ଶିମଲା,୧୨ ।୧୧: ହିମାଚଳ ପ୍ରଦେଶ ବିଧାନସଭାର ସମସ୍ତ ୬୮ ଆସନ ପାଇଁ ଶନିବାର ଭୋଟ ଗ୍ରହଣ ହେବାକୁ ଯାଉଛି । ଏହି ମତଦାନ ପ୍ରକ୍ରିୟାକୁ ସୁଚାରୁ ରୂପେ ତୁଲାଇବା ପାଇଁ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । କେନ୍ଦ୍ରୀୟ ସଶସ୍ତ୍ର ପୋଲିସ ବଳ(ସିଏପିଏଫ)ର ୬୭ କମ୍ପାନୀ ଓ ୧୧, ୫୦୦ରୁ ଅଧିକ ରାଜ୍ୟ ପୋଲିସଙ୍କ ସମେତ ପ୍ରାୟ ୩୦,୦୦୦ ସୁରକ୍ଷା କର୍ମୀ ହିମାଚଳ ପ୍ରଦେଶରେ ଶାନ୍ତିପୂର୍ଣ୍ଣ ମତଦାନ ପାଇଁ ମୁତୟନ ରହିଛନ୍ତି । ଏହା ବ୍ୟତୀତ ପ୍ରାୟ ୫୦,୦୦୦ ସରକାରୀ କର୍ମଚାରୀ ପୋଲିଂ ଡ୍ୟୁଟିରେ ଅଛନ୍ତି ।
ସୂଚନାଯୋଗ୍ୟ, ସାରା ରାଜ୍ୟରେ ଏଥିପାଇଁ ୭,୮୮୪ ମତଦାନ କେନ୍ଦ୍ର ସ୍ଥାପନ କରାଯାଇଛି । ଏଠାରେ ସକାଳ ୮ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଭୋଟ ଗ୍ରହଣ କରାଯିବ । ରାଜ୍ୟର ୪୧୨ ଜଣ ପ୍ରାର୍ଥିଙ୍କ ଭାଗ୍ୟ ଶନିବାର ଇଭିଏମରେ ବନ୍ଦ ହୋଇଯିବ । ବିଧାନସଭା ନିର୍ବାଚନର ଫଳାଫଳ ୮ ଡିସେମ୍ବରରେ ଆସିବ । ରାଜ୍ୟରେ ମୋଟ ୫୫,୯୨,୮୨୮ ଭୋଟର ଥିବା ବେଳେ ଏମାନଙ୍କ ମଧ୍ୟରେ ୨୮.୫୪,୯୪୫ ପୁରୁଷ ଓ ୨୭,୩୭,୮୫ ମହିଳା ଭୋଟର ରହିଛନ୍ତି । ଏହା ବ୍ୟତୀତ ପ୍ରାୟ ୩୮ ଜଣ ଥାର୍ଡ ଜେଣ୍ଡର ବି ଭୋଟ ଦେବେ ।
