ଭୁବନେଶ୍ୱର,୨୫ା୧୧(ବ୍ୟୁରୋ): ନିଜ ସମ୍ପର୍କରେ ମିଛ କଥା କହି ବିବାହ କରୁଥିଲେ। ମିଛ ପ୍ରତିଶ୍ରୁତି ଦେଇ ସମସ୍ତ ସମ୍ପତ୍ତି ଲୁଟିନେବା ପରେ ଆଉଜଣଙ୍କୁ ସ୍ତ୍ରୀ କରୁଥିଲେ। ଏମିତି ୩ଜଣଙ୍କୁ ବିବାହ କରିଥିବା ସ୍ବାମୀଙ୍କୁ ଶେଷରେ ଥାନାରେ ହଟହଟା ହେବାକୁ ପଡିଛି। ଗଣମାଧ୍ୟମକୁ ପ୍ରତ୍ରିକ୍ରିୟା ଦେଉଥିବାବେଳେ ଦୁଇଜଣ ସ୍ତ୍ରୀ ତାଙ୍କୁ ମାଡ଼ମାରିବାକୁ ଉଦ୍ୟମ କରିବା ସହ ଟଣାଓଟରା ଓ ଠେଲାପେଲା କରିଛନ୍ତି। ବୁଧବାର ମଞ୍ଚେଶ୍ୱର ଥାନାରେ ଘଟିଥିବା ଏହି ଘଟଣାର ଭିଡିଓ ଏବେ ଭାଇରାଲ ହେବାରେ ଲାଗିଛି। ପ୍ରଥମ ଓ ଦ୍ୱିତୀୟ ସ୍ତ୍ରୀଙ୍କ ଅଭିଯୋଗକ୍ରମେ ପୋଲିସ ୨ଟି ପୃଥକ ମାମଲା (ନଂ. ୩୮୪, ୩୮୫/୨୧) ରୁଜୁ କରିବା ସହ ଅଭିଯୁକ୍ତ ସ୍ବାମୀଙ୍କୁ ଗିରଫ କରିଛି। ସେ ହେଲେ ଖୋର୍ଦ୍ଧା ଜିଲା ବାଣପୁର ଥାନା ଦତ୍ତପୁର ଗ୍ରାମର ଆଲୋକ ଜେନା। ତାଙ୍କୁ ଗୁରୁବାର କୋର୍ଟ ଚାଲାଣ କରାଯିବ ବୋଲି ମଞ୍ଚେଶ୍ୱର ଥାନା ଅଧିକାରୀ ସୁଧୀର କୁମାର ସାହୁ କହିଛନ୍ତି।
ସୂଚନା ଅନୁଯାୟୀ, ଅଭିଯୁକ୍ତ ଆଲୋକ ୧୪ବର୍ଷ ତଳେ ରସୁଲଗଡରେ ରୀନା ଜେନାଙ୍କୁ ବିବାହ କରି ତାଙ୍କ ଘରେ ରହିଥିଲେ। କିଛିଦିନ ପରେ ସେମାନେ ପଳାଶୁଣୀରେ ଆସି ରହିଥିଲେ। ହେଲେ ସ୍ବାମୀ ଆଲୋକ ନିର୍ଯାତନା ଦେବାରୁ ରୀନା ତାଙ୍କ ବାପଘରକୁ ଚାଲି ଆସିଥିଲେ। ପୁଣି କିଛିଦିନ ପରେ ଆଲୋକ ତାଙ୍କ ପାଖରେ ଆସି ରହିଥିଲେ। ସ୍ବାମୀଙ୍କୁ ରୋଜଗାରକ୍ଷମ କରିବା ପାଇଁ ରୀନା ଋଣ କରି ତାଙ୍କୁ ଅଟୋ ଓ କାର୍ କିଣାଇ ଦେଇଥିଲେ। ଉଭୟଙ୍କର ୨ଟି ପୁଅ ମଧ୍ୟ ଥିଲା। ୭ ବର୍ଷ ପରେ ଆଲୋକ ରୀନାଙ୍କୁ ଛାଡି ଚନ୍ଦ୍ରଶେଖରପୁର ଥାନା ନିଳାଦ୍ରୀବିହାରର ଅନୀତା ସେଠୀଙ୍କୁ ବିବାହ କରିଥିଲେ। ସେହି ସମୟରେ ଆଲୋକ ପ୍ରଥମ ସ୍ତ୍ରୀଙ୍କୁ ଛାଡପତ୍ର ଦେଇଥିବା ମିଛରେ କହିଥିଲେ। ସେମାନେ ୫ବର୍ଷ ହେଲା ସାଲିଆ ସାହିରେ ରହିଥିଲେ। ଗତ ଅକ୍ଟୋବରରେ ସେ ତାଙ୍କଠୁ ଗାଡି ସମେତ ସୁନାଗହଣା ନେଇ ଛାଡି ପଳାଇଥିଲେ। ସେ ଆଉ ଜଣେ ଝିଅକୁ ବିବାହ କରି ସତ୍ୟବିହାରସ୍ଥିତ ତାଙ୍କ ଭଉଣୀଘରେ ରହୁଥିଲେ। ଏନେଇ ପ୍ରଥମ ଓ ଦ୍ୱିତୀୟ ସ୍ତ୍ରୀ ଜାଣିବା ପରେ ତାଙ୍କ ମଧ୍ୟରେ କଳି ଝଗଡା ହୋଇଥିଲା। ଅନୀତା ମହିଳା ସଂଘ କର୍ମକର୍ତ୍ତାଙ୍କ ସହ ବୁଧବାର ଏନେଇ ଥାନାରେ ଅଭିଯୋଗ କରିବା ପୋଲିସ ସ୍ବାମୀଙ୍କୁ ଉଠାଇ ଆଣିଥିଲା।
