ମୁମ୍ବାଇ: ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତ୍ଙ୍କ ଆତ୍ମହତ୍ୟା ଖବରକୁ ଆଜି ପର୍ଯ୍ୟନ୍ତ କେହି ସହଜରେ ବିଶ୍ୱାସ କରିପାରୁନାହାନ୍ତି। ଆଉ ତାଙ୍କୁ ଜନ୍ମ ଦେଇଥିବା ପିତା କେମିତି ବା ବିଶ୍ୱାସ କରନ୍ତେ। ସୁଶାନ୍ତଙ୍କ ପାଇଁ ତାଙ୍କ ଆଖିରୁ ଲୁହ ଶୁଖୁନି। କେବଳ ତାଙ୍କରି କଥା ଭାବି ଗୁମୁରି କାନ୍ଦୁଛନ୍ତି। ୪ ଝିଅଙ୍କ ମଧ୍ୟରେ ସୁଶାନ୍ତ ଏକମାତ୍ର ମାତ୍ର ପୁଅ ଥିଲେ। ତାଙ୍କ ପାଇଁ ସେ ଭଗବାନଙ୍କୁ କେତେ ପ୍ରାର୍ଥନା କରି ଶେଷରେ ପାଇଥିଲେ। ହେଲେ ସେ ଆମ ସମସ୍ତଙ୍କୁ ଛାଡ଼ି ଚାଲିଗଲା। ସୁଶାନ୍ତ ହାତକୁ ଦି’ ହାତ ହୋଇଥା’ନ୍ତେ ଅର୍ଥାତ୍ ବିବାହ ବନ୍ଧନରେ ବାନ୍ଧି ହୋଇଥାନ୍ତେ ବୋଲି ତାଙ୍କ ପିତା କେକେ ସିଂ ଏକ ସାକ୍ଷାତକାରରେ କହିଛନ୍ତି।
ସେ କହିଛନ୍ତି, ସୁଶାନ୍ତ ତାଙ୍କ ସହ ପିଲାଦିନେ ସବୁ ବିଷୟରେ କଥା ହେଉଥିଲେ। ଏହି କିଛିଦିନ ହେବ ଚୁପ୍ଚାପ୍ ରହୁଥିଲା। ଶେଷଥର ପାଇଁ ସେ ସୁଶାନ୍ତଙ୍କ ସହ ବିବାହ ବିଷୟରେ କଥା ହୋଇଥିଲେ। କିନ୍ତୁ ସୁଶାନ୍ତ କହିଥିଲେ, ଲକ୍ଡାଉନ୍ ଯୋଗୁ ଏବେ ବିବାହ ସମ୍ଭବ ନୁହେଁ, ପୁଣି ତାଙ୍କର ଆଗକୁ ଏକ ଫିଲ୍ମ ଆସିବାର ଅଛି। ତେଣୁ ସେ ୨୦୨୧ରେ ବିବାହ କରିବେ। ସେ କହିଛନ୍ତି, ଅଙ୍କିତା ଲୋଖଣ୍ଡେଙ୍କୁ ସେ ଜାଣିଛନ୍ତି। ତାଙ୍କୁ ସେ ମୁମ୍ବାଇରେ ଭେଟିଥିଲେ। ଅଙ୍କିତା ସୁଶାନ୍ତଙ୍କ ଏକମାତ୍ର ଝିଅ ସାଙ୍ଗ ଥିଲେ ବୋଲି କେକେ ସିଂ କହିଛନ୍ତି। ତେବେ ରିୟା ଚକ୍ରବର୍ତ୍ତୀଙ୍କୁ ସେ ଜାଣି ନ ଥିବା କହିଛନ୍ତି। ତାଙ୍କ ପିତା ଆହୁରି ମଧ୍ୟ କହିଛନ୍ତି, ସେ ଯାହାକୁ କହିଥାନ୍ତା ମୁଁ ବୋହୂ ବୋଲି ଗ୍ରହଣ କରିଥାନ୍ତି। ମାତ୍ର ସେ ଆମ ସମସ୍ତଙ୍କୁ ପର କରିଦେଇ ଚାଲିଗଲା କହି କାନ୍ଦି ପକାଇଥିଲେ।
