![](https://www.dharitri.com/wp-content/uploads/2022/09/n-11-11.jpg)
ଗୁଆହାଟୀ, ୧୪।୯ : କଂଗ୍ରେସ ଦଳର ଅଫିସିଆଲ ଟୁଇଟର ହ୍ୟାଣ୍ଡେଲ ମାଧ୍ୟମରେ ଏକ ଫଟୋ ପୋଷ୍ଟ କରାଯାଇଥିଲା। ଫଟେରେ ଦର୍ଶାଯାଇଥିଲା ଯେ ରାଷ୍ଟ୍ରୀୟ ସ୍ବଂୟସେବକ ସଂଘ(ଆରଏସଏସ)ର ଡ୍ରେସ କୋଡ ପୋଡି ଯାଉଛି। ଏହି ଟୁଇଟକୁ ନେଇ ଭାଜପା କଂଗ୍ରେସ ମଧ୍ୟରେ ବିବାଦ ଉପୁଜିଥିଲା। ଏବେ ଆସାମର ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସରମା ମଧ୍ୟ ଏକ ଫଟୋ ଶେୟାର କରିଛନ୍ତି। ଏହି ଫଟୋରେ ଭାରତର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହରଲାଲ ନେହେରୁଙ୍କୁ ଏକ ହାଫ୍ ପ୍ୟାଣ୍ଟ୍ (ନିକ୍କାର)ରେ ଦେଖିବାକୁ ମିଳୁଛି।
କଂଗ୍ରେସ ଏବଂ ବିଶେଷକରି ରାହୁଲ ଗାନ୍ଧୀଙ୍କୁ ସମାଲୋଚନା କରିବା ପାଇଁ ହିମନ୍ତ ସରମା ଏହି ଫଟୋ ପୋଷ୍ଟ କରି କଂଗ୍ରେସକୁ ପଚାରିଛନ୍ତି ଯେ ଆପଣ ମଧ୍ୟ ଏହାକୁ ପୋଡି ଦେବେ କି?
ତେବେ ଫଟୋରେ ନେହେରୁ ଆରଏସଏସର ଖାକି ୟୁନିଫର୍ମରେ ନୁହେଁ ବରଂ କଂଗ୍ରେସର ସେବା ଦଳ ୟୁନିଫର୍ମରେ ଦେଖାଯାଉଛନ୍ତି। ଶର୍ଟରେ ନେହେରୁଙ୍କ ଏହି ଫଟୋ ପ୍ରାୟତଃ ମିଥ୍ୟା ଦାବି ସହିତ ଭାଇରାଲ ହୋଇଥାଏ ଯେ ନେହେରୁ ଖାକି ପୋଷାକ ପିନ୍ଧି ଏକ ଆରଏସଏସ ବୈଠକରେ ଯୋଗ ଦେଇଥିଲେ।
କଂଗ୍ରେସ ନେତା ତଥା ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ କମଲ ନାଥ ପଚାରିଛନ୍ତି ରାହୁଲ ଗାନ୍ଧୀଙ୍କ ନେତୃତ୍ୱରେ ଭାରତ ଯୋଡ ଯାତ୍ରାରେ କଂଗ୍ରେସର ଚମତ୍କାର ସଫଳତା ନେଇ ଭାଜପା ଲୋକ ଧ୍ୟାନ ହଟାଇବାକୁ ଚାହୁଁଛି।
ତେବେ ହିମନ୍ତ ସରମାଙ୍କ ଦ୍ୱାରା ଶେୟାର ହୋଇଥିବା ଶର୍ଟରେ ନେହେରୁଙ୍କ ଫଟୋ ଏବେ ଭାଇରାଲ ହେବାରେ ଲାଗିଛି।