ଓ୍ବାଶିଂଟନ/ନୂଆଦିଲ୍ଲୀ,୨୩।୩ : ଏହାର ରିପୋର୍ଟ ଜରିଆରେ ଷ୍ଟକ ମାର୍କେଟରେ ହଇଚଇ ସୃଷ୍ଟି କରିଥିବା ଲୋକପ୍ରିୟ ହିଣ୍ଡେନବର୍ଗ ରିସର୍ଚ୍ଚ ବର୍ତ୍ତମାନ ଖୁବ ଶୀଘ୍ର ଆଉ ଏକ ବଡ ରିପୋର୍ଟ ଆଣିବ ବୋଲି ଚେତାବନୀ ଦେଇଛି। ଶର୍ଟ ସେଲିଂ ଫାର୍ମ ଏକ ଟୁଇଟରେ କହିଛି ଯେ ଖୁବ ଶୀଘ୍ର ଏକ ବଡ ରିପୋର୍ଟ ଆସିବ। ଉଲ୍ଲେଖନୀୟ ବିଷୟ ହେଉଛି, ହିଣ୍ଡେନବର୍ଗର ପୂର୍ବ ରିପୋର୍ଟ ଯୋଗୁ ଭାରତୀୟ ବିଲିୟନେୟାର ବ୍ୟବସାୟୀ ଗୌତମ ଆଦାନୀ ଷ୍ଟକ ମାର୍କେଟରେ ବହୁ କ୍ଷତି ସହିଛନ୍ତି। କେବଳ ଏତିକି ନୁହେଁ, ଆଦାନୀଙ୍କ ଅନେକ କମ୍ପାନୀ ମଧ୍ୟ ସେବି ନଜରରେ ରହିଛି।
ହିଣ୍ଡେନବର୍ଗ ରିସର୍ଚ୍ଚ ହେଉଛି ଏକ ଆର୍ଥିକ ଅନୁସନ୍ଧାନକାରୀ ସଂସ୍ଥା ଯାହା ଇକ୍ୱିଟି, କ୍ରେଡିଟ ଏବଂ ଡେରିଭେଟିଭ ମାର୍କେଟ ଉପରେ ତଥ୍ୟ ବିଶ୍ଳେଷଣ କରେ । ଏହା ନାଥନ ଆଣ୍ଡରସନଙ୍କ ଦ୍ୱାରା ୨୦୧୭ ମସିହାରେ ପ୍ରତିଷ୍ଠିତ ହୋଇଥିଲା ।ଏହା କର୍ପୋରେଟ ଜଗତର କାର୍ଯ୍ୟକଳାପ ବିଷୟରେ ପ୍ରକାଶ କରିବା ପାଇଁ ଜଣାଶୁଣା। କମ୍ପାନୀର ନାମ ୧୯୩୭ ମସିହାରେ ଘଟିଥିବା ହିଣ୍ଡେନବର୍ଗ ବିପର୍ଯ୍ୟୟ ଉପରେ ଆଧାରିତ। ଯେତେବେଳେ ଜର୍ମାନର ଯାତ୍ରୀବାହୀ ବିମାନରେ ନିଆଁ ଲାଗି ୩୫ ଜଣଙ୍କର ମୃତ୍ୟୁ ଘଟିଥିଲା।
କମ୍ପାନୀ ଜାଣିବାକୁ ଚାହେଁ ଯେ ଶେୟାର ବଜାରରେ ଟଙ୍କା ଅପବ୍ୟବହାର ହୋଇଛି କି? କୌଣସି କମ୍ପାନୀ ଆକାଉଣ୍ଟ ପରିଚାଳନାରେ ନିଜକୁ ବଡ଼ ଦେଖାଉ ନାହିଁ କି? କମ୍ପାନୀ ନିଜ ଲାଭ ପାଇଁ ଷ୍ଟକ ମାର୍କେଟରେ ଭୁଲ ଭାବରେ ବେଟ ରଖି ଅନ୍ୟ କମ୍ପାନୀର ଅଂଶଧନକୁ କ୍ଷତି ପହଞ୍ଚାଉ ନାହିଁ କି?
