ଅଟଓ୍ବା,୬।୪ : କାନାଡ଼ାରେ ପୁଣି ଥରେ ହିନ୍ଦୁ ମନ୍ଦିରଗୁଡିକ ଟାର୍ଗେଟ କରାଯାଇଛି। ଏଠାରେ ୱିଣ୍ଡସରରେ ଏକ ହିନ୍ଦୁ ମନ୍ଦିରକୁ କିଛି ମାସ୍କେଡ ଆକ୍ରମଣକାରୀ ଆକ୍ରମଣ କରିଥିଲେ। ମନ୍ଦିରକୁ ଭଙ୍ଗାରୁଜା କରି କାନ୍ଥରେ ହିନ୍ଦୁ ବିରୋଧୀ ଏବଂ ଭାରତ ବିରୋଧୀ ସ୍ଲୋଗାନ ଲେଖିଥିଲେ।
ଘଟଣା ସମ୍ପର୍କରେ ସ୍ଥାନୀୟ ପୋଲିସ ସୂଚନା ଦେଇଥିଲା। ପୁରା ଘଟଣା ମଧ୍ୟ ସିସିଟିଭି କ୍ୟାମେରାରେ କଏଦ ହୋଇଛି। ପୋଲିସ ଦୁଇ ଅଭିଯୁକ୍ତଙ୍କୁ ଖୋଜୁଛି।
ୱିଣ୍ଡସର ପୋଲିସ ଅଧିକାରୀଙ୍କ ଅନୁଯାୟୀ, ମାସ୍କ ପିନ୍ଧିଥିବା ଅଜଣା ବ୍ୟକ୍ତିମାନେ ଶ୍ରୀ ସ୍ବାମୀନାରାୟଣ ମନ୍ଦିର ବାହାରେ କାନ୍ଥରେ କଳା ରଙ୍ଗରେ ହିନ୍ଦୁ ବିରୋଧୀ ତଥା ଭାରତ ବିରୋଧୀ ସ୍ଲୋଗାନ ଲେଖିଥିଲେ। ପୋଲିସ କହିଛି, ହିନ୍ଦୁ ମନ୍ଦିରରେ ହୋଇଥିବା ଭଙ୍ଗାରୁଜା ଘଟଣାର ଘୃଣ୍ୟ ଘଟଣାର ତଦନ୍ତ କରାଯାଉଛି।
ପ୍ରାରମ୍ଭିକ ଅନୁସନ୍ଧାନରେ, ଅଧିକାରୀମାନେ ଏକ ଭିଡିଓ ପାଇଛନ୍ତି ଯେଉଁଥିରେ ରାତି ପ୍ରାୟ ୧୨ଟା ପରେ ଦୁଇଜଣ ସନ୍ଦିଗ୍ଧ ବ୍ୟକ୍ତିଙ୍କୁ ଦେଖିବାକୁ ମିଳୁଛି। ଭିଡିଓରେ ଜଣେ ସନ୍ଦିଗ୍ଧ ବିଲଡିଂର କାନ୍ଥକୁ ଭଙ୍ଗାରୁଜା କରୁଥିବା ବେଳେ ଅନ୍ୟ ଜଣେ ତାଙ୍କ ପାଖରେ ଠିଆ ହୋଇଥିବା ଦେଖିବାକୁ ମିଳିଛି। ପୋଲିସ କହିଛି ଯେ ଘଟଣା ସମୟରେ ଜଣେ ସନ୍ଦିଗ୍ଧ ବ୍ୟକ୍ତି କଳା ସ୍ବେଟର, ବାମ ଗୋଡରେ ଛୋଟ ଧଳା ଲୋଗୋ ଥିବା କଳା ପ୍ୟାଣ୍ଟ, କଳା ଏବଂ ଧଳା ହାଇ ଟପ ଜୋତା ପିନ୍ଧିଥିଲେ। ଦ୍ୱିତୀୟ ସନ୍ଦିଗ୍ଧ ବ୍ୟକ୍ତି କଳା ପ୍ୟାଣ୍ଟ,ସ୍ବେଟ ଶର୍ଟ, କଳା ଜୋତା ଏବଂ ଧଳା ମୋଜା ପିନ୍ଧିଥିଲେ।
