ବାଲେଶ୍ୱର ଅଫିସ, ୨୨।୧୨: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁବାର ବାଲେଶ୍ୱର ଗସ୍ତରେ ଆସୁଛନ୍ତି। ଏହି ଅବସରରେ ଅନେକ ଉନ୍ନୟନମୂଳକ ପ୍ରକଳ୍ପ ଶୁଭାରମ୍ଭ ହେବ। ଶୋଭାରାମପୁରଠାରେ ଏକ ରେଲୱେ ଓଭରବ୍ରିଜ୍ (ଏଲ୍ସି-୭୯)ର ଉଦ୍ଘାଟନ ହେବା ସହିତ ୬୯ ଅନ୍ୟ ପ୍ରକଳ୍ପ ମଧ୍ୟ ଉଦ୍ଘାଟନ ହେବ, ଯାହାର ବ୍ୟୟ ଅଟକଳ ୩୭୫କୋଟି ଟଙ୍କା। ସେହିପରି ମୁଖ୍ୟମନ୍ତ୍ରୀ ୧୫୦୦କୋଟି ଟଙ୍କା ବ୍ୟୟରେ ୧୨୨ଟି ପ୍ରକଳ୍ପ ଶିଳାନ୍ୟାସ କରିବାର କାର୍ଯ୍ୟକ୍ରମ ରହିଛି। ମୁଖ୍ୟମନ୍ତ୍ରୀ ପ୍ରାୟ ୬୦ହଜାର ସଦସ୍ୟା ବିଶିଷ୍ଟ ୫୬୦୦ଟି ମହିଳା ସ୍ବୟଂସହାୟିକା ଗୋଷ୍ଠୀଙ୍କୁ ୨୨୦କୋଟି ଟଙ୍କାର ମିଶନ ଶକ୍ତି ଋଣ ସହାୟତା ରାଶି ପ୍ରଦାନ କରିବେ। ମୁଖ୍ୟମନ୍ତ୍ରୀଙ୍କ ଗସ୍ତ ପାଇଁ ଜିଲା ଓ ପୋଲିସ ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ସରିଛି। ଗୁରୁବାର ପୂର୍ବାହ୍ନ ୧୧ଟା ୧୫ରେ ହେଲିକପ୍ଟରରେ ପୋଲିସ ରିଜର୍ଭ ପଡ଼ିଆରେ ମୁଖ୍ୟମନ୍ତ୍ରୀ ଓହ୍ଲାଇ ଉପରୋକ୍ତ କାର୍ଯ୍ୟକ୍ରମରେ ସାମିଲ୍ ହୋଇ ଜିଲାବାସୀଙ୍କୁ ଉଦ୍ବୋଧନ ଦେବେ। ପୋଲିସ ପକ୍ଷରୁ ସୁରକ୍ଷା ଓ ଟ୍ରାଫିକ୍ ବ୍ୟବସ୍ଥା ପାଇଁ ବ୍ୟାପକ ପୋଲିସ ମୁତୟନ କରାଯାଇଛି। ଜିଲା ଆରକ୍ଷୀ ଅଧୀକ୍ଷକ ସୁଧାଂଶୁ ଶେଖର ମିଶ୍ରଙ୍କ ତତ୍ତ୍ୱାବଧାନରେ ୩ଜଣ ଅତିରିକ୍ତ ଏସ୍ପି, ୧୨ଜଣ ଡିଏସ୍ପି, ୩୪ଜଣ ଇନ୍ସପେକ୍ଟର, ୯୫ ଜଣ ସବ୍-ଇନ୍ସପେକ୍ଟର/ଆସିଷ୍ଟାଣ୍ଟ ସବ୍ଇନ୍ସପେକ୍ଟର, ୩୩ ପ୍ଲାଟୁନ ଫୋର୍ସଙ୍କ ସମେତ ୧୦୩ଜଣ ରିଜର୍ଭ ପୋଲିସ, ୭୮ ହୋମ୍ଗାର୍ଡ଼ଙ୍କ ଦ୍ୱାରା ହେଲିପ୍ୟାଡ୍, କାରକେଡ୍, ସଭାସ୍ଥଳୀ, ଶୋଭାରାମପୁର ନୂତନ ବ୍ରିଜ୍ ଉଦ୍ଘାଟନୀ ସ୍ଥଳୀ, ଟ୍ରାଫିକ୍ ନିୟନ୍ତ୍ରଣ ଏବଂ ପାର୍କିଂ ପାଇଁ ନିୟୋଜିତ ହୋଇଛନ୍ତି। ଟ୍ରାଫିକ୍ ନିୟନ୍ତ୍ରଣ ଦୃଷ୍ଟିରୁ ଯାନବାହନକୁ ଆଇଟିଆଇ ପଡ଼ିଆ, ମିଶନ ପଡ଼ିଆ, ସରକାରୀ ଆଇଟିଆଇ ପରିସର, ଆର୍ଟିଓ ଅଫିସ୍ ପରିସର, ଜିଲା ସ୍କୁଲ ପଡ଼ିଆ, ଫକୀରମୋହନ କଲେଜ ପଡ଼ିଆରେ ରଖାଯିବାର ବ୍ୟବସ୍ଥା କରାଯାଇଛି।