବତିଘର, ଖରିନାସୀ, ରାମନଗର, ଜମ୍ବୁ, ବଉଳକଣି, ସୁନିତି, ନାଞ୍ଜୁରା, ପେଟ୍ଛେଲା ପଞ୍ଚାୟତ ଆଦି ସମେତ ଅନ୍ୟ ତଳିଆ ଅଞ୍ଚଳରେ ପ୍ରଶାସନ ସତର୍କ ଦୃଷ୍ଟି ରଖିଛି ବୋଲି କୁହାଯାଇଛି।