ଦିସ୍ପୁର,୧୭।୧୧: ସ୍କୁଲ ଶୁକ୍ରବାର ଛୁଟି କରିବା ପାଇଁ ପୁଣି ମୁଣ୍ଡ ଟେକିଲା ବିବାଦ। ଝାଡଖଣ୍ଡରେ ହେମନ୍ତ ସରକାର ଶୁକ୍ରବାର ମୁସଲମାନମାନଙ୍କୁ ସ୍କୁଲରେ ନମାଜ ପାଇଁ ଛୁଟି ଦେଉଛନ୍ତି। ତାହେଲେ ମଙ୍ଗଳବାର ଦିନ ହନୁମାନ ଚାଳିଶା ପାଇଁ ହିନ୍ଦୁମାନଙ୍କୁ ମଧ୍ୟ ଛୁଟି ଦେବାକୁ ପଡିବ। ଯଦି ବିଧାନସଭା ପରିସରରେ ନମାଜ ପାଇଁ ସ୍ଥାନ ଦେବା କଥା କହୁଛୁ, ତେବେ ଆମକୁ ହନୁମାନ ଚାଳିଶା ପଢ଼ିବାକୁ ମଧ୍ୟ ଅନୁମତି ଦିଆଯିବା ଉଚିତ ବୋଲି ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମା କହିଛନ୍ତି।
ଧନବାଦରେ ଏକ ନିର୍ବାଚନୀ ସଭାକୁ ସମ୍ବୋଧିତ କରି ହିମନ୍ତ କହିଛନ୍ତି ଯେ, ଜେଏମଏମ, କଂଗ୍ରେସ ଓ ଆରଜେଡି ସରକାର ଲୋକଙ୍କୁ ବିଭାଜନ କରିବା ପାଇଁ କାମ କରୁଛନ୍ତି। ଅଯୋଧ୍ୟାରେ ରାମ ମନ୍ଦିର ର୍ନିମାଣ କରି ରାମରାଜଙ୍କୁ ଆଣିବାକୁ ଚେଷ୍ଟା କରାଯାଇଛି। କିନ୍ତୁ ଝାଡଖଣ୍ଡର ପୂର୍ବତନ ମନ୍ତ୍ରୀ ଆଲମଗିର ଆଲାମ ଏବଂ ଜାମତାରା ପ୍ରାର୍ଥୀ ଇରଫାନ ଅନସାରୀ ଲୋକଙ୍କୁ ବିଭାଜନ କରିବା ପାଇଁ ରାଜନୀତି କରୁଛନ୍ତି। ବାଂଲାଦେଶୀ ଅନୁପ୍ରବେଶ ଯୋଗୁଁ ଆଦିବାସୀ ସମାଜ କ୍ଷତିଗ୍ରସ୍ତ ହେଉଛି ବୋଲି ହିମନ୍ତ କହିଛନ୍ତି।
ହିମନ୍ତ ଆହୁରି ମଧ୍ୟ କହିଛନ୍ତି ଯେ ଝାଡ଼ଖଣ୍ଡରେ ହିନ୍ଦୁ ଓ ଆଦିବାସୀଙ୍କ ସରକାର ଗଠନ ହେବା ଦରକାର। ବର୍ତ୍ତମାନ ଏଠାରେ ଅନୁପ୍ରବେଶକାରୀ, ମାଫିଆ ଓ ଦଲାଲଙ୍କ ସରକାର ଚାଲିଛି।