ଥିରୁଭାନନ୍ତପୁରମ୍, ୧୬।୪ : କୋଭିଶିଲ୍ଡ ଟିକା ନେବା ପରେ ଜଣେ ୧୯ ବର୍ଷ ବୟସ୍କା ଯୁବତୀଙ୍କ ମୃତ୍ୟୁ ଘଟିବା ମାମଲାରେ କେରଳ ହାଇକୋର୍ଟ କେନ୍ଦ୍ର ସରକାରଙ୍କୁ ଜବାବ ମାଗିଛନ୍ତି। ପିଜି ପାଠ ପଢୁଥିବା ଯୁବତୀଙ୍କ ମାତାପିତା ପ୍ରଶାସନଠାରୁ ଏକ କୋଟି ଟଙ୍କାର କ୍ଷତି ପୂରଣ ଦାବି କରିଛନ୍ତି।
ବିଚାରପତି ଏନ୍. ନାଗରେଶଙ୍କ ନେତୃତ୍ୱରେ ଗଠିତ ଖଣ୍ଡପୀଠ ମାମଲାର ବିଚାର କରି ପିଟିଶନ ଉପରେ କେନ୍ଦ୍ର ସରକାରଙ୍କ ମତାମତ ଲୋଡ଼ିଛନ୍ତି।
ଯୁବତୀ ଜଣକ ୨୦୨୧ ଜୁଲାଇ ୨୮ରେ କୋଭିଶିଲ୍ଡ ଟିକା ନେଇଥିଲେ। ଏହାପରେ ସେ ଅସୁସ୍ଥ ହୋଇ ପଡ଼ିଥିଲେ। ଶେଷରେ ଅଗଷ୍ଟ ୫ରେ ତାଙ୍କୁ ହସ୍ପିଟାଲକୁ ନିଆ ଯାଇଥିଲା। ତାଙ୍କର ଆଣ୍ଟିଜେନ୍ ପରୀକ୍ଷା ରିପୋର୍ଟ ମଧ୍ୟ କରୋନା ନେଗେଟିଭ୍ ଆସିଥିଲା। ପରେ ସେ ଘରକୁ ଆସିଥିଲେ। ଅଗଷ୍ଟ ୧୨ରେ ତାଙ୍କର ମୃତ୍ୟୁ ଘଟିଥିଲା।
ତାଙ୍କର ବ୍ୟବଚ୍ଛେଦ ରିପୋର୍ଟରେ ମୃତ୍ୟୁର କାରଣ ଇଣ୍ଟରକ୍ରାନିଅଲ ବ୍ଲିଡିଂ ଯୋଗୁ ତାଙ୍କର ମୃତ୍ୟୁ ଘଟିଥିବା ଦର୍ଶାଯାଇଥିଲା।
ଯୁବତୀଙ୍କର ପୂର୍ବରୁ କୌଣସି ବ୍ରେନ୍ ସମସ୍ୟା ନଥିବା ଡାକ୍ତରୀ ରିପୋର୍ଟରେ ଉଲ୍ଲେଖ କରାଯାଇଛି। କୋଭିଶିଲ୍ଡ ଟିକା ଯୋଗୁ ଏଭଳି ହୋଇଥିବା ମୃତ ଯୁବତୀଙ୍କ ପକ୍ଷରୁ ଆଇନଜୀବୀ ସି. ଉନ୍ନିକୃଷ୍ଣନ୍ ଏବଂ ଏମ୍.ଆର.ସୁଦ୍ଧେନ୍ଦ୍ରନ ଖଣ୍ଡପୀଠଙ୍କ ସମ୍ମୁଖରେ ଯୁକ୍ତି ବାଢ଼ିଥିଲେ।