ଲକ୍ଷ୍ନୌ,୪ା୭: ଉତ୍ତରପ୍ରଦେଶର ଇଟାଓ୍ବା ଜିଲାରୁ ଚକିତ କରିଦେବା ପରି ଏକ ଘଟଣା ସାମ୍ନାକୁ ଆସିଛି। ଶ୍ୱଶୁର ଘରକୁ ଆସି ସ୍ତ୍ରୀଙ୍କୁ ଘରେ ନ ଦେଖିବାରୁ ଶାଶୁ-ଶ୍ୱଶୁରଙ୍କ ଉପରେ ଶୁଝାଇଲେ ରାଗ। ଶାଶୁ ଏବଂ ଶ୍ୱଶୁରଙ୍କୁ କଟୁରିରେ ଆକ୍ରମଣ କରିଛନ୍ତି ଜ୍ୱାଇଁ। ଫଳରେ ଦୁଇଜଣ ଗୁରୁତର ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି। ଏପଟେ ଅଭିଯୁକ୍ତ ଫେରାର ହୋଇଯାଇଛନ୍ତି।
ଇଟାଓ୍ବା ସହର ନିକଟ ଥାନା ସିଭିଲ ଲାଇନ ଅନ୍ତର୍ଗତ ପାହାଡ଼ପୁର ଗାଁରେ ବାରେଲାଲ ରାଜପୁତ ଏବଂ ତାଙ୍କ ସ୍ତ୍ରୀ ଭୂରା ଦେବୀ ପରିବାର ସହ ରୁହନ୍ତି। ତାଙ୍କର ଦୁଇ ଝିଅ। ବଡ଼ ଝିଅ ପ୍ରୀତି ଏବଂ ସାନ ଝିଅ ଶ୍ରୁତି। ବଡ଼ଝିଅ ପ୍ରୀତିଙ୍କ ଶାଶୁଘର ପଛାୟା ଗାଁରେ ଏବଂ ସାନ ଝିଅଙ୍କ ଶାଶୁଘର ଉନାବରେ।
ବାରେଲାଲଙ୍କ ସାନ ଜ୍ୱାଇଁ କମଲେଶଙ୍କୁ ତାଙ୍କ ପରିବାର ଲୋକେ ଘରୁ ବାହାର କରିଦେଇଥିଲେ। ସେ ତାଙ୍କ ସ୍ତ୍ରୀ ଶ୍ରୁତିଙ୍କୁ ନେଇ ଶ୍ୱଶୁର ଘରେ ରହୁଥିଲେ। ତାଙ୍କର ଅଢ଼େଇ ବର୍ଷର ଏକ ପୁଅ ମଧ୍ୟ ଅଛି। କମଲେଶ ଶ୍ରମିକ କାମ କରି ପରିବାର ପୋଷଣ କରନ୍ତି।
ଶନିବାର କମଲେଶ କାମ କରିବାକୁ ବାହାରକୁ ଯାଇଥିଲେ। ଫେରି ଦେଖିଲାବେଳକୁ ସ୍ତ୍ରୀ ଶ୍ରୁତି ଘରେ ନ ଥିଲେ। ପରେ ଜାଣିବାକୁ ପାଇଲେ ସେ ତାଙ୍କ ଭିଣୋଇ ଘରକୁ ଯାଇଛନ୍ତି। ଏଥିରେ ଉତ୍କ୍ଷିପ୍ତ ହୋଇଉଠିଥିଲେ କମଲେଶ। ସେ ଶାଶୁ ଏବଂ ଶ୍ୱଶୁରଙ୍କୁ ଏକ କଟୁରିରେ ଆକ୍ରମଣ କରିଥିଲେ। ଫଳରେ ଦୁଇଜଣ ଗୁରୁତର ହୋଇ ବର୍ତ୍ତମାନ ହସ୍ପିଟାଲରେ ଚିକିତ୍ସିତ ହେଉଛନ୍ତି। ଅନ୍ୟପକ୍ଷରେ କମଲେଶ ଘଟଣା ପରଠାରୁ କେଉଁଆଡ଼େ ଫେରାର ହୋଇଯାଇଛନ୍ତି। ପୋଲିସ ଅଭିଯୁକ୍ତଙ୍କୁ ଧରିବା ପାଇଁ ବିଭିନ୍ନ ଆଡ଼େ ଚଢ଼ାଉ ଜାରି ରଖିଛି।