ବ୍ରହ୍ମପୁର,୨।୭(ସୁବାସ ଚନ୍ଦ୍ର ପାଢ଼ୀ)ତ୍ରିକୋଣୀୟ ପ୍ରେମକୁ ନେଇ ଗୁଜୁରାଟ ରାଜ୍ୟର ସୁରଟରେ ୨୦୦୧ରେ ଘଟିଥିବା ଏକ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ୨୨ବର୍ଷ ପରେ ଧରାପଡ଼ିଛନ୍ତି। ସୁରଟ ପୋଲିସର ଏକ ଟିମ୍ ଉତ୍ତରପ୍ରଦେଶର ମଥୁରା ନନ୍ଦଗ୍ରାମସ୍ଥିତ କୁଞ୍ଜୁକୁଟି ଆଶ୍ରମରେ ସାଧୁବେଶରେ ରହୁଥିବା ଅଭିଯୁକ୍ତ ଗୌରାଙ୍ଗ ଚନ୍ଦ୍ର ପଣ୍ଡା ଓରଫ୍ ପଦ୍ମଚରଣକୁ ଗିରଫ କରିଛି। ଗୌରାଙ୍ଗଙ୍କ ଘର ବ୍ରହ୍ମପୁର ଶ୍ରୀରାମନଗର ହୋଇଥିବା ବେଳେ ସେ ଘଟଣା ପରଠାରୁ ଫେରାର୍ ହୋଇଯାଇଥିଲେ। ବିଭିନ୍ନ ସ୍ଥାନରେ ଲୁଚି ରହୁଥିବା ବେଳେ ଗତ କିଛିମାସ ହେଲା ମଥୁରାରେ ସାଧୁବେଶରେ ରହୁଥିଲେ ବୋଲି ସୁରଟ ପୋଲିସ କହିଛି। ସୂଚନା ଅନୁସାରେ, ବ୍ରହ୍ମପୁର ଶ୍ରୀରାମନଗର ନିବାସୀ ଗୌରାଙ୍ଗ ସୁରଟକୁ କାମ କରିବାକୁ ଯାଇଥିଲେ। ସେ ସୁରଟର ଶାନ୍ତିନଗର ଅଞ୍ଚଳରେ ରହୁଥିଲେ। ସେଠାରେ ଜଣେ ଯୁବତୀଙ୍କ ସହିତ ତାଙ୍କର ପ୍ରେମ ସମ୍ପର୍କ ଗଢ଼ି ଉଠିଥିଲା। ସେହି ଯୁବତୀଙ୍କ ସହିତ ଅନ୍ୟ ଜଣେ ଯୁବକ ବିଜୟ ଶିବା ଦାସଙ୍କ ସମ୍ପର୍କ ଥିବା ଗୌରାଙ୍ଗ ଜାଣିବାକୁ ପାଇଥିଲେ। ଏଥିରେ ଉତ୍କ୍ଷିପ୍ତ ହୋଇ ଗୌରାଙ୍ଗ ୨୦୦୧ ସେପ୍ଟେମ୍ବର ୩ ତାରିଖରେ ବିଜୟଙ୍କୁ ହତ୍ୟା କରି ନାଳରେ ଫିଙ୍ଗି ଦେଇଥିଲେ। ପୋଲିସ ଏକ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଏହି ହତ୍ୟା ଘଟଣା ପରେ ଗୌରାଙ୍ଗ ବ୍ରହ୍ମପୁର ପଳାଇ ଆସିଥିଲେ। ପରେ ମଥୁରା ଯାଇ ସେଠାରେ ନିଜକୁ ଗୌରାଙ୍ଗ ଚରଣ ପଣ୍ଡା ବୋଲି ପରିଚୟ ଦେଇ ସାଧୁ ବେଶରେ ରହିଥିଲେ। ଗୌରାଙ୍ଗଙ୍କୁ ଧରାଇଦେବାକୁ ସୁରଟ ପୋଲିସ ୪୫ହଜାର ଟଙ୍କାର ପୁରସ୍କାର ରାଶି ଘୋଷଣା କରିଥିଲା। କିଛିଦିନ ତଳେ ସୁରଟ ପୋଲିସ ଗୌରାଙ୍ଗ ସମ୍ପର୍କରେ ସୂଚନା ପାଇଥିଲା। ସେ କୁଞ୍ଜୁକୁଟି ଆଶ୍ରମରେ ଚଢ଼ଉ କରି ଗୌରାଙ୍ଗକୁ ଗିରଫ କରିଥିଲା।
