ଭୁବନେଶ୍ୱର(ବ୍ୟୁରୋ)/ପୁରୀ/କଟକ ଅଫିସ,୨୬।୩: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ରାଜ୍ୟରେ ବିଭିନ୍ନ ଉନ୍ନତିମୂଳକ କାର୍ଯ୍ୟ ଆଗେଇ ଚାଲିଛି। ଏହାକୁ ତ୍ୱରାନ୍ବିତ କରିବା ଉଦ୍ଦେଶ୍ୟରେ ୫-ଟି ସଚିବ ଭି.କେ. ପାଣ୍ଡିଆନ୍ ଶନିବାର ପୁରୀ ଏବଂ କଟକ ଗସ୍ତ କରି ବିଭିନ୍ନ ପ୍ରକଳ୍ପର ସମୀକ୍ଷା କରିଛନ୍ତି। ପାଣ୍ଡିଆନ ପ୍ରଥମେ ପୁରୀ ଗସ୍ତକରି ଶ୍ରୀ ଜଗନ୍ନାଥଙ୍କ ଐତିହ୍ୟ କରିଡର ଅନ୍ତର୍ଗତ ଶ୍ରୀ ସେତୁ ଏବଂ ଜଗନ୍ନାଥ ବଲ୍ଲଭ ଯାତ୍ରୀ ନିବାସ ନିର୍ମାଣ କାର୍ଯ୍ୟର ସମୀକ୍ଷା କରିଥିଲେ। ଏହି ଅବସରରେ ୫-ଟି ସଚିବ କହିଥିଲେ ଯେ, ରାଜ୍ୟ ସରକାରଙ୍କ ଐତିହ୍ୟ ରୂପାନ୍ତର କାର୍ଯ୍ୟକ୍ରମ ଦ୍ୱାରା ଅନ୍ତର୍ଜାତୀୟ ସ୍ତରରେ ପୁରୀର ଗୁରୁତ୍ୱ ବେଶ୍ ବୃଦ୍ଧି ପାଇବ। ତେଣୁ ପୁରୀ ପ୍ରକଳ୍ପର ଅଗ୍ରଗତି ପ୍ରତି ସପ୍ତାହରେ ସମୀକ୍ଷା କରିବାକୁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ରହିଛି ବୋଲି ପାଣ୍ଡିଆନ ସୂଚନା ଦେଇଛନ୍ତି।
ଅପରାହ୍ନରେ ୫-ଟି ସଚିବ ପାଣ୍ଡିଆନ କଟକରେ ପହଞ୍ଚତ୍ ସହରରେ ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିଥିଲେ। ପ୍ରଥମେ ସେ ଖାନ୍ନଗରସ୍ଥିତ ନେତାଜୀ ବସ୍ ଟର୍ମିନାଲ ନିର୍ମାଣସ୍ଥଳରେ ପହଞ୍ଚତ୍ ବିଲ୍ଡିଂ କାମର ଅଗ୍ରଗତି ସମ୍ପର୍କରେ ଅନୁଧ୍ୟାନ କରିବା ସହ ବିଭିନ୍ନ ବିଭାଗର ଅଧିକାରୀଙ୍କ ସହ ଆଲୋଚନା କରିଥିଲେ। ଏଥିସହ ଜୁନ୍ ୧୫ସୁଦ୍ଧା ଟର୍ମିନାଲ କାର୍ଯ୍ୟ ଶେଷ କରିବାକୁ ନିର୍ଦ୍ଦେଶ ଦେଇଥିଲେ। ସୂଚନାଯୋଗ୍ୟ, ଖାନ୍ନଗରରେ ୧୫ ଏକର ପରିମିତ ଅଞ୍ଚଳରେ ୭୦ କୋଟି ଟଙ୍କା ବ୍ୟୟ ଅଟକଳରେ ଜି ପ୍ଲସ୍-୨ ବସ୍ ଟର୍ମିନାଲ ନିର୍ମାଣ ଚାଲିଛି। ଏହା ରାଜ୍ୟର ପ୍ରଥମ ମଡେଲ ବସ୍ ଟର୍ମିନାଲ ହେବାକୁ ଯାଉଛି। ଗୋଟିଏ ସ୍ଥାନରେ ଯାତ୍ରୀମାନଙ୍କୁ ରେଳ ଷ୍ଟେଶନ ଏବଂ ବିମାନ ବନ୍ଦର ଭଳି ସେବା ଯୋଗାଇ ଦେବାକୁ ସରକାର ଯୋଜନା କରି ଏହି ବସ୍ ଟର୍ମିନାଲ ନିର୍ମାଣ କରୁଛନ୍ତି। ଏହି କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଥିବାବେଳେ ଟର୍ମିନାଲର ୨ଏକର ଜମିରେ କମର୍ସିଆଲ ଡେଭଲପ୍ମେଣ୍ଟ ପ୍ରୋଜେକ୍ଟ କାର୍ଯ୍ୟକାରୀ ହେବାକୁ ଯାଉଛି। ଏହି ସ୍ବତନ୍ତ୍ର କମ୍ପ୍ଲେକ୍ସ ପାଇଁ ଟେଣ୍ଡର ଆହ୍ବାନ ସରିଛି। ଏହି ଅତ୍ୟାଧୁନିକ ବସ୍ ଟର୍ମିନାଲରେ ସମୁଦାୟ ୩୩ଟି ରୁମ୍ ରହିଛି। ଗ୍ରାଉଣ୍ଡ୍ ଫ୍ଲୋରରେ ୩୦ଟି ଦୋକାନ ଘର ଥିବାବେଳେ ଫାଷ୍ଟ ଏବଂ ସେକେଣ୍ଡ ଫ୍ଲୋର୍ରେ ଶପିଂମଲ ପାଇଁ ବଡ କମର୍ସିଆଲ ରୁମ୍ ରହିଛି। ଟର୍ମିନାଲରେ ପ୍ରାୟ ୧୮୦ ବସ୍ ଏକ ସାଙ୍ଗରେ ରହିପାରିବ। ସେହିପରି ବସ୍ ପ୍ରବେଶ ଓ ବାହାରିବା ପାଇଁ ଅଲଗା ରାସ୍ତା, ଡ୍ରାଇଭରଙ୍କ ନିମନ୍ତେ ରେଷ୍ଟରୁମ୍, ମହିଳା ଓ ପୁରୁଷ ଯାତ୍ରୀଙ୍କ ପାଇଁ ଡର୍ମିଟୋରି ଆଦି ରହିଛି। ଏଥିସହ ଯାତ୍ରୀଙ୍କ ସୁରକ୍ଷା ପାଇଁ ସିସିଟିଭି ବ୍ୟବସ୍ଥା ସହ ପୋଲିସ୍ ଆଉଟ୍ପୋଷ୍ଟରେ ୨୪ ଘଣ୍ଟିଆ ପ୍ରହରା ବ୍ୟବସ୍ଥା ଉପଲବ୍ଧ ହେବ। ପରେ ୫-ଟି ସଚିବ କଟକ ଚଣ୍ଡୀ ମନ୍ଦିରରେ ପହଞ୍ଚତ୍ ମା’ଙ୍କ ଦର୍ଶନ କରିଥିଲେ। ଏଥିସହ ମନ୍ଦିରରେ ଚାଲିଥିବା ରୂପାନ୍ତରଣ କାର୍ଯ୍ୟର ସମୀକ୍ଷା କରିଥିଲେ। ମନ୍ଦିରର ସୌନ୍ଦର୍ଯ୍ୟକରଣର ଅଗ୍ରଗତି ସହିତ ସମସ୍ୟା ନେଇ ସେବାୟତଙ୍କ ସହ ଆଲୋଚନା କରିଛନ୍ତି। ବିଶେଷ କରି ଜଳ ନିଷ୍କାସନ, ପାର୍କିଂ ଓ ମରାମତି କାର୍ଯ୍ୟ ଚାଲୁ ରହିଛି। ପରେ ସଚିବ ରାଣୀହାଟରେ ନବନିର୍ମିତ କ୍ଲକ ଟାୱାର ଓ ତାଳଦଣ୍ଡା କେନାଲର ନିର୍ମାଣ କାର୍ଯ୍ୟର ସ୍ଥିତି ଅନୁଧ୍ୟାନ କରିଥିଲେ। ଶେଷରେ ଛତ୍ରବଜାରରେ ନିର୍ମାଣାଧୀନ ଭେଣ୍ଡିଂ ଜୋନ୍ ସମୀକ୍ଷା କରିଥିଲେ। ଏହି ସମୀକ୍ଷା କାର୍ଯ୍ୟକ୍ରମବେଳେ କଟକ ଜିଲାପାଳ ଭବାନୀ ଶଙ୍କର ଚୟନୀ, ସିଡିଏ ଅଧ୍ୟକ୍ଷ ଅନିଲ ସାମଲ, ସିଏମ୍ସି କମିଶନର ନିଖିଲ ପୱନ୍ କଲ୍ୟାଣ, ଡିସିପି ପିନାକ ମିଶ୍ରଙ୍କ ସମେତ ଅନ୍ୟ ବରିଷ୍ଠ ଅଧିକାରୀ ଉପସ୍ଥିତ ଥିଲେ।
