କୋଝିକୋଡେ,୮।୧୧: ହିଜାବ ବିବାଦ ଥମିବାର ନାଁ ନେଉନି। ଇରାନୀୟ ମହିଳାମାନେ ଦୁଇମାସ ହେଲା ହିଜାବ ବିରୋଧୀ ଆନ୍ଦୋଳନ ଜାରି ରଖିଛନ୍ତି। ଏହି ଆନ୍ଦୋଳନରେ ଶତାଧିକ ମହିଳାଙ୍କ ଜୀବନ ଗଲାଣି। ସେମାନଙ୍କୁ ସମର୍ଥନ ଜଣାଇ କେରଳର କୋଝିକୋଡେଠାରେ ଯୁକ୍ତିବାଦୀ ସଂଗମର ମୁସଲମାନ ମହିଳାମାନେ ରବିବାର ହିଜାବ ପୋଡ଼ିଛନ୍ତି।
କର୍ନାଟକ ସରକାର ଶିକ୍ଷାନୁଷ୍ଠାନରେ ହିଜାବ ପରିଧାନ ଉପରେ ରୋକ ଲଗାଇବା ପରେ ଏହା ବିରୋଧରେ କରି ବହୁସଂଖ୍ୟାରେ ମୁସଲମାନ ଛାତ୍ରୀ ରାସ୍ତାକୁ ଓହ୍ଲାଇଥିଲେ। ଉଡ଼ୁପି ମହିଳା ପ୍ରି-ୟୁନିଭର୍ସିଟି କଲେଜର ୬ ଜଣ ଛାତ୍ରୀ ଏହାର ନେତୃତ୍ୱ ନେଇଥିଲେ। ହିଜାବ ପିନ୍ଧିବା ସେମାନଙ୍କର ଅଧିକାର ବୋଲି ଦାବି କରି ସେମାନେ ବିକ୍ଷୋଭ ପ୍ରଦର୍ଶନ କରିଥିଲେ। କର୍ନାଟକ ହାଇକୋର୍ଟ ସରକାରଙ୍କ ସପକ୍ଷରେ ରାୟ ଦେବା ପରେ ଏହାକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯାଇଥିଲା। ହିଜାବ ପିନ୍ଧିବା ଇସ୍ଲାମରେ ଜରୁରୀ ପ୍ରଥା ନୁହେଁ ବୋଲି ସ୍ବତନ୍ତ୍ର ଖଣ୍ଡପୀଠ କହିଥିଲେ।
ଗତ ସେପ୍ଟେମ୍ବରରେ ଇରାନରେ ହିଜାବ ବିରୋଧରେ ପ୍ରତିବାଦର ସ୍ବର ଉଠିଥିଲା। ସେଠାର ହିଜାବକୁ ବିରୋଧ କରୁଥିବା ମହସା ଅମିନି ନାମ୍ନୀ ମହିଳାଙ୍କର ପୋଲିସ ହାଜତରେ ମୃତ୍ୟୁ ପରେ ଆନ୍ଦୋଳନ ହିଂସାତ୍ମକ ରୂପ ନେଇଥିଲା। ବିକ୍ଷୋଭ ୧୫୦ରୁ ଊର୍ଦ୍ଧ୍ୱ ସହରକୁ ବ୍ୟାପିଥିବାବେଳେ ଏହାକୁ ଦମନ କରିବାକୁ ଯାଇ ପୋଲିସ କାର୍ଯ୍ୟାନୁଷ୍ଠାନରେ ୯୨ ଜଣ ପ୍ରାଣ ହରାଇଥିବା ଏକ ଏନ୍ଜିଓ ପକ୍ଷରୁ କୁହାଯାଇଥିଲା। ଇରାନ ସରକାରଙ୍କ କାର୍ଯ୍ୟାନୁଷ୍ଠାନକୁ ବିଭିନ୍ନ ଦେଶରେ ବିରୋଧ କରାଯିବା ସହ ଆନ୍ଦୋଳନକାରୀ ମହିଳାଙ୍କ ସମର୍ଥନରେ ଶୋଭାଯାତ୍ରା କରାଯାଇଛି।
କୋଝିକୋଡେଠାରେ ରବିବାର କେରଳ ଯୁକ୍ତିବାଦୀ ସଙ୍ଗମ୍ର ସେମିନାର ପରେ ମୁସଲମାନ ମହିଳାମାନେ ହିଜାବ ପୋଡ଼ିଥିଲେ। ୬ ଜଣ ମହିଳା ଏହାର ନେତୃତ୍ୱ ନେଇଥିଲେ। ଭାରତରେ ହିଜାବ ପୋଡ଼ି ପ୍ରଥମ ଘଟଣା। ଇରାନରେ ହିଜାବ ପିନ୍ଧିବାକୁ ବାଧ୍ୟତାମୂଳକ କରାଯିବା ପ୍ରତିବାଦରେ ମହିଳାମାନେ ବିକ୍ଷୋଭ ଚଳାଇଥିବାବେଳେ ସେମାନଙ୍କ ସମର୍ଥନରେ କେରଳର ମୁସଲମାନ ମହିଳାମାନେ ପ୍ଲାକାର୍ଡ ଧରି ସ୍ଲୋଗାନ ଦେଇଥିଲେ।
