ନୂଆଦିଲ୍ଲୀ, ୧୬।୯: ଟି୨୦ ଅଧିନାୟକ ଭାବେ ଆଗାମୀ ବିଶ୍ୱକପ୍ ହେବ ବିରାଟ କୋହଲିଙ୍କ ଶେଷ ପ୍ରତିଯୋଗିତା। ଏହି ଫର୍ମାଟରେ ନେତୃତ୍ୱ ନେବାରେ ତାଙ୍କର ରେକର୍ଡ ଯଥେଷ୍ଟ ଭଲ। ୨୦୦୭ରେ ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱରେ ଭାରତ ଟି୨୦ ବିଶ୍ୱକପ ଜିତିଥିଲେ ହେଁ ଅଧିନାୟକ କୋହଲିଙ୍କ କାର୍ଯ୍ୟକାଳରେ ଭାରତର ବିଜୟ ପ୍ରତିଶତ ଅଧିକ। କୋହଲିଙ୍କ ନେତୃତ୍ୱରେ ଭାରତ ୪୫ଟି ମ୍ୟାଚ ଖେଳିଥିବାବେଳେ ୨୭ଟିରେ ବିଜୟ ହାସଲ କରିଛି। ୨ଟି ଗେମ୍ ଟାଇ ରହିଥିବାବେଳେ ସମାନ ସଂଖ୍ୟକ ମ୍ୟାଚ ବାତିଲ ହୋଇଛି। ଏହାକୁ ହିସାବକୁ ନେଲେ କୋହଲିଙ୍କ ନେତୃତ୍ୱରେ ଭାରତ ୬୫.୧୧ ପ୍ରତିଶତ ଟି୨୦ ମ୍ୟାଚ୍ ଜିତିଛି।
କୋହଲିଙ୍କ ନେତୃତ୍ୱରେ ଭାରତ ଏ ପର୍ଯ୍ୟନ୍ତ କୌଣସି ଆଇସିସି ଟ୍ରଫି ଜିତିପାରି ନାହିଁ। ହେଲେ ଦକ୍ଷିଣ ଆଫ୍ରିକା, ଅଷ୍ଟ୍ରେଲିଆ, ନ୍ୟୁଜିଲାଣ୍ଡ, ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ବିପକ୍ଷରେ ଭାରତର ସିରିଜ ବିଜୟ ତାଙ୍କ ନେତୃତ୍ୱ ନେବାର ଦକ୍ଷତାକୁ ଦର୍ଶାଏ।
୨୦୧୮ରେ ଦକ୍ଷିଣ ଆଫ୍ରିକା ବିପକ୍ଷରେ ବିରାଟଙ୍କ ନେତୃତ୍ୱରେ ଭାରତ ୨-୧ରେ ସିରିଜ ଜିତିଥିଲା। ସେହିବର୍ଷ ଶକ୍ତିଶାଳୀ ଇଂଲଣ୍ଡ ଗସ୍ତରେ ୨-୧ରେ ସିରିଜ୍ ଜିତିଥିଲା ଟିମ୍ ଇଣ୍ଡିଆ। ୨୦୧୯-୨୦ରେ ବିଦେଶ ମାଟିରେ ଭାରତକୁ ମିଳିଥିଲା ବୃହତ୍ ବିଜୟ। ଏହି ବର୍ଷ କୋହଲି ବାହିନୀ ନ୍ୟୁଜିଲାଣ୍ଡକୁ ୫-୦ରେ ପରାସ୍ତ କରିଥିଲା। ୨୦୨୦ରେ ଦିନିକିଆ ସିରିଜ ହାରିବା ପରେ ଭାରତ ସଫଳ ପ୍ରତ୍ୟାବର୍ତ୍ତନ କରି ଟି୨୦ ସିରିଜକୁ ୨-୧ରେ ଜିତିଥିଲା। ନିକଟ ଅତୀତରେ ତାରକା ଖେଳାଳିରେ ଖଚିତ ଇଂଲଣ୍ଡକୁ ଭାରତ ୩-୨ରେ ହରାଇଥିଲା ଏବଂ କୋହଲି ପ୍ଲେୟର ଅଫ୍ ଦି ସିରିଜ ବିବେଚିତ ହୋଇଥିଲେ। କୋହଲି ଏବେ ଟି୨୦ରେ ୩୧୫୯ ରନ କରି ଅଗ୍ରଣୀ ସ୍କୋରର ଅଛନ୍ତି। ତାଙ୍କ ଆଭରେଜ ହେଉଛି ୫୨.୬୫ ଓ ସର୍ବାଧିକ ସ୍କୋର ୯୪*।