ଖୋର୍ଦ୍ଧା ଅଫିସ,୭।୧୦: ସବୁଜ ବନାନୀ ପାହାଡ଼ ପର୍ବତ ଘେରରେ ବହିଯାଇଛି ଶ୍ରାବଣୀ ଝରଣା। ଏହାର ପ୍ରାକୃତିକ ପରିବେଶ ପର୍ଯ୍ୟଟକଙ୍କୁ ବେଶ୍ ଆକୃଷ୍ଟ କରିଥାଏ। ଝରଣା ଝରରେ ସୂର୍ଯ୍ୟକିରଣ ପଡ଼ି ଏହା ନୀଳବର୍ଣ୍ଣ ଦେଖାଯାଏ। ପାହାଡ଼ ଚାରିପଟେ ରହିଥିବା ଘଞ୍ଚ ଜଙ୍ଗଲ, ପକ୍ଷୀଙ୍କ କିିଚିରି ମିଚିରି ଶବ୍ଦ ସାଙ୍ଗକୁ ଝର ଝର ହୋଇ ପାହାଡ଼ ପାଦଦେଶକୁ ବୋହି ଯାଉଥିବା ଝରଣାର ପାଣି ପର୍ଯ୍ୟଟକଙ୍କୁ ବିମୋହିତ କରିଥାଏ।
ଖୋର୍ଦ୍ଧା-ବଲାଙ୍ଗିର ୫୭ନଂ. ଜାତୀୟ ରାଜପଥ ବୋଲଗଡ଼ଠାରୁ ନୟାଗଡ଼ ରାସ୍ତା ବିଜିପୁର ଗେଟ୍ଠାରୁ ବାମ ପଟକୁ ୨କି.ମି. ପରେ ପଡ଼େ କାଉତରା ଉଚ୍ଚ ବିଦ୍ୟାଳୟ। ଏହି ବିଦ୍ୟାଳୟରୁ ଅଙ୍କାବଙ୍କା ହୋଇ ଯାଇଥିବା ପାହାଡ଼ ଉପରୁ ଏହି ଝରଣା ବୋହିଯାଇଛି। ଉକ୍ତ ଝରଣାକୁ ସ୍ଥାନୀୟ ଲୋକେ ଶ୍ରାବଣୀ ଝରଣା ବୋଲି କହିଥା’ନ୍ତି। ଅଙ୍କାବଙ୍କା ହୋଇ ଯାଇଥିବା ରାସ୍ତା ଦେଇ ପାହାଡ଼ ଉପରକୁ ଯିବାକୁ ପଡ଼େ। ପ୍ରକୃତିର ଏହି ଅପୂର୍ବ ସୌନ୍ଦର୍ଯ୍ୟକୁ ଉପଭୋଗ କରିବାରୁ ପର୍ଯ୍ୟଟକ ବଞ୍ଚତ୍ତ। ସ୍ଥାନୀୟ ବାସିନ୍ଦାଙ୍କ କହିବାନୁଯାୟୀ, ପାହାଡ଼ ଚାରିପାଖକୁ ଘଞ୍ଚ ଜଙ୍ଗଲ ଘେରି ରହିଛି। ପାହାଡ଼ ଉପର ଦୃଶ୍ୟ ଅତି ଆକର୍ଷଣୀୟ। ଉପରକୁ ଯିବା ପାଇଁ ସେଭଳି କୌଣସି ରାସ୍ତା ନାହିଁ। କେବଳ ଗଛଲତାକୁ ଆଡ଼େଇ ଆଡ଼େଇ ଉପରକୁ ଯିବାକୁ ପଡ଼େ। ଯେଉଁମାନେ ଏହି ଝରଣା ସମ୍ପର୍କରେ ଜାଣିଛନ୍ତି, ସେମାନେ ଏଠାକୁ ଆସନ୍ତି। ଉପରକୁ ଯିବା ପାଇଁ ରାସ୍ତା ନ ଥିବାରୁ ସତର୍କତା ସହ ଯିବାକୁ ପଡ଼ିଥାଏ। ଜିଲା ପ୍ରଶାସନ କିମ୍ବା ପର୍ଯ୍ୟଟନ ବିଭାଗ ନିକଟରେ ଏନେଇ କୌଣସି ଖବର ନ ଥିବା ଜଣାପଡ଼ିଛି। ଏଠାକୁ ଯିବା ପାଇଁ ଜିଲା ପ୍ରଶାସନ ପକ୍ଷରୁ ରାସ୍ତା ନିର୍ମାଣ କରାଗଲେ ଏ କ୍ଷେତ୍ରରେ ପର୍ଯ୍ୟଟକଙ୍କ ସମାଗମ ଦେଖିବାକୁ ମିଳନ୍ତା ବୋଲି ସାଧାରଣରେ ମତପ୍ରକାଶ ପାଇଛି।