ରୂପସା,୨।୬(ଡି.ଏନ.ଏ.): ବାଲେଶ୍ୱର ଜିଲା ବସ୍ତା ବ୍ଲକ ରଘୁନାଥପୁର ପଞ୍ଚାୟତର ଚକଅର୍ଜୁନି ଗ୍ରାମର ଗୋଚର ଜମିରେ ୨୧ବର୍ଷ ହେଲା ବସବାସ କରି ଆସୁଥିବା ୭ ପରିବାରଙ୍କୁ ଉଚ୍ଛେଦ ଲାଗି ହାଇକୋର୍ଟ ନୋଟିସ୍ ଦେଇଛନ୍ତି। ରାଜସ୍ବ ବିଭାଗ ପକ୍ଷରୁ ଏହି ନୋଟିସ ମିଳିବା ପରେ ଏହି ପରିବାର ଲୋକେ ବିଚଳିତ ହୋଇପଡ଼ିଛନ୍ତି। ଏହି ୭ ପରିବାରରେ ୪୦ ଜଣ ସଦସ୍ୟ ଭବିଷ୍ୟତ ନେଇ ଚିନ୍ତା ପ୍ରକଟ କରିଛନ୍ତି। ଏହି ୭ ପରିବାର ମଧ୍ୟରୁ ୫ ପରିବାର ଆଦିବାସୀ ସମ୍ପ୍ରଦାୟର। ଅନ୍ୟ ଦୁଇ ପରିବାର କୁମ୍ଭାର ଜାତିର ଅଟନ୍ତି। ସମସ୍ତେ ଖଟିଖିଆ ଓ ଦିନମଜୁରିଆ।
ପୂର୍ବେ ଏଠାକାର ଲୋକେ ତାଙ୍କୁ କାମ କରିବା ଲାଗି ଆଣିଥିଲେ। ଦୀର୍ଘବର୍ଷ ପରିଶ୍ରମ କରି ସେମାନେ ନିଜର ବାସସ୍ଥାନ ପ୍ରସ୍ତୁତ କରିଛନ୍ତି। ଏଭଳି ସମୟରେ ସେମାନଙ୍କୁ ଜାଗା ଛାଡ଼ି ଯିବାକୁ କହିଲେ ସେମାନେ କୁଆଡ଼େ ଯିବେ ବୋଲି ପ୍ରଶ୍ନ କରିଛନ୍ତି। ମଙ୍ଗଳବାର ଏହି ଲୋକମାନେ ବସ୍ତା ତହସିଲଦାରଙ୍କୁ ଭେଟି ନିଜର ଦୁଃଖ ଜଣାଇଥିଲେ। ତେବେ ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଏହି ଉଚ୍ଛେଦ କରାଯିବ ବୋଲି ବସ୍ତା ତହସିଲଦାର କାର୍ତ୍ତିକ କୁମାର ଦାସ ସୂଚନା ଦେବା ସହିତ ହାଇକୋର୍ଟଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରିବା ପରେ ଉକ୍ତ ପରିବାର ଲୋକଙ୍କ ଥଇଥାନ ପାଇଁ ଚେଷ୍ଟା କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି।