ହିନ୍ଦୋଳ, ୧।୩(ଡି.ଏନ୍.ଏ.): ଢେଙ୍କାନାଳ ଜିଲା ହିନ୍ଦୋଳ ଏନ୍ଏସିରେ ଆସନ୍ତା ଏପ୍ରିଲ ୩ରେ ନିର୍ବାଚନ ଅନୁଷ୍ଠିତ ହେବ। ଏଥିଲାଗି ମଙ୍ଗଳବାର ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇଛି। ଅନ୍ୟପଟେ ନିର୍ବାଚନୀ ବିଗୁଲ୍ ବାଜିବା ପରେ ସହରାଞ୍ଚଳ ରାଜନୈତିକ ବାତାବରଣରେ ଉଷ୍ମତା ପରିଲକ୍ଷିତ ହୋଇଛି।
୧୬ ଓ୍ବାର୍ଡ ବିଶିଷ୍ଟ ହିନ୍ଦୋଳ ଏନ୍ଏସିର କାର୍ଯ୍ୟକାଳ ଆସନ୍ତା ଏପ୍ରିଲ ୧୨ରେ ଶେଷ ହେଉଛି। ଏଥିପୂର୍ବରୁ ୩ ତାରିଖରେ ପୌରାଞ୍ଚଳବାସୀ ସେମାନଙ୍କ ଜନପ୍ରତିନିଧିଙ୍କୁ ବାଛିବେ। ନିର୍ବାଚନ ଲାଗି ମଙ୍ଗଳବାରଠାରୁ ଏପ୍ରିଲ ୫ ଯାଏ ଆଦର୍ଶ ଆଚରଣ ବିଧି ଲାଗୁ ହୋଇଛି। ପ୍ରକାଶିତ ବିଜ୍ଞପ୍ତି ଅନୁଯାୟୀ, ଆସନ୍ତା ମାର୍ଚ୍ଚ ୩ରୁ ୧୫ ଯାଏ ଆଶାୟୀମାନେ ନାମାଙ୍କନ ପତ୍ର ଦାଖଲ କରିବେ। ୧୭ ତାରିଖରେ ଏହାର ଯାଞ୍ଚ କରାଯିବ। ୨୦ ତାରିଖ ମଧ୍ୟରେ ପ୍ରାର୍ଥତ୍ପତ୍ର ପ୍ରତ୍ୟାହାର ପରେ ଚୂଡ଼ାନ୍ତ ତାଲିକା ପ୍ରକାଶ ପାଇବ। ଏପ୍ରିଲ୍ ୩ରେ ଭୋଟଗ୍ରହଣ ଦିନଧାର୍ଯ୍ୟ କରାଯାଇଥିବାବେଳେ ୫ ତାରିଖରେ ଗଣତି ସହ ଫଳାଫଳ ଘୋଷଣା କରାଯିବ। ୧୯ ତାରିଖରେ ଉପାଧ୍ୟକ୍ଷ ପଦବୀରେ ନିର୍ବାଚନ ହେବ।
ହିନ୍ଦୋଳ ଏନ୍ଏସି ନିର୍ବାଚନ ଲାଗି ଡିସେମ୍ବର ୫ରେ ୱାର୍ଡଗୁଡିକର ସୀମା ନିର୍ଦ୍ଧାରଣ କରାଯାଇଥିଲା। ଏଥିସହ କାଉନ୍ସିଲର ଏବଂ ନଗରପାଳ ପଦବୀ ଲାଗି ଆସନ ସଂରକ୍ଷଣ ଚୂଡ଼ାନ୍ତ ପ୍ରକ୍ରିୟା ଶେଷ ହୋଇଥିଲା। ସେହିପରି ଗତ ଫେବୃୟାରୀ ୨୧ରେ ଚୂଡାନ୍ତ ଭୋଟର ତାଲିକା ପ୍ରସ୍ତୁତ ହୋଇଥିଲା। ଚଳିତ ନିର୍ବାଚନରେ ଅଧ୍ୟକ୍ଷ ପଦବୀ ଅନୁସୂଚିତ ଜନଜାତି (ଏସ୍ଟି) ବର୍ଗ ଲାଗି ସଂରକ୍ଷିତ ରହିଥିବାବେଳେ ନୂତନ ନିୟମ ଅନୁଯାୟୀ ଏଥିଲାଗି ସିଧାସଳଖ ମତଦାନ ହେବ। ଭୋଟରମାନେ ନଗରପାଳ ଓ କାଉନସିଲର ପଦବୀ ଲାଗି ଦୁଇଟି ଭୋଟ ଦେବେ।
ସୂଚନାଯୋଗ୍ୟ, ଗତ ନିର୍ବାଚନରେ ହିନ୍ଦୋଳ ଏନ୍ଏସି ବିଜେଡି କବ୍ଜାରେ ଥିଲା। ତେବେ ଦଳୀୟ କାଉନ୍ସିଲରଙ୍କ ଅନାସ୍ଥାରେ ନଗରପାଳ ରୀନାରାଣୀ ବେହେରା ହାରିବା ଏବଂ ଏହି ମାମଲା ହାଇକୋର୍ଟ ଯାଏ ଯିବା ରାଜ୍ୟ ରାଜନୀତିରେ ଚର୍ଚ୍ଚିତ ପ୍ରସଙ୍ଗ ପାଲଟିଥିଲା। ଏହାପରଠାରୁ ଉପନଗରପାଳ ଟିମା ବେହେରା ନଗରପାଳ ଦାୟିତ୍ୱ ତୁଲାଉଛନ୍ତି। ଏନ୍ଏସିରେ ରାଜନୈତିକ ଗୋଷ୍ଠୀକନ୍ଦଳ ବିକାଶରେ ବାଧକ ସାଜିଥିବା ଅଭିଯୋଗ ହେଉଥିବାବେଳେ ଏହି ନିର୍ବାଚନ ଆଶାୟୀଙ୍କ ପାଇଁ ସମ୍ମାନର ପ୍ରଶ୍ନ ପାଲଟିଛି।