ନୂଆଦିଲ୍ଲୀ, ୨୫ା୨(ପି.ଟି.): ଇରାନରେ ହେବାକୁଥିବା ବିଶ୍ୱ ଜୁନିୟର କବାଡ଼ି ଚାମ୍ପିୟନଶିପ୍ (ବାଳକ)ରେ ଭାରତ ତରଫରୁ ଅଂଶଗ୍ରହଣ କରିବା ଲାଗି ଦୁଇଜଣ ସ୍ବଳ୍ପ ବୟସ୍କ ଖେଳାଳିଙ୍କୁ ଅନୁମତି ଦେଇଛନ୍ତି ଦିଲ୍ଲୀ ହାଇକୋର୍ଟ। ସାମାନ୍ୟ ଇଞ୍ଜୁରି ପାଇଁ କର୍ତ୍ତୃପକ୍ଷ ଏହି ଦୁଇ ଖେଳାଳିଙ୍କୁ ଦଳରୁ ବାଦ୍ ଦେଇଥିଲେ। ହାଇକୋର୍ଟ କହିଛନ୍ତି, ଜଣେ ଖେଳାଳିଙ୍କ କ୍ୟାରିୟରରେ ବିଶ୍ୱକପ୍ ଖେଳିବା ବଡ଼ ସୌଭାଗ୍ୟର ବିଷୟ। ଏହି ସୁଯୋଗ ମିଳିଲେ କେହି ଅବା ହାତଛଡ଼ା କରିବାକୁ ଚାହିଁବ ନାହିଁ। ଉଭୟେ ସେମାନଙ୍କ କୈଶୋରର ଶେଷ ପର୍ଯ୍ୟାୟରେ ପହଞ୍ଚତ୍ଛନ୍ତି। ସେଭଳି ଯଥାର୍ଥ କାରଣ ନ ଥାଇ ସେମାନଙ୍କୁ ଶେଷ ମୁହୂର୍ତ୍ତରେ ଦଳରୁ ବାଦ୍ ଦେବା ଉଚିତ କାର୍ଯ୍ୟ ହୋଇନାହିଁ। ଦଳରୁ ବାଦ୍ ପଡ଼ିବା ଦ୍ୱାରା କେବଳ ସେମାନଙ୍କୁ ନୁହେଁ ସମଗ୍ର ଦଳ ପାଇଁ ନୈରାଶ୍ୟଜନକ ବିଷୟ ହେବ। ୧୭ ବର୍ଷୀୟ ରୋହିତ କୁମାର ଓ ୧୯ ବର୍ଷୀୟ ନରେନ୍ଦରଙ୍କ ଆବେଦନକୁ ବିଚାର କରି ଜଷ୍ଟିସ ପ୍ରତିଭା ଏମ୍. ସିଂ ଆମେଚର କବାଡ଼ି ଫେଡେରେଶନ ଅଫ୍ ଇଣ୍ଡିଆ(ଏକେଏଫ୍ଆଇ) ଓ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ(ସାଇ)ର ପ୍ରଶାସକଙ୍କୁ ତୁରନ୍ତ ବିହିତ ପଦକ୍ଷେପ ନେବା ଲାଗି ନିର୍ଦ୍ଦେଶ ଦେଇଛନ୍ତି। ଦଳ ସହିତ ଇରାନ ଗସ୍ତ ପାଇଁ ସମସ୍ତ ପ୍ରକାର ବନ୍ଦୋବସ୍ତ କରିବା ଲାଗି କହିଛନ୍ତି। କବାଡ଼ି ବିଶ୍ୱକପ୍ ଇରାନର ଉର୍ମିଆଠାରେ ଫେବୃୟାରୀ ୨୬ରୁ ମାର୍ଚ୍ଚ ୫ ପର୍ଯ୍ୟନ୍ତ ହେବ। ବୟସଗତ ଦୃଷ୍ଟିରୁ ଭବିଷ୍ୟତରେ ଏହି ଦୁଇ ଖେଳାଳିଙ୍କୁ ଜୁନିୟର ଦଳରେ ସୁଯୋଗ ମିଳି ନ ପାରେ। ସୂଚନାଯୋଗ୍ୟ, ଇଞ୍ଜୁରିମୁକ୍ତ ହେବା ପରେ ଏହି ଦୁଇ ଖେଳାଳି ଆବଶ୍ୟକ ଟ୍ରେନିଂ ଓ କୋଚିଂ ନେଇଥିଲେ। ପିଟିଶନର ଦ୍ୱୟ ଇଞ୍ଜୁରି ମୁକ୍ତ ବୋଲି ତାଙ୍କୁ ଚିକିତ୍ସା କରୁଥିବା ଡାକ୍ତର ଘୋଷଣା କରିସାରିଥିଲେ। କେବଳ ଧୀରେ ଧୀରେ ଟ୍ରେନିଂ ନେବାକୁ ପରାମର୍ଶ ଦେଇଥିଲେ। କୋର୍ଟରେ ଉଭୟ ଆବେଦନକାରୀ ସେମାନଙ୍କ ପିତାଙ୍କ ସହ ଉପସ୍ଥିତ ଥିଲେ, ଯେଉଁମାନେ ସେମାନଙ୍କ ପିଲାଙ୍କୁ ବିଶ୍ୱକପ୍ରେ ଭାଗ ନେବା ଲାଗି ପଠାଇବାକୁ ଇଚ୍ଛୁକ ଥିଲେ। ଖବର ଅନୁସାରେ ରୋହିତ ଓ ନରେନ୍ଦର ଜାନୁୟାରୀ ୨୩ରୁ ଫେବୃୟାରୀ ୧୨ ପର୍ଯ୍ୟନ୍ତ ସାଇ ଦ୍ୱାରା ଆୟୋଜିତ କୋଚିଂ କ୍ୟାମ୍ପରେ ଯୋଗ ଦେଇଥିଲେ। ମାତ୍ର ଫେବୃୟାରୀ ୯ରେ ଟ୍ରେନିଂ ବେଳେ ଉଭୟ ସାମାନ୍ୟ ଆଘାତପ୍ରାପ୍ତ ହୋଇଥିଲେ। ରୋହିତଙ୍କ କଚଟିରେ ଏବଂ ନରେନ୍ଦରଙ୍କ ତଳିପେଟରେ ଆଘାତ ଲାଗିଥିଲା। ସାଇର ଜଣେ ଡାକ୍ତରଙ୍କ ଦ୍ୱାରା ତାଙ୍କର ମେଡିକାଲ ଚେକ୍ଅପ୍ ହୋଇଥିଲା।