କୁନ୍ଦୁରା,୨୧ା୪ (ଡି.ଏନ.ଏ.): କୋରାପୁଟ ଜିଲା କୁନ୍ଦୁରା ବ୍ଳକ କେରିମିଟି ପଞ୍ଚାୟତ ପ୍ରତିଷ୍ଠା ହେବାର ୨୦ବର୍ଷ ବିତିଗଲାଣି। ମାତ୍ର ଏଠାରେ ଏଯାଏ ପଞ୍ଚାୟତ କାର୍ଯ୍ୟାଳୟ ନିର୍ମାଣ ହୋଇପାରିନାହିଁ। ଏନେଇ ଗୁରୁବାର ନୂତନ ବିଡିଓ ରାମପ୍ରସାଦ ଦୋରାଙ୍କୁ ଭେଟି ଶତାଧିକ ଗ୍ରାମବାସୀ ପୂର୍ବତନ ପଞ୍ଚାୟତ ସମିତି ଅଧ୍ୟକ୍ଷ ସୁରେନ୍ଦ୍ର ପରଜାଙ୍କ ନେତୃତ୍ୱରେ ଗୁରୁବାର ଦାବିପତ୍ର ଦେଇଛନ୍ତି। ଏ ସମ୍ପର୍କରେ ଗୋଟିଏ ଗୋଷ୍ଠୀ ପକ୍ଷରୁ ହାଇକୋର୍ଟରେ କରାଯାଇଥିବା ମାମଲାର ରାୟ ଆସିଛି। ସମ୍ପୃକ୍ତ ଗୋଷ୍ଠୀଙ୍କୁ ଏଥିରୁ ଫାଇଦା ମିଳିନି।
ଖବରରୁ ଜଣାପଡ଼ିଛି, ପଞ୍ଚାୟତ ପ୍ରତିଷ୍ଠା ପରେ ଏହାର କାର୍ଯ୍ୟାଳୟ ନିର୍ମାଣ ଲାଗି ୨ ଗୋଷ୍ଠୀ ମଧ୍ୟରେ ବିବାଦ ଆରମ୍ଭ ହୋଇଥିଲା। ଗୋଟିଏ ଗୋଷ୍ଠୀ କେରିମିଟିରେ ପଞ୍ଚାୟତ କାର୍ଯ୍ୟାଳୟ ଗୃହ ନିର୍ମାଣ ପାଇଁ ଚାହୁଁଥିବା ବେଳେ ଅନ୍ୟ ଗୋଷ୍ଠୀ କେନ୍ଦୁଗୁଡାରେ ନିର୍ମାଣ ପାଇଁ ଚାହୁଁଥିଲେ। ଫଳରେ କେନ୍ଦୁଗୁଡା ଗୋଷ୍ଠୀ ହାଇକୋର୍ଟଙ୍କ ଦ୍ୱାରସ୍ଥ ହୋଇ ଏକ ମାମଲା ରୁଜୁ କରିଥିଲେ। ଏଥିଯୋଗୁ ଆଉ କେରିମିଟିରେ ପଞ୍ଚାୟତ କାର୍ଯ୍ୟାଳୟ ଗୃହ ନିର୍ମାଣ ହୋଇପାରି ନ ଥିଲା। ଗତ ଦିନରେ ଜିଲାପାଳଙ୍କ ସ୍ବତନ୍ତ୍ର ଅଭିଯୋଗ ପ୍ରକୋଷ୍ଠରେ କେରିମିଟି ପଞ୍ଚାୟତର ୮୦ ପ୍ରତିଶତ ଲୋକ କେରିମିଟିରେ ପଞ୍ଚାୟତ କାର୍ଯ୍ୟାଳୟ ନିର୍ମାଣ ପାଇଁ ମତ ରଖିଥିଲେ। ଅନ୍ୟ ଗୋଷ୍ଠୀର କେତେଜଣ ଲୋକ କେନ୍ଦୁଗୁଡ଼ା ଗ୍ରାମରେ ଏହା କରିବା ପାଇଁ ଅଡ଼ି ବସିଥିଲେ। ହାଇକୋର୍ଟରେ ମାମଲା ଚାଲିଥିବାରୁ ପ୍ରଶାସନ କିଛି ପଦକ୍ଷେପ ନେଇପାରି ନ ଥିଲେ। ଇତି ମଧ୍ୟରେ ୨୦୦୨ରୁ ଏଯାଏ ୨୦ବର୍ଷ ମଧ୍ୟରେ ପ୍ରାୟ ୪ ଥର ସରପଞ୍ଚ ନିର୍ବାଚନ ସରିଛି। ନିର୍ବାଚିତ ସରପଞ୍ଚ କେରିମିଟିରେ ଏକ କୁଡିଆଘରେ ଜିପିଓ, ଗ୍ରାମ ରୋଜଗାର ସେବକ ଏବଂ ଅନ୍ୟ କର୍ମଚାରୀଙ୍କୁ ଧରି ବହୁ ଅସୁବିଧାର ସମ୍ମୁଖୀନ ହୋଇ ଦାୟିତ୍ୱ ତୁଲାଇଛନ୍ତି। ନିକଟରେ ହାଇକୋର୍ଟ ଏହି ମାମଲାର ବିଚାରକରି କେରିମିଟି ସଦର ମହକୁମାରେ ପଞ୍ଚାୟତ କାର୍ଯ୍ୟାଳୟ ନ ଥାଇ ସେଠାରେ ସମସ୍ତ ପ୍ରକାର କାର୍ଯ୍ୟ ସମ୍ପାଦନ ହେଉଥିବାରୁ ସେଠାରେ ହିଁ ପଞ୍ଚାୟତ କାର୍ଯ୍ୟାଳୟ ନିର୍ମାଣ କରିବାକୁ ନିର୍ଦ୍ଦେଶ ଦେଇଛନ୍ତି। ଏ ସମ୍ପର୍କିତ ଚିଠି ନଂ. ୪୧୭୬୪/୭୧, ତା ୨୧ା୧ା୨୩ରେ କୋରାପୁଟ ଜିଲାପାଳ, ଜୟପୁର ଉପ ଜିଲାପାଳ, ଜିଲା ଗ୍ରାମ ପଞ୍ଚାୟତ ଅଧିକାରୀ,କୁନ୍ଦୁରା ବିଡିଓ, ତହସିଲଦାରଙ୍କୁ ଅବଗତ କରାଇଛନ୍ତି। ଏ ସମ୍ପର୍କରେ ବିଡିଓ ଦୋରାଙ୍କୁ ପଚାରିବାରୁ ସେ କହିଲେ, ଯେହେତୁ ଏହା ଦୀର୍ଘ ବର୍ଷର ମାମଲା, ଏନେଇ ଜିଲାପାଳଙ୍କ ସହ ଆଲୋଚନା କରିବି। ସେ ଯାହା ନିର୍ଦ୍ଦେଶ ଦେବେ ସେହି ଅନୁସାରେ କାର୍ଯ୍ୟ ହେବ।