ଧାମନଗର, ୪।୯(ସ୍ବ.ପ୍ର.): ମାତ୍ର ୧୪ ବର୍ଷ ବୟସରେ ଘରୁ ପଳାଇଥିଲେ। ଏପଟେ ପୁଅକୁ ଝୁରି ଝୁରି ମା’ ଆରପାରିକୁ ଚାଲିଗଲେ। ମା’ଙ୍କ ପରେ ପରେ ବାପା ମଧ୍ୟ ଆଖି ବୁଜି ଦେଲେ। ଦୀର୍ଘ ବର୍ଷ ବିତିଯିବା ପରେ ପରିବାର ଲୋକେ ଆଶା ଛାଡ଼ି ଦେଇଥିଲେ। ହେଲେ ଦୀର୍ଘ ୩୦ ବର୍ଷ ପରେ ଗତ ସୋମବାର ଗଁାକୁ ଫେରିଛନ୍ତି ଧାମନଗର ଏନ୍ଏସି ଅଧୀନ ଜୟନଗର ଗ୍ରାମର ସ୍ବର୍ଗତ ବୁଲା ପ୍ରଧାନଙ୍କ ବଡ଼ମଝିଆ ପୁଅ ରଘୁ (୪୫)। ତାଙ୍କ ଦେଖି ପରିବାର ଲୋକଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ରଘୁଙ୍କୁ ଦେଖିବା ପାଇଁ ତାଙ୍କ ଘର ପାଖରେ ଗଁା ଲୋକଙ୍କ ଭିଡ଼ ଜମିଥିଲା।
କହନ୍ତି, ପାରିବାରିକ କଳହକୁ କେନ୍ଦ୍ର କରି ସେ ଘର ଛାଡ଼ିଥିଲେ। ଘର ଛାଡ଼ିବା ଦିନ ପ୍ରଥମେ ସେ ଭଦ୍ରକ ଷ୍ଟେଶନରୁ ଟ୍ରେନ୍ରେ ଚଢ଼ିଥିଲେ। କିନ୍ତୁ କେଉଁ ଆଡ଼କୁ ଯାଉଥିଲେ ସେ ଜାଣି ନ ଥିଲେ। ଏକ ଷ୍ଟେଶନରେ ଓହ୍ଲାଇବା ପରେ ମଧ୍ୟପ୍ରଦେଶ ବୋଲି ଜାଣିବାକୁ ପାଇଥିଲେ। ସେଠାରେ ଏକ ଦୋକାନରେ କାମ କରିଥିଲେ। କାମ କରୁଥିବା ସମୟରେ ସେଠାକାର ଏକ ଗାଡ଼ି ମାଲିକ ଆଶ୍ରୟ ଦେବା ପରେ ତାଙ୍କ ପାଖରେ ରହି ଗାଡ଼ିରେ ହେଲ୍ପର ଥିଲେ। ପରେ ଗାଡ଼ି ଚଲାଇଲେ। ହେଲେ ପାରିଶ୍ରମିକ ମାଗିବାରୁ ମାଲିକ କାମରୁ ବାହାର କରି ଦେଇଥିଲେ। ପରେ ନିକଟସ୍ଥ ଏକ ଆଶ୍ରମର ଜଣେ ଭକ୍ତ ତାଙ୍କୁ ସେଠାକୁ ନେଇ ଆଶ୍ରମରେ ରଖିଥିଲେ। ସେଠାରେ ୩ ବର୍ଷ ରହିବା ପରେ ଗଁା କଥା ମନେ ପଡ଼ିବାରୁ ଆଶ୍ରମର ଅନ୍ତେବାସୀ ତାଙ୍କୁ କିଛି ଟଙ୍କା ଦେଇ ଟ୍ରେନ୍ ଟିକେଟ କରି ଭଦ୍ରକ ପଠାଇଥିଲେ। ଷ୍ଟେଶନରୁ ସିଧା ଧାମନଗର ଆସି ଗଁା ନଁା ପଚାରି ପହଞ୍ଚିଛନ୍ତି। ଗଁାର ଏବେକାର ପରିବେଶ ଦେଖି ହଠାତ୍ ଘର ଏବଂ ପଡ଼ୋଶୀ ଲୋକଙ୍କୁ ଚିହ୍ନିପାରି ନ ଥିଲେ। ନିଜର ପରିଚୟ ଦେବା ସହ ଭଉଣୀ ଭାଇ ଓ ତାଙ୍କ ହାତରେ ଥିବା ଟାଟୁ ଦେଖି ପରସ୍ପରକୁ ଚିହ୍ନିଥିଲେ। ପରେ ଗଁା ଲୋକେ ଓ ତାଙ୍କ ଭାଇମାନେ ଖୁସି ହୋଇ ତାଙ୍କୁ ଆଦରି ନେଇଥିଲେ। ତେବେ ଏହା ମଧ୍ୟରେ ଉଭୟ ମା’ ବାପାଙ୍କ ଦେହାନ୍ତ ହୋଇଯାଇଥିବା ଜାଣିବା ପରେ ସେ ଦୁଃଖ ପ୍ରକାଶ କରିଛନ୍ତି।