କୁଚିଣ୍ଡା,୧୬।୭(ବିରଞ୍ଚି ଦର୍କା): ସମ୍ବଲପୁର ଜିଲା କୁଚିଣ୍ଡା ବ୍ଲକ ଅଧୀନ ଖଣ୍ଡୋକଟା ଗ୍ରାମର ବର୍ଷା ଯୋଗୁ ହରକଟା ହିଡ ଭାଙ୍ଗିଯାଇଛି। ଫଳରେ ଏହି କଟା ତଳେ ଥିବା ଚାଷଜମି କ୍ଷତିଗ୍ରସ୍ତ ସାଙ୍ଗକୁ ମାଛ ଚାଷ ପାଇଁ ଲିଜ ନେଇଥିବା ଏସ୍ଏଚଜି ସଦସ୍ୟା ମଧ୍ୟ କ୍ଷତିଗ୍ରସ୍ତ ହୋଇଛନ୍ତି।
ଶନିବାର ହୋଇଥିବା ପ୍ରବଳ ବର୍ଷାରେ ୪ ଏକର ପରିମିତ ଏହି କଟାରେ ଜଳଧାରଣ କ୍ଷମତା ଠାରୁ ଅଧିକ ପାଣି ଜମିବାରୁ ରାତିରେ ହିଡଟି ଭାଙ୍ଗି ଯାଇଛି। ଖଣ୍ଡୋକଟା ଗ୍ରାମର ସଞ୍ଜୁକ୍ତା ସୋହେଲା, ଆର୍ତ୍ତ ସୋହେଲା, ସୁଦୀପ୍ତ ସୋହେଲା ଓ ଗୋବର୍ଦ୍ଧନ ସୋହଲାଙ୍କ ଚାଷ ଜମି ଏହି କଟା ତଳେ ରହିଛି। ହିଡଟି ଅଚାନକ ଭାଙ୍ଗିଯିବା ଫଳରେ ରୁଆ ପାଇଁ ସେମାନେ ପକାଇଥିବା ତଳି ଗୁଡିକ ମାଟିରେ ପୋତି ହୋଇ ନଷ୍ଟ ହୋଇଯାଇଛି। ଏହା ଦ୍ୱାରା ଗରିବ ଚାଷୀମାନେ କ୍ଷତିଗ୍ରସ୍ତ ହୋଇଛନ୍ତି। ଏହି କଟାଟି ଖଣ୍ଡୋକଟା ପଞ୍ଚାୟତ ଅଧୀନରେ ରହିଛି। ଚଳିତ ବର୍ଷ ମାଛ ଚାଷ ପାଇଁ ଖଣ୍ଡୋକଟା ‘ମା’ ଆଶା ପୁରା’ ଏସ୍ଏଚ୍ଜି ୫ବର୍ଷ ପାଇଁ ୬୦ ହଜାର ଟଙ୍କାରେ ଲିଜରେ ନେଇଛନ୍ତି। କଟା ହିଡ ଭାଙ୍ଗିବା ଯୋଗୁ ଏସ୍ଏଚଜିମାନଙ୍କ ମାଛ ଚାଷ କରିବା ଆଶା ମଉଳି ଯାଇଛି । କଟାରେ ପାଣି ଭର୍ତ୍ତି ହେବାରୁ ସେମାନେ ମାଛଚାଷ ପାଇଁ ବିହନ ଛାଡିବାକୁ ପ୍ରସ୍ତୁତ ହେଉଥିବା ବେଳେ, ଅଚାନକ କଟା ହିଡ ଭାଙ୍ଗି କ୍ଷତିରେ ପକାଇଥିବା ଏସ୍ଏଚ୍ଜି ସଭାନେତ୍ରୀ ତପସ୍ବିନୀ ବାଗେଲ ଓ ସମ୍ପାଦିକା ଶୈଳେନ୍ଦ୍ରୀ ପଟେଲ କହିଛନ୍ତି। ପଞ୍ଚାୟତ କର୍ତ୍ତୃପକ୍ଷ ତୁରନ୍ତ ହିଡ ମରାମତି କରିବାକୁ ସେମାନେ ଦାବି କରିଛନ୍ତି। ମତାମତ ପାଇଁ ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀ ହିମାଂଶୁ ଶେଖର ପଟେଲଙ୍କୁ ପଚାରିବାରେ କଟା ହିଡ ଭାଙ୍ଗିଛି ତେବେ ବର୍ଷା କମିଲେ ମରାମତି ପାଇଁ ପଦକ୍ଷେପ ନେବେ ବୋଲି କହିଛନ୍ତି।