ନୂଆଦିଲ୍ଲୀ,୨୦।୧: ଗୋଟିଏ ପଟେ ଅଯୋଧ୍ୟାରେ ପ୍ରଭୁ ଶ୍ରୀରାମଙ୍କ ପ୍ରାଣ ପ୍ରତିଷ୍ଠା ଲାଗି ରୀତିନୀତି ଚାଲିଥିବାବେଳେ ଅନ୍ୟପକ୍ଷେ ଦିଲ୍ଲୀର ବାବର ରୋଡ୍ ବୋର୍ଡରେ ଅଯୋଧ୍ୟା ମାର୍ଗର ଏକ ପୋଷ୍ଟର ଲଗାଯାଇଛି। ହିନ୍ଦୁ ସେନା ପକ୍ଷରୁ ଶନିବାର ଏହି ପୋଷ୍ଟର ଲଗାଯାଇଛି। ପୂର୍ବରୁ ହିନ୍ଦୁ ସଂଗଠନଗୁଡ଼ିକ ବାବର ରୋଡ ସହିତ ଅନ୍ୟ ମୋଗଲ ଶାସକଙ୍କ ନାମରେ ନାମିତ ରାସ୍ତାର ନାମ ପରିବର୍ତ୍ତନ କରାଯାଉ ବୋଲି ଦାବି କରିଆସୁଛନ୍ତି। ହିନ୍ଦୁ ସେନା ଏବେ ପୁଣି ଥରେ ଏହି ପୋଷ୍ଟର ଲଗାଇ ଏହି ଦାବିକୁ ଉଠାଇଛନ୍ତି। ପୋଷ୍ଟରର ଫଟୋ ସୋସିଆଲ ମିଡିଆରେ ଭାଇରାଲ ହେଉଛି।
କୁହାଯାଏ ଯେ ମୋଗଲ ଶାସକ ବାବରଙ୍କ ସେନାପତି ମିର ବାଙ୍କି ଅଯୋଧ୍ୟାରେ ରାମ ମନ୍ଦିର ଭାଙ୍ଗି ବାବ୍ରି ମସଜିଦ ନିର୍ମାଣ କରିଥିଲେ। ଏହା ପରେ ଅନେକ ବିବାଦ ଦେଖାଦେଇଥିଲା। ହଜାର ହଜାର ଲୋକ ପ୍ରାଣ ହରାଇଥିଲେ। ଆଜି, ୫୦୦ ବର୍ଷ ପରେ, ଅଯୋଧ୍ୟାରେ ସମାନ ସ୍ଥାନରେ ରାମ ମନ୍ଦିର ନିର୍ମାଣ ହେଉଛି। ପ୍ରଭୁ ରାମଙ୍କ ପ୍ରାଣ ପ୍ରତିଷ୍ଠା ସହ ହିନ୍ଦୁ ସଂଗଠନର ବିରୋଧ ପୁଣି ଥରେ ସାମ୍ନାକୁ ଆସିଛି।
