ଟୋକିଓ, ୭।୪: ମହାମାରୀ କରୋନା ସଂକ୍ରମଣ ରୋକିବା ସକାଶେ ବିଭିନ୍ନ ଦେଶ ସଙ୍ଗରୋଧ ବା ଆଇସୋଲେଶନ୍ ନିୟମ ଅବଲମ୍ବନ କରିଥିଲେ। ପାଖାପାଖି ୨ ବର୍ଷ ପରେ ଯେତେବେଳେ କୋଭିଡ୍-୧୯ ସଂକ୍ରମଣ ନିୟନ୍ତ୍ରଣକୁ ଆସିଲା, ସେ ସମୟରେ ଲୋକେ ଆଇସୋଲେଶନ୍ରେ ନ ରହି ବାହାରକୁ ଯା’ଆସ ଆରମ୍ଭ କରିଥିଲେ। ଫଳରେ ଲୋକେ ଆଉ ସଙ୍ଗରୋଧରେ ରହୁ ନାହାନ୍ତି। ସଂକ୍ରମଣ କମିଥିଲେ ସୁଦ୍ଧା ଜାପାନବାସୀ ଏବେ ମଧ୍ୟ ଆଇସୋଲେଶନ୍ ନୀତିକୁ ଆପଣେଇଛନ୍ତି। ଜାପାନ ଲୋକଙ୍କଠାରେ ଏକୁଟିଆପଣ ବଢ଼ିବାରେ ଲାଗିଛି। ବିଶେଷ ଭାବେ ଯୁବପିଢ଼ି ନିଜକୁ ସମାଜଠାରୁ ଦୂରରେ ରଖିବାରେ ଲାଗିଛନ୍ତି। ଦେଶରେ ପାଖାପାଖି ୧୫ ଲକ୍ଷ ଲୋକ ନିଜକୁ ଆଇସୋଲେଶନ୍ରେ ରଖିଥିବା ସରକାରଙ୍କ ପକ୍ଷରୁ କରାଯାଇଥିବା ସର୍ଭେରୁ ଜଣାପଡ଼ିଛି। ଏମାନଙ୍କ ମଧ୍ୟରୁ ୨୦% ଯୁବପିଢ଼ି କୋଭିଡ୍ ଭୟରେ ସଙ୍ଗରୋଧରେ ରହିବାକୁ ପସନ୍ଦ କରୁଛନ୍ତି।
ଜାପାନ କ୍ୟାବିନେଟ୍ ଅଫିସ ପକ୍ଷରୁ ଗତବର୍ଷ ନଭେମ୍ବରରେ ୧୦ରୁ ୬୯ ବୟସ ବର୍ଗର ୩୦,୦୦୦ ଲୋକଙ୍କୁ ନେଇ ସର୍ଭେ କରାଯାଇଥିଲା। ଲୋକମାନେ ସେଲ୍ଫ ଆଇସୋଲେଶନ୍ରେ ରହିବାକୁ ବିଶେଷଜ୍ଞମାନେ ହିକିକୋମୋରି ନାମ ଦେଇଛନ୍ତି। ସର୍ଭେ ରିପୋର୍ଟ ଅନୁସାରେ ୧୫ରୁ ୬୨ ବୟସ ବର୍ଗର ୨% ଲୋକ ନିଜକୁ ଆଇସୋଲେଶନ୍ରେ ରଖିଥିବା ଜଣାପଡ଼ିଛି। ସମ୍ପର୍କରେ ଦେଖାଯାଉଥିବା ସମସ୍ୟା ଏବଂ ଚାକିରି ଛାଡ଼ିବା କିମ୍ବା ତଡ଼ା ହେବାପରେ ଲୋକେ ସମାଜରୁ ନିଜକୁ ଦୂରେଇ ଦେଇଥିବା ଲକ୍ଷ୍ୟ କରାଯାଇଛି। ସେହିପରି ୪୦ରୁ ୬୪ ବର୍ଷ ବୟସ ବର୍ଗର ୪୪.୫% ଲୋକ ଚାକିରି ଛାଡ଼ିବା ପରେ ତାଙ୍କ ବ୍ୟବହାର ବଦଳିଯାଇଛି ଏବଂ ୨୦.୬% ଲୋକ କୋଭିଡ୍ ସକାଶେ ନିଜକୁ ସଙ୍ଗରୋଧରେ ରଖିଛନ୍ତି।
ଅନ୍ୟପକ୍ଷେ ଲୋକଙ୍କ ମଧ୍ୟରେ ବଢ଼ୁଥିବା ମାନସିକ ଚାପ, ଅବସାଦ, ସୋସିଆଲ ଫୋବିଆ ସାଙ୍ଗକୁ ମର୍ଡନ୍ ସୋସାଇଟିର ଚାପ, ପ୍ରତିଯୋଗିତା, ହାଇ ଏକାଡେମିକ୍ ଏକ୍ସପେକ୍ଟେଶନ୍ ଯୋଗୁ ଯୁବପିଢ଼ି ସମାଜଠାରୁ ନିଜକୁ ଦୂରରେ ରଖିବା ପସନ୍ଦ କରୁଛନ୍ତି। ତେବେ ହିକିକୋମୋରିରୁ ଲୋକଙ୍କ ମଧ୍ୟରେ ମାନସିକ ରୋଗ ବଢ଼ିବା ଆଶଙ୍କା ରହିଛି। ଜାପାନରେ ଏହା ଏକ ସାମାଜିକ ଅସୁବିଧା ଭାବେ ପରିଲଖିତ ହୋଇଛି। ହିକିକୋମୋରିରୁ ଲୋକଙ୍କୁ ବାହାର କରିବା ପାଇଁ ଟୋକିଓର ଇଡୋଗାଓ୍ବା ଓ୍ବାର୍ଡରେ ଜୁନ୍ରୁ ମେଟାଭର୍ସ ସୋସିଆଲାଇଜିଂ ଇଭେଣ୍ଟର ଆୟୋଜନ କରିବାକୁ ଯାଉଛି। ଓ୍ବାର୍ଡରେ ପାଖାପାଖି ୯ ହଜାର ଲୋକ ବାସ କରୁଥିବାବେଳେ ପାଖାପାଖି ଛାତ୍ରୀଛାତ୍ର ସ୍କୁଲ ଯିବା ବନ୍ଦ କରିଦେଇଥିବା ସର୍ଭେରୁ ଜଣାପଡ଼ିଛି। ତେବେ ହିକିକୋମୋରି କେବଳ ଯୁବପିଢ଼ିଙ୍କୁ ମାନସିକ ରୋଗାକ୍ରାନ୍ତ କରିବ ତା’ ନୁହେଁ, ଏଥିଯୋଗୁ ଦେଶରେ ଜନ୍ମହାର କମିବା ଆଶଙ୍କା ଥିବା ବିଶେଷଜ୍ଞମାନେ ଦାବି କରିଛନ୍ତି।