କଟକ,୪ା୮(କାର୍ତ୍ତିକ ସାହୁ):ବିଚାର ବ୍ୟବସ୍ଥାକୁ ଲୋକାଭିମୁଖୀ କରିବା ନିମନ୍ତେ ଓଡ଼ିଶା ହାଇକୋର୍ଟ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି। ଏହି କ୍ରମରେ ଆସନ୍ତା ୫ ତାରିଖଠାରୁ ଛୁଟିଦିନ ବ୍ୟତୀତ ପ୍ରତି ଶନିବାର ହାଇକୋର୍ଟ ସର୍ବସାଧାରଣଙ୍କ ପରିଦର୍ଶନ ନିମନ୍ତେ ଖୋଲାରହିବ। ସେଦିନ ଦୁଇଟି ପର୍ଯ୍ୟାୟରେ ଏହି ପରିଦର୍ଶନ କାର୍ଯ୍ୟକ୍ରମ ପାଇଁ ସୁଯୋଗ ଦିଆଯିବ। ପ୍ରତି ପର୍ଯ୍ୟାୟରେ ୪୦ ଜଣ ଲେଖାଏ ଲୋକଙ୍କୁ ହାଇକୋର୍ଟ ଭିତରକୁ ପ୍ରବେଶ କରିବାକୁ ଦିଆଯିବ। ପ୍ରଥମ ପର୍ଯ୍ୟାୟ ପୂର୍ବାହ୍ନ ୧୦ଟାରୁ ସାଢେ ୧୧ଟା ଓ ଦ୍ୱିତୀୟ ପର୍ଯ୍ୟାୟ ପୂର୍ବାହ୍ନ ସାଢେ ୧୧ଟାରୁ ଅପରାହ୍ନ ୧ଟା ଯାଏ ସମୟ ସ୍ଥିର କରାଯାଇଛି। ହାଇକୋର୍ଟର ଐତିହାସିକ କୋଠା ଓ ନୂତନ କୋଠାରେ ଥିବା ବିଚାରପତିମାନଙ୍କ କୋର୍ଟ ରୁମ୍ ସମେତ ହାଇକୋର୍ଟର ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସ୍ଥାନ ପରିଦର୍ଶନ ନିମନ୍ତେ ସୁଯୋଗ ଦିଆଯିବ। ହାଇକୋର୍ଟର ଅଧିକାରୀମାନେ ଉପସ୍ଥିତ ରହି ପରିଦର୍ଶକମାନଙ୍କୁ ମାର୍ଗଦର୍ଶନ କରିବେ। ଏଥିପାଇଁ ୩ ତାରିଖରୁ ଭିଜିଟର୍ସ ପାସ୍ କପି ସେକ୍ସନରେ ଅପରାହ୍ନ ୨ଟାରୁ ୫ଟା ପର୍ଯ୍ୟନ୍ତ ପଞ୍ଜୀକରଣ ପରେ ପ୍ରଦାନ କରାଯିବ। ହାଇକୋର୍ଟ ବୁଲିବାକୁ ଚାହୁଁଥିବା ବ୍ୟକ୍ତିମାନେ ପଞ୍ଜୀକରଣବେଳେ ନିଜର ପରିଚୟ ପତ୍ର ପ୍ରଦାନ କରିବେ। ପରିଦର୍ଶନବେଳେ ମଧ୍ୟ ପରିଚୟ ପତ୍ର ଓ ପାସ୍ ସାଙ୍ଗରେ ଆଣିବେ। ଖୁବ୍ଶୀଘ୍ର ଅନ୍ଲାଇନ୍ରେ ଏହି ପଞ୍ଜୀକରଣ ଆରମ୍ଭ ହେବ ବୋଲି ହାଇକୋର୍ଟ ପକ୍ଷରୁ ଜଣାପଡିଛି।
