![](https://www.dharitri.com/wp-content/uploads/2022/11/Himanchal.jpg)
ଶିମଲା,୧୨ ।୧: ହିମାଚଳ ପ୍ରଦେଶର ସମସ୍ତ ୬୮ ବିଧାନସଭା ଆସନ ଲାଗି ଶନିବାର ଭୋଟିଂ ହେବ । ସାରା ରାଜ୍ୟରେ ଏଥିପାଇଁ ୭,୮୮୪ ମତଦାନ କେନ୍ଦ୍ର ସ୍ଥାପନ କରାଯାଇଛି । ଏଠାରେ ସକାଳ ୮ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଭୋଟ ଗ୍ରହଣ କରାଯିବ । ରାଜ୍ୟର ୪୧୨ ଜଣ ପ୍ରାର୍ଥିଙ୍କ ଭାଗ୍ୟ ଶନିବାର ଇଭିଏମରେ ବନ୍ଦ ହୋଇଯିବ । ବିଧାନସଭା ନିର୍ବାଚନର ଫଳାଫଳ ୮ ଡିସେମ୍ବରରେ ଆସିବ । ରାଜ୍ୟରେ ମୋଟ ୫୫,୯୨,୮୨୮ ଭୋଟର ଥିବା ବେଳେ ଏମାନଙ୍କ ମଧ୍ୟରେ ୨୮.୫୪,୯୪୫ ପୁରୁଷ ଓ ୨୭,୩୭,୮୫ ମହିଳା ଭୋଟର ରହିଛନ୍ତି । ଏହା ବ୍ୟତୀତ ପ୍ରାୟ ୩୮ ଜଣ ଥାର୍ଡ ଜେଣ୍ଡର ବି ଭୋଟ ଦେବେ । ରାଜ୍ୟରେ ୨୦୧୭ରେ ୭୫.୫୭ ପ୍ରତିଶତ ମତଦାନ ହୋଇଥିଲା, ଏହା ୨୦୧୨ର ବିଧାନସଭା ନିର୍ବଚନରେ ୭୩.୫ ପ୍ରତିଶତ ମତଦାନଠାରୁ ଅଧିକ ଥିଲା ।
ସୂଚନାଯୋଗ୍ୟ, ହିମାଚଳ ପ୍ରଦେଶର ଟ୍ରେଣ୍ଡ ରହି ଆସିଛି ପ୍ରତିଥର ନିର୍ବାଚନରେ ସରକାର ବଦଳି ଥାଆନ୍ତି । ଅର୍ଥାତ୍ ଶାସକ ଦଳ ପରାଜୟ ସ୍ୱୀକାର କରିଥାଆନ୍ତି । ସେଥିପାଇଁ ଏଥର ନିର୍ବାଚନ ପ୍ରଚାରରେ ଭାରତୀୟ ଜନତା ପାର୍ଟି(ଭାଜପା) ନୂଆ ଉପାୟ ଆପଣେଇଥିଲା । ଭାଜପାର ସ୍ଲୋଗାନ ଥିଲା, ‘ ରାଜ ନେହିଁ, ରିୱାଜ ବଦଲେଙ୍ଗେ । ଅର୍ଥାତ୍ ସରକାର ନୁହେଁ ପୁରୁଣା ପରମ୍ପରାକୁ ବଦଳାଇ ଦେବା । ଏବେ ରାଜ୍ୟରେ ଭାଜପା ସରକାର ଥିବା ବେଳେ ଜୟରାମ ଠାକୁର ମୁଖ୍ୟମନ୍ତ୍ରୀ ରହିଛନ୍ତି । ଏହା ପୂର୍ବରୁ ଏଠାରେ ୨୦୧୨ରେ କଂଗ୍ରେସ ସରକାର ଥିଲା ।