ହାଇଦ୍ରାବାଦ,୭।୧୧: କଂଗ୍ରେସ ନେତା ରାହୁଲ ଗାନ୍ଧୀଙ୍କ ନେତୃତ୍ୱରେ ଚାଲିଥିବା ଭାରତ ଯୋଡ଼ୋ ଯାତ୍ରା ରବିବାର ୬୦ ଦିନ ଅତିକ୍ରମ କରିଛି। ୬୦ତମ ଦିନରେ ରାହୁଲ ରବିବାର ସକାଳେ ତେଲଙ୍ଗାନାର ମେଡକ ଜିଲା ଅନ୍ତର୍ଗତ ଆଲ୍ଲାଦୁର୍ଗରେ ପଦଯାତ୍ରା କରିଥିଲେ। ଏହି ଅବସରରେ ସେ ଭାଜପା ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କଡ଼ା ସମାଲୋଚନା କରିଛନ୍ତି। ମୋଦିଙ୍କ ନେତୃତ୍ୱରେ ଏନ୍ଡିଏ ୨୦୧୪ରେ କ୍ଷମତାକୁ ଆସିବା ପରେ ଦେଶରେ ବେରୋଜଗାରୀ ଓ ଦରଦାମ୍ ବୃଦ୍ଧି ବେଲଗାମ ଭାବେ ବଢ଼ିଚାଲିଥିବା କଂଗ୍ରେସ ନେତା କହିଛନ୍ତି।
ମେଡକ ଜିଲାରେ ଏକ ପଥପ୍ରାନ୍ତ ସଭାରେ ରାହୁଲ କହିଥିଲେ, ଏନ୍ଡିଏ ସରକାର ଭେଲ୍ ଏବଂ ରେଲ୍ଓ୍ବେ ଭଳି ରାଷ୍ଟ୍ରାୟତ୍ତ ଉଦ୍ୟୋଗଗୁଡ଼ିକୁ ଘରୋଇକରଣ କରୁଥିବା ରାହୁଲ ଅଭିଯୋଗ କରିଛନ୍ତି। ଯେତେବେଳେ ସେ ଯୁବବର୍ଗଙ୍କୁ ଭେଟୁଛନ୍ତି, ସେମାନେ ବେରୋଜଗାରୀ ସମ୍ପର୍କରେ କହୁଛନ୍ତି। ବଡ଼ ବ୍ୟବସାୟ ସଂସ୍ଥା ତୁଳନାରେ କୃଷକ ଏବଂ କ୍ଷୁଦ୍ର ଓ ମଧ୍ୟମ ବ୍ୟବସାୟୀ ଅଧିକ ନିଯୁକ୍ତି ପ୍ରଦାନ କରିଥାନ୍ତି। ସେ ନାଗି ରେଡ୍ଡୀ ନାମକ ଜଣେ ଚାଷୀଙ୍କୁ ମଞ୍ଚକୁ ଡାକି ତେଲଙ୍ଗାନା ଚାଷୀଙ୍କ ସ୍ଥିତି ସମ୍ପର୍କରେ ବର୍ଣ୍ଣନା କରିବାକୁ କହିଥିଲେ। ଏହି ସଭାରେ ପ୍ରଦେଶ କଂଗ୍ରେସ ସଭାପତି ଏ. ରେଭନ୍ଥ ରେଡ୍ଡୀ ଓ ରାଜ୍ୟର ଅନ୍ୟ ନେତାମାନେ ସାମିଲ ହୋଇଥିଲେ। ରାହୁଲ ବିଭିନ୍ନ ବର୍ଗର ଲୋକଙ୍କ ସହ କଥା ହୋଇଥିଲେ। ସୋମବାର ଭାରତ ଯୋଡ଼ୋ ଯାତ୍ରା ମହାରାଷ୍ଟ୍ରରେ ପ୍ରବେଶ କରିବ।
