ଢେଙ୍କାନାଳ ଅଫିସ,୫ା୪: ସରିଛି ନିର୍ବାଚନ। ନିଜ ପସନ୍ଦର ପ୍ରାର୍ଥୀଙ୍କୁ ଭୋଟ ଦେଇଛନ୍ତି ଭୋଟର। ୩ ନଗରପାଳ ପ୍ରାର୍ଥୀଙ୍କ ସମେତ ମୋଟ ୫୩ ଜଣଙ୍କ ଭାଗ୍ୟ ଇଭିଏମ୍ରେ କଏଦ ହୋଇଥିବାବେଳେ ବୁଧବାର ବାହାରିବ ଫଳାଫଳ। ଏହାକୁ ନେଇ ଉଷ୍ମ ହୋଇଛି ଢେଙ୍କାନାଳ ଜିଲା ହିନ୍ଦୋଳ ଏନ୍ଏସିର ରାଜନୈତିକ ବାତାବରଣ।
ମତଦାନ ପରେ ହିନ୍ଦୋଳ ଏନ୍ଏସି କାର୍ଯ୍ୟାଳୟର ଷ୍ଟ୍ରଙ୍ଗ୍ରୁମ୍ରେ ଇଭିଏମ୍ଗୁଡ଼ିକୁ କଡ଼ା ସୁରକ୍ଷା ବଳୟରେ ରଖାଯାଇଛି। ବୁଧବାର ପୂର୍ବାହ୍ନ ୮ଟାରେ ଭୋଟ ଗଣତି ଆରମ୍ଭ ହେବ। ନଗରପାଳ ପ୍ରାର୍ଥୀ ଏବଂ କାଉନ୍ସିଲର ପ୍ରାର୍ଥୀଙ୍କ ଗଣନା ପାଇଁ ପୃଥକ୍ ଟେବୁଲ୍ ରହିବ। ମୋଟ ୧୬ ବୁଥ୍ ଅନୁଯାୟୀ ୧୬ ରାଉଣ୍ଡ ଗଣନା ହେବ। ଏଥିଲାଗି ସମସ୍ତ ପ୍ରସ୍ତୁତି ଶେଷ ହୋଇଛି। ପୂର୍ବାହ୍ନ ୧୧ଟା ସୁଦ୍ଧା ଫଳାଫଳ ଜଣାପଡ଼ିବ ବୋଲି ଆଶା କରାଯାଉଥିବା ନିର୍ବାଚନ ଅଧିକାରୀ ଦାୟିତ୍ୱରେ ଥିବା ହିନ୍ଦୋଳ ଉପଜିଲାପାଳ ଶିବାନନ୍ଦ ସ୍ବାଇଁ ସୂଚନା ଦେଇଛନ୍ତି। ଭୋଟ ଗଣତି ସମୟରେ ରାଜନୈତିକ ଦଳ ପକ୍ଷରୁ ମନୋନୀତ ଏଜେଣ୍ଟ ଉପସ୍ଥିତ ରହିବେ। ଗଣତି ଲାଗି କର୍ମଚାରୀ ଏବଂ ପରିଚାଳନା ଅଧିକାରୀଙ୍କୁ ମଧ୍ୟ ନିୟୋଜିତ କରାଯାଇଛି। ଶାନ୍ତିଶୃଙ୍ଖଳା ରକ୍ଷା ପାଇଁ ୨ ଅତିରିକ୍ତ ଏସ୍ପି, ୪ ଡିଏସ୍ପି, ୫ ଇନ୍ସପେକ୍ଟର, ୨୨ ଏସ୍ଆଇ ଏବଂ ଏଏସ୍ଆଇଙ୍କ ସହିତ ୨ ପ୍ଲାଟୁନ୍ ଫୋର୍ସ ମୁତୟନ କରାଯାଇଥିବା ଏସ୍ପି ଜ୍ଞାନରଞ୍ଜନ ମହାପାତ୍ର ସୂଚନା ଦେଇଛନ୍ତି।
ସୂଚନାଯୋଗ୍ୟ, ଭୁବନ ଏନ୍ଏସି ନିର୍ବାଚନରେ ନଗରପାଳ ପଦବୀରେ ୩ ଏବଂ କାଉନ୍ସିଲର ପଦବୀରେ ୫୦ ପ୍ରାର୍ଥୀ ନିର୍ବାଚନ ଲଢୁଛନ୍ତି। ମୋଟ ୯,୮୬୩ ଭୋଟରଙ୍କ ମଧ୍ୟରୁ ୮,୬୪୧ ଜଣ ମତଦାନ ସାବ୍ୟସ୍ତ କରିଛନ୍ତି। ବୁଧବାର ଫଳାଫଳ ହିନ୍ଦୋଳ ଏନ୍ଏସିର ଭାଗ୍ୟ ନିର୍ଦ୍ଧାରଣ କରିବାକୁ ଥିବାବେଳେ ଏହାକୁ ନେଇ ପ୍ରମୁଖ ରାଜନୈତିକ ଦଳଗୁଡ଼ିକ ପକ୍ଷରୁ ତତ୍ପରତା ପ୍ରକାଶ ପାଇଛି।
